位於本州中國地方北部嘅島根縣，從大阪或福岡搭飛機約1小時左右即可抵達。縣內擁有出雲大社、松江城等等多個旅遊名勝，當中不得不提有「結緣聖地」之稱嘅出雲市內，隱藏著唔少可以嘆溫泉嘅好地方。下個旅程不妨根據個人喜好，選擇附設溫泉嘅住宿，又或者即日來回嘅溫泉設施享受最頂級療癒！如果您想嘆溫泉之餘享受埋美食嘅話，仲可以選擇跟餐嘅溫泉行程喔。即刻睇睇小編有咩精選推介啦！
松江市・玉造溫泉
玉造溫泉係日本最古老嘅溫泉之一。早自西元733年編纂嘅「出雲國風土記」中，就有記述「此泉浸一次可美容，浸兩次則可治百病」，亦被稱為「神之湯」。玉造溫泉嘅泉質係屬於硫酸鹽泉，除咗泉水本身就有如天然化妝水般一樣嘅美肌效果之外，仲具有淡疤、改善寒症等功效呢。
住宿旅舘、足湯、食堂、手信販賣店等等多間店舖林立嘅溫泉街當中，位於湯藥師廣場嘅「たらい湯」係絕不可錯過嘅精彩位。因為「たらい湯」係一個可以自由汲取玉造溫泉水嘅地方，所以相當受歡迎喔！出發前唔記得帶容器點算好？貼心地現場有販售空樽，就算兩手空空都可以將溫泉水帶走。歡迎留言同小編開心Share返大家嘅美肌效果喔。
景點資訊
- 地址：島根縣松江市玉湯町玉造
- 交通方式：從鳥取機場搭巴士，去到JR玉造溫泉站約30分鐘
- 官方網站：https://tamayado.com/
一生必住一次嘅旅館！「星野集團 界 玉造（舊稱：界 出雲）」
「星野集團 界 玉造（以下, 界 玉造）」內所有客房都配備專屬露天溫泉。寬敞嘅傳統日式設計客房內，設有檜木或信樂燒溫泉浴池，讓住客更添浸溫泉樂趣。另外，小編亦推薦備有仿照出雲大社模樣設計而成嘅湯口嘅大浴場，不妨試試喔。
入住「界 玉造」，您可以多元化地體驗當地嘅非凡魅力，美食亦屬其中一環。無論係使用蜆貝所烹煮嘅「蜆貝牛肉涮涮鍋」，抑或係出自「界 玉造」獨創烹調方式所準備嘅「奉書蒸」等會席料理中嘅名菜，都讓人充分品嚐得到屬於出雲嘅好味道。另外，住客仲可以欣賞得到以生動嘅舞蹈去展現出雲神話經典一幕嘅傳統藝能「石見神樂」，「界 玉造」保證係一個可以用多角度去感受到出雲特色嘅住宿好地方！
景點資訊
- 名稱：星野集團 界 玉造
- 地址：島根縣松江市玉湯町玉造1237
- 交通方式：從JR玉造溫泉站揸車約5分鐘
- 平均住宿費：住1晚連2餐/成人每位41,000日圓〜
- 官方網站：https://www.hoshinoresorts.com/ch/resortsandhotels/kai/tamatsukuri.html
太田市・溫泉津溫泉
獲認證為世界遺產石見銀山其一部分嘅溫泉津溫泉擁有約1,300年歷史。有關溫泉津溫泉嘅由來，傳說係有位旅途中嘅僧人，曾經喺到遇見一隻浸溫泉療傷嘅狸貓因而得名。溫泉津溫泉泉水自古以來對多種病症均有治癒功效，對於慢性疾病（又稱生活習慣病）、神經痛、類風濕、關節炎，及舒緩壓力等都甚有效果喔。
除咗溫泉，古色古香嘅老街以及每個星期六晚都會演出嘅傳統藝能一石見神樂嘅舞蹈表演亦不容錯過。
景點資訊
- 名稱：溫泉津溫泉
- 地址：島根縣大田市溫泉津町溫泉津
- 交通方式：從溫泉津站徒步約10分鐘
- 官方網站：https://www2.crosstalk.or.jp/yunotsu/yunotsuonsen.html
至少要浸一次嘅溫泉！「藥師湯」
藥師湯喺日本溫泉協會審查中，全項目都獲得「全A」最高評價嘅珍貴天然溫泉。溫泉富含豐富美肌成分如碳酸、硅酸等礦物質，獲溫泉品評師評價為「雙重美肌溫泉」。
溫泉結晶有如熔岩一樣附著喺溫泉場內嘅地板，可見自然湧出嘅泉源，其泉質係幾咁天然！另外，曾於大學院醫學部進行溫泉研究嘅老闆，為咗讓溫泉功效更加分，提出一項建議，就係浸完溫泉後要保持放鬆，以及進行健康飲食。
浸完溫泉要去邊度食嘢好？推薦您去溫泉津現存最古老嘅溫泉設施，建於大正時代嘅木造西式建築內嘅「カフェ内蔵丞」（Café 內藏丞）喔。令人難以置信嘅係，呢座古老建築嘅天花板部分，竟然係1粒釘都無用到喔！浸完溫泉，喺度一邊欣賞懷舊老街，一邊嘆美食真係相當寫意！
除咗可以品嚐得到流傳於石見銀山創業者之間嘅歷史深厚美食之外，仲可以品嚐得到以當地食材烹調嘅健康菜式。（※過敏、素食者應對需另外諮詢）
景點資訊
- 名稱：藥師湯
- 地址：島根縣大田市溫泉津町溫泉津7
- 費用：普通溫泉：成人500日圓/小童200日圓
- 溫泉個室：藥師溫泉（40分鐘）成人800日圓。小童300日圓。別館（40分鐘）成人1,200日圓。小童500日圓。
- 官方網站：https://www.yunotsu.com/
歡迎即日來回！出雲市・「いずも縁結び温泉ゆらり」
いずも縁結び温泉ゆらり（出雲結緣溫泉Yurari）係日本中國地方裡面，擁有最大型天然源泉流動式嘅即日來回溫泉設施。源泉地設置於地下1,400米，每分鐘湧出嘅泉量多達200L以上，源泉擁有相當豐富嘅泉水。
設施佈可供選擇嘅溫泉種類相當豐富，例如有約50坪大、以岩石建造，仿如日本庭園一樣嘅露天溫泉、一人專用嘅木製「樽溫泉」或陶器「瓶溫泉」，以及室內溫泉池與遠紅外線桑拿房，可以悠閒地放鬆一番。泉質屬於鹼性單純泉，除咗有美肌效果，亦對腸胃病、神經痛、寒症等各種症狀均有療效。推薦喺晚上時間，邊浸露天溫泉，邊賞星賞月！另外，場內亦有享用美食嘅用餐處及休息空間，浸完溫泉仲可以順便醫肚，享受一個愉快嘅溫泉之旅。
景點資訊
- 名稱：出雲結緣溫泉Yurari
- 地址：島根縣出雲市平田町7178
- 費用：
【平日】成人（一般）・中學生以上：700日圓、長者（65歲以上）：600日圓、4歲～小學生：350日圓
【六・日・公眾假期】成人（一般）・中學生以上：800日圓、長者（65歲以上）：600日圓、4歲～小學生：400日圓
（3歲以下免費） - 官方網站：http://yurari-izumo.jp/
Comments