日本47個都道府縣每個地區都有不同特色，無論係街道建築、歷史文化、傳統工藝、美食等等都各具色彩。日本居民根據成長地區嘅文化、風俗民情等等發展出獨特嘅當地人民性格， 日文稱之為「縣民性」。
正所謂「知己知彼，百戰百勝」，如果可以事先瞭解日本各個都道府縣嘅不同特色，絕對可以令您嘅旅程更順利，更準確地揀選出下一個日本之旅嘅心水目的地。 有見及此，FUN! JAPAN編輯部推出【日本47都道府縣特輯】系列，介紹每個都道府縣不為人知嘅另一面，而今次要介紹嘅就係「山梨縣」！
「山梨縣」鄰近東京、擁有與繁華都市截然不同嘅好山好水好風景，係著名嘅旅遊目的地。究竟山梨縣有咩不一樣嘅特徴？就等喺山梨縣土生土長嘅FUN! JAPAN日藉員工「清水小姐（以下統一稱為「小編」）」為大家親自解說山梨縣不為人知嘅一面啦～
山梨縣明明唔近海…對壽司嘅愛竟然係日本第一？
日本雖然四面環海，卻擁有8個並非面向大海嘅縣，當中包括山梨縣。 （其他7個縣分別係栃木縣、群馬縣、埼玉縣、長野縣、岐阜縣、滋賀縣、奈良縣）。雖然小編出生於四面環山嘅山梨縣，直到中學為止都無見過大海，但係無海並唔代表無機會品嚐到好食嘅海鮮喔。
實際上，日本總務省2015年公布嘅「經濟普查」顯示，山梨縣內一共有255間壽司店（截至2014年）、而人口則有約84萬人（截至2014年）。以人口比例計算，山梨縣「平均每10萬人口就有30間壽司店（截至2014年）」，坐擁嘅壽司店數量係日本第一！（第2位係石川縣、第3位係東京都），因此山梨縣民亦被譽為「最愛海鮮嘅日本縣民」。
點解山梨縣既非面向大海亦無漁港，但壽司店就開到成行成市？其實山梨縣與駿河灣所在嘅靜岡縣相鄰，自古以來就有魚運到山梨縣。從交通運輸並唔發達嘅年代開始，喺駿河灣所捕獲嘅漁鮮就可以保持不腐爛嘅狀態下運到山梨縣，當中所使用嘅運送方法以及讓魚類保鮮嘅技術極高，因此即使山梨縣唔近海，從很早以前就可以喺日常生活中品嚐到海鮮。
原來山梨縣民係咁諗？富士山最佳觀賞地點係「山梨縣」
相信大家講起山梨縣，就好自然會聯想到富士山。富士山已經成為山梨縣名物一樣嘅存在，身為山梨縣民嘅小編，自細就睇住富士山大。（對於小編嚟講富士山已經係日常生活風景嘅一部分，每日都可以望到富士山係理所當然（笑））
點解「富士山」明明係橫跨於靜岡縣與山梨縣之間，但係大部分山梨縣民都會自信心爆棚地表示「從山梨縣欣賞富士山，比從靜岡縣欣賞到嘅富士山更靚」呢？
箇中原因請留意以下圖片紅圈位置。
呢張係從靜岡縣所拍攝嘅富士山相片，紅圈位置好明顯見到好大個凹陷位，係由於過去嘅火山噴發所形成嘅火山口；相反，從山梨縣欣賞到嘅富士山就唔會見到咁大個凹陷位，亦係山梨縣民主張「從山梨縣睇到嘅富士山更加靚」嘅原因。
原來山梨縣係虛有「梨」名…
因為「山梨縣」裡面有個「梨」字，所以有唔少人會誤以為山梨縣係梨嘅盛產地。事實上，當小編同其他非山梨縣民對話中提到「我係嚟自山梨縣」嘅時候，亦經常遇到「山梨縣嘅梨好出名㗎喎」等等嘅回應。但！其！實！根據日本農林水產省資料顯示，梨產量最多嘅都道府縣係千葉縣，前五名都無山梨縣份；換言之，山梨縣並非梨嘅盛產地。
咁山梨縣又點解叫做山梨縣呢？關於「山梨」呢個縣名由來眾說紛紜，其中之一係因為當地生長多棵名叫「山梨」嘅水果樹，因而名命為山梨縣。水果樹「山梨」雖然係梨嘅同類，但果實非常酸並不適宜食用喔。
講到山梨縣盛產嘅水果，相信唔少人都知道非提子與桃莫屬喇！
小編喺山梨縣亦識得唔少種桃與種提子嘅農家，一去到旺季，成日都會從相識嘅農家手上獲得免費水果， 亦因為咁由細到大都無用過一分一毫去買過提子，所以長大之後去到東京生活，見到店舖裡面賣緊嘅提子竟然係咁貴嘅時候，係極度驚訝喔。
原來山梨縣民對屋企人嘅愛係日本第一？
根據日本索尼生命保險公司於2021年實施嘅47個都道府縣縣民性調查結果顯示，山梨縣民對比其他縣民更加重視屋企人。
點解咁講？根據調查報告，日本索尼生命保險公司向各個都道府縣嘅縣民詢問「同屋企人相處時，會唔會願意駛錢消費？」，所得出嘅結果係37%山梨縣民嘅選擇係「會」，係47個都道府縣中百分比最高（順便講講最後一名係大阪府民，只有約18%人選擇「會」）。從以上調查結果得知，山梨縣民比起其他縣更捨得駛錢喺更重視同屋企人相處嘅時光，亦因此被認為對屋企人嘅愛係日本第一嘅縣民喔。
世界上最古老嘅旅館原來喺山梨縣！
日本山梨縣早川町嘅「西山溫泉 慶雲館」（にしやまおんせん けいうんかん）係世界上歷史最悠久嘅旅舘，至今已有1300多年歷史。
據聞於西元705年（慶雲2年），政治家・藤原鐮足（ふじわらの・かまたり）嘅長子藤原真人去到早川町時，發現當地溫泉正在湧出，因此創辦西山溫泉慶雲館。
想要出發前往慶雲館嘅話，就要喺山梨縣嘅主要車站「甲府站」搭電車同巴士，全程需時2小時以上。慶雲館位於寧靜嘅深山中，由古至今都受到唔少文人以及名人愛戴，更於2011年榮獲健力氏世界紀錄認可，正式成為世界上最古老嘅旅館。
喺慶雲館可以品嘗得到山梨縣內所飼養、特有和牛品種「甲州牛」，又或以醬油燉煮鮑魚，名為「煮貝」（にがい）等等山梨縣引以為豪嘅當地美食。
景點資訊
- 景點名稱：西山溫泉 慶雲館
- 地址：山梨縣南巨摩郡早川町湯島白澤83
- 交通方式
從甲府站出發：乘搭JR身延線「富士川號」特急列車至身延站，再從身延站搭巴士，喺西山溫泉落車。
※ 於身延站亦可以轉搭慶雲館嘅接送巴士（需要事先預約）
從新宿站出發：從新宿南口交通總站「Busta新宿」乘搭高速巴士到身延站，從身延站搭巴士或者慶雲館嘅接送巴士 - 住宿費用：價錢會根據住宿方案而各異，詳情請上官網確認（有提供中、英文介面可供選擇）
- 【日本47都道府縣特輯：京都篇】 千祈唔好輕易相信京都人嘅稱讚說話！？
- 【日本47都道府縣特輯：大阪篇】大阪每個家庭都有一部章魚燒機是常識吧！
- 【日本47都道府縣特輯：奈良篇】邊個話奈良只得鹿！
- 【日本47都道府縣特輯：福岡篇】福岡縣點解特別多靚仔靚女！？
- 【日本47都道府縣特輯：佐賀篇】買地就送森林 ！？
- 【日本47都道府縣特輯：鹿兒島篇】每日都要對抗火山爆發！？
- 【日本47都道府縣特輯：千葉篇】送俾重要嘅人嘅紀念品係「花生」
- 【日本47都道府縣特輯：愛知篇】咖啡店提供豪華級早餐！
- 【日本47都道府縣特輯：栃木篇】喺元旦新年食鯊魚係視為理所當然嘅事
- 【日本47都道府縣特輯：兵庫篇】兵庫縣縣民人人都憧憬神戶市
- 【日本47都道府縣特輯：熊本篇】「熊本熊」一年賺好多錢？
- 【日本47都道府縣特輯：長崎篇】當地美食係「土耳其飯」？
- 【日本47都道府縣特輯：群馬篇】全日本魅力度排行榜 經常爭包尾
- 【日本47都道府縣特輯：埼玉篇】眾多動漫作品嘅舞台所在
- 【日本47都道府縣特輯：神奈川篇】逃離東京、移居神奈川嘅日本人正激增中！？
- 【日本47都道府縣特輯：石川篇】石川縣皮膚好嘅女性人數係日本榜首？究竟「美肌第一縣」嘅秘密係…？
Comments