日本全國總共有47個都道府縣，每個地方都有獨特歷史、自然、文化，甚至生活方式，越深入了解絕對會覺得越有趣！「日本47都道府縣特輯」系列文章將介紹不為人知嘅當地人情風情，同埋常見旅遊介紹唔會講嘅冷知識或城市傳聞。上一集就介紹過最北嘅北海道，今次就嚟介紹日本最南嘅南國渡假村—沖繩縣！
慢條斯理個性 造就悠閒「沖繩時間」
沖繩縣同日本本島最大嘅分別，應該就係縣民嘅時間觀念。遲到超過30分鐘、甚至臨時失約「放飛機」，對沖繩人嚟講係非常普遍，亦唔會有人會因為咁樣而會道歉或者自責。沖繩人將呢一套獨特文化稱為「我家嘅時間」（UCINA—），喺琉球話入面就係「沖繩」嘅意思。
如果要行超過10分鐘以上，不如就搭的士啦？
巴士係沖繩縣內主要公共交通工具，雖然沖繩縣面積唔算大，但出於「天氣熱」、「怕曬黑」等各種理由，如果要行10分鐘以上嘅路，好多人都會選擇以車代步！
住喺沖繩但唔識游水？
沖繩四圍環海，可能各位讀者都會先入為主，有種「沖繩人一定識游水」嘅印象。但係，實際上沖繩縣民並唔擅長游水，更多人係對海根本無興趣。唔識游水嘅主要原因，係因為以前嘅學校好少有泳池，所以細過時無乜機會學游水…等等。雖然而家多咗小學設有泳池，但由於游水課程嘅規定時間依然比其他縣市少得多，所以其實都係唔擅長游水！
日本全國城市傳聞多不勝數，亦有好多「地區限定」嘅奇怪縣民習性。如果想要知道多啲其他縣民習性嘅話，歡迎留言畀我哋喔！
Comments