日本北到北海道，南到沖繩，唔單止各地氣候唔太一樣，就連唔同地方居民嘅氣質、價值觀都會因為居住地區有唔同而唔一樣。排出嚟比較嘅話，就會發現由風俗習慣到當地特產美食，都如俗語話「各處鄉村各處」一樣，唔同地方嘅居民習慣都好明顯唔一樣。如果能夠先預習當地風土民情常識，無疑一定會有助旅程更加順利，而且會令你嘅旅程變得特別，可以了解到當地最真實最貼地嘅「風景」。今次「縣民性」呢系列文章，會同大家一齊嚟睇「鹿兒島縣」。
每日都要對抗火山爆發，卻好平靜
擁有活火山嘅櫻島，多嘅話，每年可以有1000次以上嘅火山爆發。有時甚至會噴發出超越2000米高嘅火山灰，新聞媒體都會多次報道緊張嘅情況。但係，當地居民卻總係一如平日嘅平靜，比起擔心火山爆發，佢地似乎比較擔心火山灰會沾到晾喺外面嘅衫上面。
櫻島嘅煙灰係生活嘅一部份
鹿兒島縣民有好多與火山灰有關嘅小常識。例如喺路上行都有可能因為踩到火山灰而跣倒。當氣象監測到當日嘅降灰量到達一定以上嘅級數時，役所會向派克灰袋畀居民，大家都要輪流當值去做掃火山灰任務。而外出時，火山灰亦好容易黏喺臉上面，真係名副其實嘅「灰臉」。所以鹿兒島縣民對櫻島上空嘅風向異常在意。垃圾分類除咗可燃同不可燃垃圾，仲會多咗一項叫「火山灰」。
縣民比較悠閒 無時間觀念
喺鹿兒島約定好嘅集合時間，喺等於從自家出門嘅時間。整體來講悠哉閒哉係呢度嘅縣民特性。就算係工作、買賣等牽涉到金錢嘅交易，即使蝕底咗，都只會話「哎呀、唔緊要」，呢種不拘小節嘅個性，令鹿兒島居民普偏唔係咁識做生意。
男性主義至上嘅社會
鹿兒島縣最常被批判嘅係，呢度嘅居民偏向支持男尊女卑嘅社會。仲會講話行出街嘅話，女生要行係男生嘅後一步。而有咩活動節日，例如盂蘭盆節、法事等婚喪喜慶、交際應酬等，往往都會分男性坐上位、女性坐下位。女性如果可坐喺男性身旁，通常就只係因為要放餸菜出嚟，同埋斟酒嘅時候。
男主外、女主內
雖然喺外面男尊女卑，但女性負責嘅工作，即係家務，鹿兒島嘅男性係完全唔可以插嘴。唔理嘢食煮得幾難食，鹿兒島男性都要毫無怨言咁食哂佢。就算老婆唔多會打掃，做老公嘅亦唔會指責，連小聲抱怨兩句都唔得。因為如果抱怨嘅話，會被話係婆媽嘅男人，令鹿兒島男嘅大丈夫形象一落千丈。
素麵消費量係全日本第一
鹿兒島縣民最鍾意食素麵。甚至可以將素麵加入味噌湯入面，又或者發明炒素麵嘅新料理，一年四季都隨時可以食素麵。有時候甚至會出現白飯配素麵咁樣嘅炭水化合物Ｘ炭水化合物嘅套餐。如果要送禮畀鹿兒島人而唔知送咩好時，素麵禮盒就係要安全嘅選擇。
呢啲講出嚟連日本國內居民亦都未必知道，其他地方縣市無法理解嘅獨特「縣民性」仲有好多！因為係系列連載，所以大家請期待一吓下期連載。可以喺右面評論留言小編知你嘅感想，或者你想知邊度嘅「縣民性」啊！
Comments