【日本鳥取】去浸入選「2021溫泉總選舉」嘅高質溫泉吧！島取縣必去溫泉地3選＆必住旅舘推介

山陰地區除咗擁有鳥取砂丘、大山等眾多名勝，仲係多個著名溫泉嘅所在地，當中更加有3個溫泉地入選「2021溫泉總選舉」！

鳥取位於中國地方東北部，從大阪搭JR出發約2個半小時、或從福岡出發約3個半小時即可抵達。無論係風光明媚嘅溫泉勝地，抑或係從鳥取站徒步約5分鐘即可抵達擁有5大溫泉嘅「いなば溫泉鄉」等等，充滿魅力嘅溫泉通通滿載於鳥取！今次，編輯部會向大家介紹絕對不容錯過嘅溫泉勝地以及住宿推介喔～

東伯郡・三朝溫泉

三朝溫泉嘅歷史可追溯至約850年以前，與三德山一同獲認證為日本遺產主要構成文化財之一。當地流傳著一個關於武士與白狼嘅故事，傳說中有位武士原本想要射殺白狼，但最後打消念頭並決定放過白狼一命後，妙見菩薩就出現喺武士夢中，話畀武士知呢個溫泉嘅所在地。

三朝泉質最大特色係世界數一數二高濃度氡元素含量嘅放射能泉，透過「毒物興奮效應」（即少量放射線有益健康），有效提高人體免疫力與自癒力。根據調查結果顯示，該地區嘅居民於37年間，癌症死亡率約為日本全國平均2分之1，就知泉水功效並非浪得虛名！

除咗可以嘆返個溫泉消除日常疲勞之外，漫步於懷舊老街、參觀建於三德山懸崖峭壁凹陷處嘅國寶「投入堂」、購買加入源泉所製作嘅溫泉護膚品等行程都相當受歡迎。三朝溫泉係一個能夠感受歷史，與療癒身心嘅溫泉喔。

創業於1868年、被指定為國家登錄有形文化財嘅木屋旅舘，其有如迷宮般嘅走廊，讓人不禁有一種進入逃離日常世界嘅感覺。

呢度除咗有「浸」得嘅溫泉池，仲有透過「呼吸」、將霧狀溫泉「吸」入體內嘅溫泉池等好幾種唔同類型嘅溫泉池。

至於菜式方面，除咗可以品嚐到鳥取和牛嘅「鳥取和牛會席方案」之外，仲有可以品嚐到以當季兼當地食材所烹調嘅美食。喺度唔單止可以嘆返個美食、浸返個靚溫泉，仲可以享受一個既放鬆，為您嘅旅程叉足電嘅好時光。

位於米子市北面嘅皆生溫泉，面向日本海，坐擁大自然美景，更被選為「日本海濱百選」、「日本白砂青松百選」、「日本夕陽・朝日百選」等，當中亦有海灘被選定為具安全且擁有優良水質認可嘅「日本海水浴場88選」。下個旅程，不妨喺沙灘上享受一個海水浴嘅美好時光吧。

皆生溫泉泉質屬於鈉・鈣氯化物泉，亦即係所謂嘅「鹽溫泉」，具有改善神經痛、風濕病、慢性皮膚病、慢性婦女疾病等療效。另外，源自歐洲嘅「海洋療法」，亦可以喺皆生溫泉體驗得到。

除咗嘆溫泉之外，附近都有唔少特色景點！例如祈求長壽與家庭圓滿嘅人氣神社一皆生溫泉神社、海岸邊嘅皆生海濱公園浸足湯、皆生海水浴場等等。另外，自駕出發約30分鐘，即可以抵達好似妖怪樂園一樣嘅境港，與人氣妖怪漫畫中嘅角色們相遇。

皆生游月所有客房都保證坐擁海景，環境洋溢一股濃厚度假感。館內享受溫泉嘅方式有兩種，第一種係享受所有客房都設有嘅露天溫泉。

第2種就係享受池面與海面相融、位於7樓嘅「Infinity天空露天溫泉風呂」。風呂曾經喺經濟相關嘅紙媒排行榜中，作為「絕景露天溫泉」獲得第2名好評，可見其絕美景觀溫泉有幾咁迷人。

喺菜式方面，住客可以品嚐得到喺境港捕獲嘅新鮮魚貝類，以及鳥取縣產黑毛和牛等等嘅食材所製作嘅日式美食。優越服務以及頂級享受兼備，保證可以為大家送上一個特別美好時光。

東鄉溫泉係山陰八景之一，位於縣立自然公園內、東鄉湖嘅南岸湖畔。據聞東鄉溫泉嘅歷史，可追溯至1872年江戶時代，當時溫泉從湖中湧出，並於湖畔發現源泉，其後就建造名為「養生館」嘅別墅並開放畀當地人使用，繼而成為東鄉溫泉嘅起源。順帶一提，現時「養生館」仍然作為旅館營業中喔。

相傳喺發現溫泉嘅傳說中，此地亦被稱為「戀之湯」，喺年輕情侶當中亦相當受歡迎。泉泉屬氯化物・硫酸鹽泉，主要功效為可治療神經痛、肌肉痛、關節痛、五十肩等。

附近仲有溫泉浴設施，以及可以一邊眺望美景，一邊散步嘅路徑等等。另外，喺夏天嘅水鄉祭，仲可以欣賞得到點綴夜空嘅湖上煙花大會，盡享不一樣嘅旅遊樂趣。

湖泉閣養生館從發現源泉開始就紮根於此地。住客除咗可以置身於露天大浴場裡面，一邊浸溫泉、一邊吹著舒服嘅涼風，仲可以喺設有一大片玻璃嘅大浴場內，一邊嘆溫泉，一邊欣賞動人景致。

喺男湯可以飽覽得到東鄉湖，以及主題樂園一中國庭園燕趙園；喺女湯則可以眺望得到有成6,000坪咁大嘅日本庭園。

3個溫泉嘅包場服務都係屬於預約制，仲未習慣同人「坦誠相見」嘅話，包場溫泉服務會令您浸得更輕鬆無顧慮。值得一提嘅係，2022年4月重新開幕嘅「風樹之湯」（需收費）更與湖泊融為一體，夠晒特別！

所有客房都係可以感受得到濃厚日本風情嘅日式房間，面積亦非常寬敞。另外，菜式方面亦堪稱絕品，係一間享受溫泉樂趣之餘，仲可以欣賞自然美景及美食嘅旅館喔。