或者大部分人會覺得「作為全球數一數二嘅旅遊城市，東京嘅溫泉數量肯定非常少啦！」。但其實，如果以每10平方km去計算使用溫泉水嘅公共浴場數量嘅話，東京嘅溫泉密度係全國47個都道府縣當中排名第4名（前3名分別係神奈川、大分、靜岡），而如果淨係計東京23區範圍嘅話，其溫泉密度更係日本第一！本篇文章會介紹，身處東京內就輕鬆嘆到嘅溫泉究竟有咩特色，以及溫泉設施推薦。
東京溫泉最多嘅地區係大田區！
計算溫泉數量嘅方式有好幾種，以溫泉地嘅數量去計算嘅話，北海道為全日本第一；但如果以密度去計算嘅話，東京23區則為全日本第一。截至2020年，東京溫泉總數量為114個，當中羽田機場所在嘅大田區，擁有嘅溫泉設施數量為最多，因此被美譽為「大田區溫泉鄉」。大田區大部分嘅溫泉錢湯都係喺第二次世界大戰嘅戰中、戰後期創業，並營運至今，可謂與大田區一齊走過一段悠長歲月。區內除咗有從朝早6點開始營業，亦有營業到深夜時分嘅溫泉設施，可謂非常方便、想浸就浸！
大田區有多個呈黑褐色嘅黑湯溫泉，極具特色。據聞黑湯溫泉具有溶解老廢角質嘅作用，浸完之後肌膚會變得光滑，因此亦被美譽為「美人之湯」。
除咗大田區以外，江戶川區、板橋區、世田谷區等地，亦屬於擁有比較多溫泉嘅區域。江戶川區更加係錢湯激戰區，東京都內最古老，於江戶時代1773年所創業嘅「あけぼの湯」，以及屬於第2古老嘅「鶴の湯」，兩者都係位於江戶川區。
編輯部嚴選！3個不同類別溫泉好去處
相信唔少人對於東京台場大江戶溫泉物語於2021年9月閉館呢個消息都感到相當遺憾。不過小編話畀大家知，其實東京都心內仲有其他唔少可以享受溫泉、浸浴嘅設施。今次，會向大家介紹以下3個不同類型嘅溫泉，當中有老字號錢湯、亦有充滿高級感嘅溫泉旅舘喔。
昭和4年創業，大田區代表性古老錢湯「改正湯」
昭和4年（1929年）創業嘅老字號錢湯「改正湯」裡面嘅泉水都係正宗黑湯，含有起源於古代植物嘅有機物溫泉，具有溶解肌膚嘅老化角質、令使肌膚變得光滑嘅效果。
喺黑湯裡面加入有促進血液循環效果嘅碳酸泉，就成為「黑湯碳酸泉」，亦即係「改正湯」只此一家嘅溫泉喔。碳酸泉具有舒緩循環系統疾病症狀、肩周炎、以及改善血液循環嘅功效。
「改正湯」另一大特色，係浴場裡設有水槽，可以見到五顏六色嘅魚游來游去相當療癒。
景點資訊
- 地址：東京都大田區西蒲田5-10-5
- 營業時間：15:00〜23:30
- 定休日：星期五
- 費用：大人（12歳以上） 500日圓／小學生 200日圓／學齡前幼兒 100日圓
- 官方網站：http://www.kaiseiyokujou.com/
擁有面積約3,000㎡大規模嘅溫泉浴設施：泉天空之湯 有明GARDEN
可以享受多個不同種類嘅浴池、岩盤浴等等嘅「泉天空之湯 有明GARDEN」內嘅露天溫泉天然溫泉水具有優良保濕力等功效，令人不禁期待全身浸完既天然又保濕嘅溫泉之後，肌膚會變得有幾滑溜喔。
場內亦有岩鹽、麥飯石、電氣石等等多款岩盤浴，可以喺度慢慢放鬆身體，享受天然礦石所帶嚟嘅療癒感。
酒店自家製嘅海鮮湯咖喱以及其他美食保證可以滿足覓食中嘅您。另外，Drink Counter亦有品提供喔。
浸完溫泉之後，記得再去埋去休息室放鬆身心。女性專用休息室「Mermaid Living」亦令女性客人不禁有瞬間化身為公主嘅感覺，可謂處處有驚喜。
景點資訊
- 地址：東京都江東區有明2丁目1−7 Mall & Spa5樓
- 營業時間： 施設營業時間 24時間營業（入場接待時間 05:00〜翌日01:00）
大浴場・桑拿05:00〜翌日01:30
岩盤浴08:00〜24:00（最終接待時間 23:30)
有明Kitchen・Drink Counter 11:30〜22:00（有明Kitchen 最後點餐時間21:30） - 費用：大人 平日2,200日圓，星期六、日、公眾假期2,800日圓／小童（4歲～小學生）全日1,300日圓
- 官方網站：https://www.shopping-sumitomo-rd.com/ariake/spa-izumi/
距離東京都心最近嘅溫泉旅舘：由緣別邸 代田
從東京都心地區出發，約10分鐘即可抵達猶如置身山村中嘅溫泉地旅舘「由緣別邸 代田」，擁有融合傳統日式美學與現代美嘅舒適客房，從房間更加可以欣賞得到日式庭院、以及充滿大自然感覺嘅綠油油景致，瀰漫著一股舒適平靜嘅氣息。
住客可以一邊浸露天溫泉，一邊眺望如畫般動人嘅日式庭園造景，相當寫意。不能不提其露天溫泉所使用嘅，係從箱根蘆之湖溫泉所運嚟嘅溫泉水喔。
至於美食方面，可以品嚐到由專精和食嘅廚師，利用日本全國嘅當季食材，再加上一顆真心去烹調出日本會席料理菜色。
景點資訊
- 地址：東京都世田谷區代田二丁目31番26號
- 營業時間：※即日來回嘅話，需要選擇配搭飲食嘅套餐方可浸溫泉
【上午時段】 平日 9:00～13:00（最終入場12:30)、星期六、日、公眾假期 09:00 ～14:00（最終入場13:30）
【下午時段】 全日 16:00～22:00（最終入場21:30） - 費用：溫泉即日來回＋茶寮（平日、不使用客房）￥2,850～
- 平均住宿費用：27,500日圓（以1人1室，純住宿場合計算）
- 官方網站：https://www.uds-hotels.com/yuenbettei/daita/#top
從東京約1小時即可抵達嘅溫泉地亦不可錯過！
由於東京都心嘅交通相當發達，因此要出發去一趟東京溫泉之旅亦非常方便。下次不妨離開東京，踏足埋鄰近縣區，趁機去個小旅行吧！
熱海（靜岡縣）
位於伊豆半島東邊嘅熱海，唔單止源泉湧出量豐富，更加係擁有超過500個源泉嘅溫泉度假村，可以享受得到鹽化物泉等多個泉質溫泉。因為近海又近山天然資源豐富，所以使用當地食材所製作嘅美食亦堪稱絕品。時機啱的話，仲可以體驗得到煙花大會、櫻花祭等豐富多彩活動呢。
從東京出發嘅交通方式
- 從東京站乘搭新幹線約40分鐘
相關文章
箱根（神奈川縣）
箱根嘅溫泉湧出量居於日本全國第5位。由於箱根火山持續活動，因此喺富有變化嘅火山地形中，湧出各種具特色嘅溫泉，當中泉質種類與功效更係種類繁多。箱根內除咗有雄偉嘅大自然、美術館、仲有破火山口湖等多個精彩景點。
從東京出發嘅交通方式
- 從東京站搭到去小田原站，再換乘新幹線及JR約1小時10分鐘
相關文章
河口湖（山梨縣）
河口湖嘅溫泉於1994年開湯，係距離富士山最近嘅溫泉地。硫酸鹽泉有效舒緩神經痛及肌肉痛等功效，遊客喺度可以邊浸溫泉邊欣賞隨時間與季節變化嘅富士山，難怪成為一大人氣溫泉地。另外，你仲可以享受湖邊休閒活動、以及順路去埋附近遊樂園大玩特玩喔。
從東京出發嘅交通方式
- 從JR東京站乘搭JR約2小時20分鐘
Comments