之前喺大阪溫泉區的文章中，曾經介紹過於2019年開業，以安土桃山時代為設計概念所建造嘅「空庭溫泉（そらにわおんせん）」係關西最大嘅溫泉主題樂園。今次我哋將會深入發掘更多，為大家介紹呢個位於大阪灣地區嘅溫泉設施有幾魅力沒法擋，相信您亦會深深被其魅力所吸引喔！
空庭溫泉魅力・必睇位①：9種不同風呂＆温泉
空庭溫泉最大嘅魅力莫過於，被譽為關西地區最大規模嘅溫泉主題樂園入面嘅各種風呂浴池。而且呢度嘅溫泉水，係使用從地底1000m湧出嘅弱鹼性天然溫泉「美肌之湯」。您可以盡享6種不同溫泉、桑拿、冷水浴等等，總共9種不同嘅風呂浴池。
首先要同大家推薦嘅係，可以飽覽1,000坪廣闊日式庭園嘅無邊際浴池「庭見風呂」，亦係空庭溫泉裡而最出名嘅浴池喔！浸浴時可以透過大型玻璃窗，飽覽日本庭園美景，既吸睛又療癒。由於玻璃窗為單向玻璃，所以唔使擔心從庭園會望到浴池裡面嘅景況，大可放心浸個靚溫泉喔！
空庭溫泉擁有各種不同特色嘅溫泉，亦有浸完可以恢復體力嘅浴池。當中「源泉風呂」更加係原原本本地從地底1,000m吸取源泉掛流式溫泉。踏入以岩石作佈置嘅「露天風呂」內，會令人有置身於溫泉旅館嘅感覺，除此以外，呢度仲有一個可以瞓著浸嘅低溫天然溫泉「寢湯」喔。
※只能赤裸進入浴池。請不要於浴池內使用泳衣或毛巾。
跟著落嚟要向大家推薦嘅係，會發出如絲綢般細滑氣泡嘅「絲綢風呂」，和高濃度碳酸以促進血液循環嘅「碳酸風呂」。另外，於「交替風呂」中則有松木風呂、草莓風呂、櫻花風呂等多種不同類型嘅風呂，等您喺不同季節都可以享受得到各種不同香氣，同時獲得香薰嘅療癒效果。
除此之外，仲有桑拿、冷水浴、專為女性而設嘅水霧桑拿等等，喺空庭溫泉裡面玩一日，就好似去咗一場溫泉巡禮咁，非常充實！想要喺私人空間裡面嘆溫泉嘅話，呢度亦有提供多個只提供溫泉浸浴嘅包場露天風呂。設施亦提供10間可供完全包場、附帶小庭園嘅源泉掛流式溫泉露天風呂，等您可以擁有好似入住溫泉旅館一樣能放鬆身心嘅療癒體驗。
空庭溫泉魅力・必睇位②：日式庭園＆千本鳥居＆足湯
另外，空庭溫泉嘅屋頂處有一個約有1,000坪嘅巨大日式庭園，亦係必睇位之一。除咗可以著住入館時所挑選嘅浴衣喺度隨意漫步，仲可以去浸超廣闊嘅「足湯」，享受一邊浸腳足浴一邊睇庭園美景。日頭可以邊賞庭園花草邊浸足湯，夜晚可以欣賞由柔和燈光所營造嘅夢幻景致，大嘆特嘆不一樣氛圍嘅足湯。
喺足湯附近，仲有一個可以體驗「魚療」嘅角落。當您將雙腳浸喺水入面，會有魚仔幫您慢慢去除老舊角質，輕微嘅刺激感既舒服又過癮，據聞具有護理皮膚和療癒身心的功效喔。
屋頂嘅最高處仲一個「水洗弁天宮」，供奉著一尊由佛師雕刻嘅水洗弁天像，從神社仲可以眺望成個庭園，絕對係打卡影靚相嘅人氣景點。
另一個極受歡迎嘅打卡影相勝地，就係水洗弁天宮參拜入口前嘅赤紅千本鳥居。當您穿過呢條紅色千本鳥居隧道，就好似瞬間從現實世界通往神靈世界一樣，此情此景令人一見難忘。呢度擁有如此神秘又夢幻嘅氛圍，難怪會吸引著無數人想要親身前往，感受箇中魅力。嚟到想影張自拍照留倩影，又怕搵唔啱最佳攝影角度？唔使擔心！呢度好貼心地為大家提供一部自動相機，等您可以影低以鳥居為背景嘅打卡相。呢個服務唔單止係免費，仲可以即刻Download啱啱影完嘅靚相喔！相信呢張相將會成為您今日嘅最佳作品。
想一邊欣賞美麗庭園風景，一邊飲飲食食嘆個靚茶？呢度亦有Café可以滿足您以上嘅願望！置身於此日本庭園，絕對可以令您忘卻時間流逝、兼盡情放鬆喔。
空庭溫泉魅力・必睇位③：毎日都可以體驗日本傳統文化嘅遊戲攤位
空庭溫泉嘅設計理念來自於安土桃山時代（約1568至1600年）曾為日本一大城市嘅大阪。成個館內重現古代美好時光嘅同時，亦融合唔少現代氣息，令人不禁會有彷如置身於另一世界嘅感覺。 尤其係手信特產店舖、餐廳林立嘅主要街道「弁天通」，其熱鬧氣氛會令人相當興奮。
講到日本傳統文化中嘅祭典活動，就不得不提各種遊戲攤位。喺遊戲攤位專區，可以體驗軟木塞槍、撈金魚、套圈圈和手裡劍等古早味濃嘅兒童遊戲。除此之外，於弁天通仲可以欣賞得到魔術表演、雜技表演和紙戲表演等等，各種根據季節而變換嘅活動，等您彷如置身於異世界般、盡情享受日常不同嘅體驗。
空庭溫泉魅力・必睇位④：大阪當地美食及超吸睛攤位美食應有盡有
沿著弁天通設置嘅餐廳區，仲可以品嚐得到從安土桃山時代穿越時空，嚟到呢個小鎮嘅廚師為大家烹煮美食（請發揮一下想像力吧！）。此處有多間提供正宗嘅日本美食、居酒屋、大阪當地美食嘅餐廳，記得要去行個圈覓食啦。
喺「空庭屋台」仲可以品嚐得到多款日本祭典活動中必食嘅士多啤梨冰糖葫蘆、朱古力香蕉等，既色彩繽紛又吸睛嘅攤位美食。食飽飲夠之後，再喺休息區悠閒放鬆一番，又可以返去溫泉區繼續浸溫泉啦。
空庭溫泉真係一個，可以令您玩足成日都唔厭嘅溫泉主題樂園喔！
空庭溫泉
- 地址：大阪府大阪市港區弁天1丁目2-3
- 營業時間：11:00～23:00（最後入館時間 22:00）
- 收費：
【平日】大人2,640日圓、小童1,320日圓
【星期六、日、假日】大人2,860日圓、小童1,430日圓
※需另外收取大阪市入湯稅 - 官方網站：https://solaniwa.com/en-us/
Comments