日本全國總共有47個都道府縣，每個地方都有相當多本地居民嘅獨特知識。由本地人對居住地自豪嘅地方、到必試嘅美食，每個地方都唔一樣。日本各地嘅縣民特色都強烈，一睇就知道係住喺邊個地區。對遊客而言，如果知道每個地區特色，咁以後去當地旅行時，絕對可以玩得更加有趣！「日本47都道府縣特輯」內，編輯部將會介紹有別於一般旅遊書上介紹嘅觀光形象，從風土民情到文化歷史，一一為您詳盡介紹各地特色！第一集，就由日本最北端嘅北海道開始啦！
地大物博，人人必備私家車！
對一般遊客而言，由於旅遊熱門地札幌市中心有電車同埋巴士行駛，所以令人誤以為喺北海道移動時唔太需用車，但咁就大錯特錯！如果離開札幌去到郊外或者其他小鎮嘅話，例如稚內、宗谷、知床等地，無車真係會非常唔方便。如果假日想去行街購物嘅話，由屋企去到商場超過60公里係常有嘅事！
移動距離往往以幾十公里起跳
數勻全日本，應該就只有北海道可以喺路上兜風而唔會遇上紅綠燈（一啲都唔誇張！），因此平時揸車時速達30公里、60公里係等閒事，由汽車導航提醒司機「前方道路限速80公里」亦非常常見。道央地區以外嘅地方由於道路網無咁發達，就算有高速公路，都不時會出現根據地形而需要繞路嘅情況，所以實際揸車會比睇GOOGLE地圖預測嘅時間長，例如由函館與札幌距離大約310公里，揸車就要花上約6個鐘！
北海道人無見過「小強」？！
由於北海道氣候寒冷，所以基本上唔適合「小強」存活，同日本其他地方相比，曱甴數量可以話係相當稀少。為此部分北海道人，尤其係土生土長嘅北海道人，同您講由細到大都無見過「小強」的話，係一啲都唔出奇！過去就曾經有日本電視台向北海道市民做個驗證，有人甚至因為無親眼見過「小強」，而唔知係咩「小強」係乜嘢樣呢。
北海道女生著高踭鞋都可以喺雪地入面健步如飛？！
喺北海道出售嘅鞋款，基本上都會喺鞋底加上防滑功能，而且高踭鞋鞋踭亦會被設計成可以插入雪或者冰，絕對比各位想像中易行得多。根據喺夜晚大街上著住高踭鞋招呼客人嘅姐姐們所講，喺雪地著高踭鞋係有一定秘訣，遊客記得切切模仿、以免受傷啊。
冰天雪地著短袖？！冬天室內反而比室外更暖！
北海道冬天往往畀人一種天寒地凍嘅印象，但只要行入室內，分分鐘係會熱到出汗！無論便利店定係百貨公司，基本上只要係室內地方都會將暖氣開到大一大，所以冬天期間北海道人喺屋企著短褲T恤‵、飲啤酒食雪糕嘅人比比皆是，甚至有人出門時會索性喺大褸入面著短袖衫呢！溫馨提示，呢種著衫方式只適合平時已經生活喺北海道嘅縣民，如果一般外地遊客著住短袖衫加大褸諗住去札幌雪祭嘅話，恐怕就會凍傷喇。
北海道人有一套對抗嚴冬嘅特別方法？
上文提到，北海道嚴冬期間，室內、公眾交通工具內都會開暖氣，室內外溫度差距相當大。出門時穿著厚厚嘅衣服保暖，入到室內後卻會因為暖氣而滿頭大汗，而呢個時候如果滿頭大汗就再外出，好容易就會惹上感冒！所以去到北海道旅行時，衣著方面記得最重要係可以隨住溫度變化調整嘅多層式著法。長時間喺室外活動嘅時候，記得要準備頸巾，唔好凍親條頸，亦要揀有防滑保暖嘅鞋或者雪靴。
春天名物唔單只有櫻花，仲有燒羊肉？
一提到北海道賞花行程，絕對不得不提燒羊肉（成吉思汗）！喺戶外生火燒羊肉，可謂北海道春天嘅最佳代表景點！當地人習慣會去到容許生火嘅公園，自攜烤爐同工具一邊賞花一邊食燒肉，而其中一處熱門聚腳地，就係五稜郭公園！如果提前預約嘅話，您仲可以選擇「賞花Package」，唔駛事前準備任何「架生」，即可以輕鬆享受一邊BBQ一邊賞花嘅樂趣！
Comments