北海道唔單止係美食寶庫，仲有多個備受遊客歡迎嘅旅遊景點、滑雪場以及座落於北海道各地嘅溫泉。除咗有面向大海與湖泊嘅溫泉、恬靜嘅山間溫泉，仲有可以一邊眺望雄偉景色嘅設施等各不相同嘅場所與泉質。本篇文章將會介紹北海道10個溫泉地，總有一處啱您心水！
1．湯之川溫泉
「湯之川溫泉」位於北海道西南部嘅函館市，泉質為鹽化物泉。由於距離函館市區非常近，地理位置相當優越，稱得上係最適合作為旅遊據點嘅溫泉街。湯之川溫泉以擁有豐富溫泉水量見稱，其程度多到即使只係想挖掘井水，都會湧出大量溫泉水！順帶一提，當地亦流傳著自幼疾病纏身嘅江戶時代第九代藩主因湯之川溫泉而痊癒嘅故事。
交通方式
- 從函館機場乘搭Shuttle Bus約5分鐘
- 從JR函館站前乘搭巴士約25分鐘
湯之川溫泉附近推薦旅遊景點為「函館市熱帶植物園」。您可以喺度遇見日本獼猴悠哉地浸溫泉，望落相當寫意嘅萌樣喔。
函館市熱帶植物園
- 地址：北海道函館市湯川町3-1-15
- 營業時間：（4月～10月）9:30～18:00、（11月～3月）9:30～16:30
- 入園費用：中小學生100日圓，一般300日圓
- HP：https://hako-eco.com/
2．洞爺湖溫泉
「洞爺湖溫泉」係位於北海道西南部洞爺湖南岸嘅風光明媚溫泉地區，其泉質屬鹽化物泉。湖畔附近唔單止有酒店，仲有足湯、手湯等，擁薦可以喺沿路漫步時順便沿途浸個夠本。喺眾多旅遊與街頭散步景點之中，不得不提湯前藥師如來堂內嘅「繪馬神籤」。將繪馬神籤放入熱水嘅話，占卜結果就會漸漸出現！下次不妨出發去一趟呢個流傳著龍神傳說嘅能量景點，求返個與眾不同嘅繪馬神籤吧！
交通方式
- 從新千歲機場到JR洞爺站，乘搭JR與巴士約1小時50分鐘
- 從JR札幌站到洞爺湖溫泉，乘搭巴士約2小時45分鐘
3．登別溫泉
「登別溫泉」係位於北海道西南部嘅北海道代表溫泉地之一。其泉質有酸性泉、硫磺泉（硫化氫溫泉型）、含鐵泉、炭酸水素鹽泉、硫酸鹽泉等，泉質種類相當豐富，因此被稱為可以享受10種溫泉嘅「溫泉之百貨商店」。其最大泉源係「地獄谷」，谷底直徑約450m，並擁有包括大地獄等15個「地獄」，每分鐘湧出3,000L嘅溫泉水。喺日本國內可以喺單一地方一次過享受到10種溫泉嘅溫泉地並不多，所以非常值得去朝聖喔。
交通方式
- 從新千歲機場乘搭高速巴士約1小時15分鐘（需要預約）
- 從札幌乘搭高速巴士約1小時20分鐘（需要預約）
相關文章
4．定山溪溫泉
「定山溪溫泉」位於北海道縣廳所在地－札幌嘅西南方，沿著綠意盎然嘅溪谷附近林立多個溫泉設施與酒店。當地溫泉與溪谷之美優美景色，更令定山溪溫泉獲得「「札幌奧座敷」美譽。其泉質為鹽化物泉，泉源多達56處，當中大部分都集中喺豐平川嘅月見橋以及高山橋附近。溫泉水量豐富嘅程度，甚至誇張到源泉從河岸與河底嘅岩盤裂縫中都會自然湧出！可謂一個可以一邊感受雄偉嘅大自然，一邊享受溫泉嘅溫泉地。
交通方式
- 從JR札幌站乘搭巴士約75分鐘
- 從新千歲機場乘搭直達巴士約100分鐘
相關文章
5．二世古溫泉
位於北海道道央西部嘅「二世古温泉」，係指位於二世古町、俱知安町與蘭越町嘅溫泉總稱。溫泉鄉內有多個溫泉，當中二世古昆布溫泉與二世古五色溫泉屬於鹽氯化物泉、二世古湯本溫泉屬於硫磺泉，而二世古新見溫泉屬於硫酸鹽泉，並非每個溫泉泉質都一樣。編輯部提提各位，記得要買埋「二世古溫泉周遊券（Niseko Hot Spring's Pss）」，以優惠價錢盡享溫泉度假村之旅！
交通方式
- 從札幌乘搭JR約2小時15分鐘
- 從新千歲機場乘搭JR約2小時45分鐘
6．十勝川溫泉
位於北海道東部十勝平野中央嘅「十勝川溫泉」擁有起源於日本罕見嘅太古植物，並富含大量植物性有機物質嘅MOOR溫泉。由於比起一般礦物性溫泉，十勝川溫泉有別於其他溫泉地、屬於稀有泉源，因此更被選定為北海道資產。泉質為單純溫泉，浸後肌膚觸感嫰滑，係一個具美肌功效嘅溫泉喔。
交通方式
- 從JR札幌站乘搭JR與巴士約3小時30分鐘
- 從新千歲機場乘搭JR與巴士約2小時30分鐘
7．阿寒湖溫泉
位於北海道東部、棲息著蝦夷鹿與北海道赤狐等多種野生動物嘅「阿寒湖溫泉」泉質為單純溫泉。原住民愛奴人(又稱為愛努人、阿伊努人) 於1850年代，就已經開始使用此溫泉。湖畔附近有好幾間旅舘，喺度唔單止可以享受被湖泊、雌阿寒岳、雄阿寒岳等雄偉大自然所包圍嘅體驗，仲可以與此同時嘆返個溫泉，相當療癒。推薦畀想要出發一趟愛奴歷史文化之旅嘅您喔。
交通方式
- 從釧路機場乘搭巴士約1小時10分鐘
- 從JR札幌站乘搭JR和巴士約5小時10分鐘
8．川湯溫泉
位於北海道東北部嘅「川湯溫泉」，源泉係至今仍作為活火山活動嘅Atosanupuri（硫磺山），泉質屬硫磺泉。泉水嘅強勁酸性，甚至可以喺一個禮拜內將大釘溶解！造雖如此，泉水對多種疾病都有舒緩功效，因此自古以來就已經成為人們喜愛嘅藥湯。因為豐富嘅溫泉水量，令溫泉街四周都彌漫著濃濃嘅硫磺氣味，以及白色嘅煙霧迷離。除咗可以享受森林浴，冬天樹木亦會起霧冰，係一個可以同時享受溫泉與夢幻景色嘅溫泉地。
交通方式
- 從丹頂釧路國際機場、女滿別機場、根室中標津機場3個機場，揸車約1個半小時
- 從JR川湯溫泉站乘搭巴士約10分鐘
相關文章
9．層雲峽溫泉
位於北海道中央部、環抱優美溪谷嘅「層雲峽溫泉」，係北海道著名嘅風景勝地。除咗有高600米以上、長達24km嘅懸崖峭壁，以及秋天被染上紅黃色樹木美景，仲有由「銀河瀑布」以及「流星瀑布」等名瀑所創造嘅大自然景觀亦令人歎為觀止。層雲峽溫泉嘅泉質為硫磺泉，並擁有好幾個源泉，每個溫泉嘅顏色、香味、溫度都各不一樣。當地亦有提供多個不同溫泉源泉嘅旅舘，除咗留宿一晚以外，就算即日來回都可以享受浸溫泉嘅樂趣。
交通方式
- 從旭川機場乘搭巴士約2小時40分鐘
- 從JR札幌站換乘巴士約3小時25分鐘
10．宇登呂溫泉（知床溫泉）
「宇登呂溫泉」亦稱為知床溫泉，位於突出於北海道東部，鄂霍次克海嘅知床半島高地位置嘅溫泉地。正因為位於堪察加到千島列島、知床半島嘅千島火山地帶，先至會有大量嘅優質溫泉水湧出。其泉質為鹽化物泉，濁湯有助令皮膚變得光滑。
喺眺望得到鄂霍次克海嘅溫泉裡，仲有機會欣賞到美麗嘅夕陽與大海融為一體嘅絕景，極寒期間仲會出現流冰現象。幸運的話，仲會遇上棕熊或蝦夷鹿等野生動物呢！對於想體驗更多關於知床豐富生態體系、食物鏈等大自然知床之旅嘅您，小編大力推薦您去宇登呂溫泉呢個溫泉地作為旅遊據點喔。
交通方式
- 從女滿別機場乘搭巴士約2小時15分鐘
Comments