FUN! JAPAN 旅遊 旅遊小貼士

【日本文化】日本浸溫泉不可不知嘅禮儀小細節

# 當天來回, 一日遊 # 溫泉, SPA # 日本文化

日本係溫泉大國，溫泉地遍佈全國各地，數量更有成接近3,000個咁多！無論您去到邊，幾乎都可以遇上溫泉名所浸返個靚溫泉；但日本浸溫泉嘅流程與普通沖涼方式大不相同，遊客必須要遵守相關文化禮儀，以免丟架失禮喔。

日本嘅溫泉文化

日本國土位於斷層帶，擁有多個火山且地震與火山活動頻繁，因而造就數量龐大嘅日本溫泉誕生。據2021年日本環境省統計，日本有接近成3,000個溫泉，溫泉源泉數目約有2萬8千個，可謂幾乎處處都總有溫泉喺左近。

自古以來，日本民間就有流傳著多個關於神明或動物浸溫泉療傷嘅傳說，戰國武將特登前往溫泉休養嘅紀錄亦為數不少，間接演變為日後嘅「湯治」文化。

所謂「湯治」，即係溫泉療養，通常所需時間長達一星期以上。日本人深信根據溫泉成分不同，對特定疾病亦會有相當嘅療效。江戶時代期間湯治興起，農民會喺非農作時期進行湯治，舒緩全年間所累積落嚟嘅疲勞；明治時代溫泉療效獲得醫學研究證實之後，利用溫泉嘅人數亦變得更多。直至現時，日本溫泉已經成為放鬆、享受嘅代名詞。

日本溫泉嘅種類

由於成分不同，並非所有溫泉都帶有顏色或氣味。根據溫泉成分，日本溫泉協會將日本溫泉分成以下10種類：

  1. 單純溫泉，如岐阜縣「下呂溫泉」。
  2. 鹽化溫泉，如靜岡縣「熱海溫泉」。
  3. 碳酸水素鹽泉，如和歌山縣「川湯溫泉」。
  4. 硫酸鹽泉，如群馬縣「法師溫泉」。
  5. 二酸化炭素泉，如山形縣「肘折溫泉」。
  6. 含鐵泉，如兵庫縣「有馬溫泉」。
  7. 酸性泉，如秋田縣「玉川溫泉」。
  8. 含碘素泉，如東京都「前野原溫泉」。
  9. 硫磺泉，如栃木縣「日光湯元溫泉」。
  10. 放射能泉，如鳥取縣「三朝溫泉」。

享受溫泉嘅方法

想盡情地享受溫泉，溫泉住宿係大部分人心目中嘅最佳選擇，畢竟溫泉地通常都位於山區，交通比較不便，千里迢迢一場嚟到，就梗係想好好放鬆，浸多幾次溫泉至夠盡興嘛！日本溫泉住宿以古色古香嘅日式旅館，或提供高格調服務嘅酒店為主，價格普遍都比較高。因為當地入夜後甚少有餐廳營業，多數人會選擇於當日住宿嘅酒店內用餐，兩日一夜連早晚餐嘅旅行，1個人嘅費用超過1萬日幣係非常普遍。消費雖然比較高，但服務質素絕對係高水準。

若然只係想浸溫泉無打算過夜嘅話，可以選擇「即日來回溫泉」。同樣係去到溫泉地，但就純粹使用旅館嘅溫泉浴場，費用只需單次入浴費（平均約500～1,000日圓），浸完溫泉就會離開。好處係可以用實惠價錢享受旅館嘅溫泉設施，但使用時段會有所限制，並非所有旅館都會開放畀「即日來回」嘅客人入場，需要事先查清楚相關資訊再出發以免白行一趟喔。

除咗專程去到溫泉地之外，其實市區亦出現唔少溫泉大浴場設施，例如著名嘅「大江戶溫泉物語」，雖然叫做溫泉大浴場，但比較似係溫泉遊樂場，唔單止有浸溫泉嘅浴場，仲有各式餐飲、遊樂設施、按摩服務、大量漫畫雜誌，並提供休息區，可以閱讀、小睡片刻等等，等您可以喺裡面玩足成日兼無限次浸溫泉。呢一類溫泉設施嘅入場費大約落在1,500~2,000日圓之間，餐飲等服務另計，多元化又抵玩嘅空間，成為唔少人浸溫泉嘅新選擇。

日本浸溫泉注意事項

無論您係去到溫泉地，抑或係溫泉大浴場，浸溫泉嘅方式與規則都一樣，要注意以下事項，令您嘅溫泉之旅更盡興。

  1. 避免餐前、餐後與飲酒後馬上浸溫泉。若然喺想正餐前浸，要食少少嘢，避免空肚浸溫泉。
  2. 高齡者、小童或行動不便需要他人協助者，避免獨自浸溫泉。另外，由於場內地板濕滑，禁止奔跑。
  3. 先將身體徹底以沐浴露等等清洗乾淨之後再進入溫泉浴池。
  4. 進入溫泉浴池前先以少量溫泉水於肌膚上測試溫度之後再進入。
  5. 浸溫泉嘅時候保持安靜，出入溫泉浴池嘅時後亦要放輕動作。
  6. 毛巾唔可以浸入池水裡面。
  7. 浸完溫泉之後無需以清水沖洗身體，肌膚敏感嘅人除外。
  8. 浸完溫泉之後請補充水分。

有紋身可唔可以浸溫泉？

答案係可以，但係唔可以去多人共用嘅公共大浴場，必須使用「貸切個室溫泉」。

日本雖然無法律明文禁止紋身客人浸溫泉，但由於舊時嘅日本，有紋身嘅話多數係黑社會組織成員嘅一份子，至今呢個刻版印象仍然存在，無論您嘅紋身係大定細，為咗避免引發不必要嘅糾紛，擁有公共大浴場嘅溫泉旅館或酒店，都會標明拒絕有紋身者入場浸溫泉。

如果想於住宿設施裡面浸溫泉嘅話，必須另外租借「貸切個室溫泉」，意思指包場溫泉，喺包場底下除咗自己與同行人士，同場並無其他陌生人，自然唔洗承受其他人嘅異樣目光，服務人員亦唔會拒絕您入場浸溫泉。

若然係大江戶溫泉物語呢類型嘅溫泉設施，雖然禁止紋身客，但係隨著外國遊客逐漸增加，外國遊客對於紋身嘅觀念開放，唔少人身上都會有細細個紋身作藝術裝飾，因此越來越多設施主動提供膚色身體貼紙，等客人可以用嚟遮紋身。

關於混浴

男女置身於同一個溫泉浴池裡面浸溫泉，被稱為「混浴」，係日本獨特嘅文化，現時仍然保持混浴嘅溫泉設施大部分已經係300年前就已經開始經營，例如青森縣嘅酸湯溫泉。

混浴文化逐漸式微，除咗因爲近代男女有別嘅觀念，與法律明文禁止，最主要係因為有俗稱「鱷魚」嘅男性會潛伏於水中，靜靜雞接近女性，令女性心情感到唔多舒服。因此有多個地方雖係混浴，但大部分都只有男性會去喔。

為咗維護混浴文化，有部分地方開放女性客人穿著由店內提供嘅服飾浸溫泉，例如青森縣酸湯溫泉以及不老不死溫泉都有提供服裝。

相關文章

目錄

Comments

      預約你的行程

      Survey[問卷調查] 關於日本旅遊

      Recommend