喺日本，由於各都道府縣嘅差異、地理氣候條件等唔同，因此各地居民氣質同價值觀都會有所唔同。如果去旅行之前先認識當地嘅風土民情等當地常識，就可以旅行得更加順利！日本47都道府縣地城市傳聞一系列文章，將會為大家介紹有別於一般旅遊書嘅地道日本文化，帶你更貼地了解日本最真實一面！而今次要介紹嘅係，好受香港遊客歡迎嘅旅遊地區之一—九州福岡縣。
濱崎步、松田聖子、妻夫木聰…明星藝人輩出！
唔講唔知，原來出身自福岡縣嘅明星藝人係非常之多，由搞笑藝人（ 博多大吉、博多華丸）、歌手（濱崎步、椎名林檎、松田聖子）、偶像（前AKB48成員篠田麻里子）、漫畫家（《鬼滅之刃》作者吾峠呼世晴）、運動員（內村航平）到電影演員（山本美月、妻夫木聰、吉瀬美智子）等等，資歷由新人到大前輩都有。有人話係因為福岡人鍾意湊熱鬧，同埋鍾意出風頭，所以特別鍾意明星．追星，因此份外出產明星藝人！
福岡縣靚仔靚女特別多？！
福岡縣（特別係博多）因為出產美女而聞名，甚至有「博多美人」之說法。原因眾說紛云，其中一個比較有說服力嘅係：福岡自古以來與從大陸渡海而來嘅人互相交流頻繁，因此容易形成混血兒；而另一種說法則係，因為經常食用含有豐富骨膠原帶白嘅「內臟鍋」，所以皮膚特別好！
女人比男人強勢!?
福岡男性酒量好、鍾意節日熱鬧華麗、購物唔手軟，甚至會喺賭博方面花唔少錢，不過福岡男人並無「九州男兒」般嘅男子氣概形象，反而係外表睇上去溫和老實，又以「草食男」居多。
福岡女性則非常堅強能幹，即使係同有男子氣概或溫柔嘅男性相比都不相伯仲。此外，福岡女性亦普遍有較高包容力，經常可以見到能夠容忍男人遊手好閒嘅女性呢（笑）。
比起拉麵，其實比較鍾意烏冬？！
雖然福岡縣以「拉麵」印象深入民心，但實際上比起拉麵，福岡縣民其實更經常食烏冬！福岡縣內大約有1,000間烏冬舖，例如博多承天寺有一塊「烏龍麵起源地」石碑，據聞更係博多烏冬發源地呢。
博多係「希望被調派出差城市」No.1？！
日本人之間流傳一個講法，從東京被調派到福岡縣嘅上班族都會喊兩次。第一次係當收到人事異動通知時，因為「唔想離開東京」而喊；第二次則係當要返東京時，因為「唔想回到東京」而喊！背後原因，係因為福岡縣好食食物太多，環境又適合居住，生活多姿多采！難怪唔只日本人都想喺福岡定居，近年都有唔少香港人睇中福岡呢塊福地呢。
日本全國仲有更多有趣事，每個地方都有獨一無二嘅縣民性。敬請期待下回嘅縣民性格介紹！歡迎喺右邊留言欄分享您嘅感想。如果仲想知道更多其他縣民性格，歡迎踴躍留言喔～
Comments