面向太平洋嘅千葉縣銚子市，除咗係一個可以享受水上活動、品嚐美味壽司與海鮮嘅旅遊目的地，仲可以喺「犬吠埼溫泉鄉」一邊浸溫泉，一邊眺望眼前嘅無敵大海景。如果想盡情享受多姿多彩嘅銚子旅行，小編推薦你去返個兩日一夜之旅。由於呢度本身就有唔少遊客到訪，所以溫泉旅館等住宿設施亦非常充實。今次，小編會為大家介紹當地美食、特產、溫泉酒店、旅館等精選推薦，下個日本旅行，不妨享受返個銚子之旅吧！
銚子美食推介：海鮮、壽司
銚子有著日本數一數二嘅漁港，例如沙甸魚、吞拿魚、鰹魚等約200種近海魚嘅漁獲量位居日本第一嘅「銚子漁港」、銚子漁業發源地「外川漁港」等地方。特別係於外川漁港直接用手丟線所釣起嘅紅金目鯛魚，更命名為「銚子手釣紅金目鯛」，被定為千葉品牌水産物，係銚子必食嘅美食之一。
想盡情享受銚子新鮮捕獲嘅海鮮？咁就一定唔可以錯過位於「WOSSE 21」（ウオッセ21）內，名為「Seafood Restaurant WOSSE」（シーフードレストラン うおっせ）嘅海鮮餐廳喔！除咗可以品嚐到以新鮮魚貝類製作嘅海鮮丼飯等經典美食，仲有唔少別出心裁嘅創作料理，絕對可以令你大飽口福。
銚子美食推介：伊達卷
日本正月料理「御節料理」中不可缺少嘅「伊達卷」亦係銚子名產之一。不過，銚子嘅伊達卷有別於一般嘅伊達卷，並非以魚絞肉製作，而且不經過濾步驟，讓其保持著驚人嘅彈性之餘，仲好似布甸一樣咁滑溜，因此又被稱為「漁夫之布甸」。
想一試以上所介紹嘅伊達卷嘅話，就可以去設計出呢款伊達卷嘅店舖「大久保壽司」、以及「ADUMA壽司」（あづま寿司）等壽司店。「ADUMA壽司」對伊達卷嘅製作材料相當講究，係使用就算生食都好好味嘅雞蛋製作。去到銚子，記得要大嘆特嘆又甜又吸睛嘅伊達卷啦！
銚子美食、手信推介：濕仙貝
銚子代表性特產「濕仙貝（煎餅）」（ぬれ煎餅），係將烤好後熱騰騰嘅煎餅浸泡於醬油內所製作而成。「柏屋」係濕煎餅嘅創始店，先於1960年將濕煎餅作為贈品派發，後而開始作為商品發售。
銚子電鐵曾經一度陷入經營困難，幸得大量民眾購買濕仙貝而擺脫破產嘅局面。銚子電鐵亦因為呢件起死回生嘅奇蹟事件而廣為人知、聞名全國。另外，仲可以喺銚子電鐵嘅手信舖「濕仙貝站」，進行親手燒烤濕仙貝嘅體驗喔。
而為咗支援銚子電鐵而免費教授製作濕仙貝技術嘅店舖，係製作與銷售50款以上美味煎餅嘅「ISHIGAMI」（イシガミ）。另外，亦可以喺當地品嚐到唔同店舖所製作各具特色嘅濕仙貝。
銚子美食、手信推介：銚子哈蜜瓜
銚子嘅代表農作物之一，係稀有嘅銚子哈蜜瓜，其盛產期只有約1個月，為每年6至7月頭。唔單止果肉又厚又多汁，仲超級甜兼帶有入口融化嘅口感，令人一食就停唔到口。除咗新鮮嘅銚子哈蜜瓜之外，其加工食品種類亦相當豐富。
「銚子哈蜜瓜葡萄酒」（銚子メロンワイン）使用銚子哈蜜瓜製作，係一款味道清爽嘅葡萄酒。而使用呢款「銚子哈蜜瓜葡萄酒」醃漬2星期所製作出嘅「銚子哈蜜瓜蛋糕」（銚子メロンワインケーキ）亦堪稱絕品。除此之外，仲有加入銚子哈蜜瓜泥嘅「銚子哈蜜瓜饅頭」（銚子メロンまんじゅう）、飲得嘅蒟蒻啫喱「銚子NIMERONMERON」（銚子にめろんめろん」）等食品，一年四季都可以品嚐到銚子哈蜜瓜嘅好滋味。
銚子溫泉旅館推介：犬吠埼觀光酒店
「犬吠埼觀光酒店」全25個房間中，有21間房係可以眺望得到雄偉嘅太平洋景觀。溫泉浴池方面，計埋需要另外收費嘅包場溫泉在內，總共有8個溫泉浴池。當中，置身於展望溫泉「檜風呂」、露天溫泉「岩風呂」、歐式露天溫泉「OPIA」等設於沿海嘅露天溫泉，可以一邊浸溫泉睇靚景之餘，仲可以一邊享受海浪聲與海水香氣，可謂相當寫意。
推薦你入住可以望著一大片無敵大海景嘅寬敞日式客房，置身於和風嘅空間享受一個悠閒放鬆嘅好時光。除咗可以享用跟餐住宿方案中所提供嘅銚子當地特有海鮮之外，仲可以另外加單嗌醬煮「銚子手釣紅金目鯛」、房總嘅品牌牛「若潮牛」牛扒等。另外仲可以去酒店嘅賣店，有賣以最高品質海藻為原料所製作嘅健康「海草蒟蒻」等原創商品，可以揀返幾款當地特產返香港做手信喔。
景點資訊
- 名稱：犬吠埼觀光酒店
- 地址：千葉縣銚子市犬吠埼10293
- 交通：從銚子電鐵犬吠站徒步約8分鐘
- 官方網站：http://www.inubou.co.jp/
銚子溫泉旅館推介：別邸 海與森
「別邸 海與森」舊址為皇族所建造嘅別墅，全部房間都擁有海景景觀。置身於呢一片被大海、森林所包圍嘅廣闊土地上，可以欣賞到皇族喜愛嘅風光明媚景觀。客房酒店大樓，與6間分開嘅獨立房間「Villa瑞鶴莊」，共有32間客房。喺設計風格各異嘅「Villa瑞鶴莊」中，隨時都可以浸得到天然溫泉喔。
至於用餐方面，可以喺景色極佳嘅露天座位或能夠放鬆身心嘅獨立房間中享用。料理方面，可以品嚐到使用銚子特有嘅「銚子手釣紅金目鯛」、伊勢龍蝦等喺銚子新鮮捕獲嘅海鮮，同新鮮蔬菜等所製作嘅美食。酒店內有美容沙龍、露天茶座、圖書館休息室等，可以滿足房客喺住宿期間嘅各種需求。感覺有如昔日皇族一樣令人好想長期逗留嘅住宿。
景點資訊
- 名稱：別邸 海與森
- 地址：千葉縣銚子市犬吠埼10292-1
- 交通方式：從銚子電鐵犬吠站徒步約5分鐘
- 官方網站：http://www.umitomori.jp/
去銚子、犬吠埼嘅交通方式
從東京站乘搭JR總武本線 「潮騷號（しおさい）」特急列車到銚子站，需時約1小時50分鐘。從銚子站乘搭銚子電鐵到犬吠站，需時約20分鐘。另外，從東京站八重洲口乘搭高速巴士到犬吠埼的話，需時約2小時40分鐘。
Comments