雖然人口約55萬人嘅鳥取縣係47個都道府縣內人口最少嘅縣，但係鳥取縣嘅東、西方位各有一個機場，意味著比起居住喺當地、前往鳥取旅遊嘅人數更多！鳥取縣唔單只係一個極具旅遊特色嘅目的地，就連機場都大有睇頭－皆因全球只此兩家，以漫畫命名嘅兩大機場就喺鳥取縣！本篇文章將會介紹「鳥取砂丘柯南機場」與「米子鬼太郎機場」到底作為旅遊景點嘅機場有咩非凡魅力、以及必睇精彩位！
鳥取砂丘柯南機場
「鳥取砂丘柯南機場」係位於鳥取縣縣廳所在地鳥取市內嘅機場。由於日本人氣漫畫「名偵探柯南」作者青山剛昌出生於鳥取縣北榮町，因此就被命名為鳥取砂丘柯南機場，吸引唔少為見柯南一面嘅遊客慕名到訪，廣受大眾粉絲喜愛。
歡迎嚟到名偵探柯南嘅世界！
踏入入口處，馬上就會見到空姐小蘭與機師柯南迎接大家，仲有寫著青山剛昌先生「歡迎嚟到鳥取砂丘柯南機場！！」同大家打招呼嘅留言板。
機場內到處都會見到出現喺名偵探柯南裡面嘅角色們化身成觀光大使，柯南嘅對手怪盜基德更貫徹神出鬼沒嘅個性，總會出現喺大家意想不到嘅地方。對於名偵探柯南嘅粉絲嚟講，此時此刻夢幻般嘅時間經已降臨！
「波羅咖啡店」竟然就喺附近！？
名偵探柯南裡面經常出現嘅波羅咖啡店（喫茶ポアロ）竟然出現喺機場！仲有私家偵探兼店員…安室透面帶微笑咁迎接大家。店內可以見到瞌眼瞓嘅毛利小五郎，令人不禁聯想「話唔定佢喺度進行緊推理？又或者柯南係咪匿埋喺邊個地方？」，店內散發著一股濃厚推理氣息。
波羅咖啡店旁邊嘅樓梯會見到FBI搜查官赤井秀一嘅身影出現喺磚牆上，不妨配合當下嘅氣氛，影返張相打卡相啦。絕對係安室透同埋赤井秀一嘅粉絲必去嘅地方！
利用觀景台上嘅「Memorial Post」愛心信箱傳遞愛與郵件吧！
觀景台上一副小蘭與工藤新一散發甜蜜氣氛嘅插圖前方，就係另一打卡位－呈愛心形狀嘅信箱「Memorial Post」。投遞於此愛心信箱嘅郵件，仲可以獲得鳥取柯南機場限定嘅郵戳。不妨寄返張明信片，讓限定郵戳成為您嘅柯南旅程記念吧！
當然唔少得裝飾著阿笠博士嘅發明品，與柯南相關角色們嘅繪畫「Conan's Character Wall」等必睇位，等大家可以盡情享受名偵探柯南嘅世界。
機場內餐廳・手信店資訊
名偵探柯南商品專賣店「柯南偵探社」販售著多種與柯南相關嘅商品與零食，尤其係機場限定商品更屬必買！記得仲要去埋販賣鳥取當地人氣名產嘅商店，以及鳥取當地食材嘅餐廳或Café朝聖喔。
路線
只有羽田機場飛往鳥取砂丘柯南機場嘅國內航線；國際航線則只能包機前往。
景點資訊
- 名稱：鳥取砂丘柯南機場
- 地址：鳥取縣鳥取市湖山町西4丁目110-5
- 交通方式：從鳥取站搭接駁巴士約20分鐘
米子鬼太郎機場
位於鳥取縣西部境港市嘅米子機場，因為與出身於境港市嘅漫畫家水木茂嘅代表作「鬼太郎」有關聯，所以被稱為「米子鬼太郎機場」。「鬼太郎」係講述有關主角鬼太郎與妖怪夥伴們，為咗維持妖怪與人類之間嘅和平，與邪惡妖怪作戰嘅故事。故事當中有人類及多種妖怪登場，當中嘅故事主角就係作為幽靈族最後倖存者嘅鬼太郎。
周圍都係鬼太郎同妖怪！
米子鬼太郎機場唔單止隨處可見鬼太郎以及一眾妖怪們嘅蹤影，仲可以趁機與鬼太郎及一眾妖怪影相留念！
一抵達當地客運大樓，就要有心裡準備隨時會「撞鬼」。首先會見到鬼太郎與鬼太郎老豆鬼眼爸爸坐住飛機迎接大家，鬼眼爸爸仲會神出鬼沒咁出現喺行李傳送帶上，記得要隨時打開金睛火眼，睇吓鬼眼爸爸有無出現喺大家嘅行李左近啦！
其他嘅妖怪們亦會潜伏喺令人感到意想不到嘅地方，如果喺路上感覺到被凝視嘅目光，不妨回頭望一望，您會發現無論係天花板、窗戶，甚至係長椅、門上都會有見到「牆壁怪」、「貓女」等妖怪們…不過唔使驚，因為佢哋都係對人類溫柔嘅妖怪們喔。
藝術×妖怪大搞crossover！
「撞鬼」都可以撞得充滿藝術美學！米子鬼太郎機場內有一幅高2.8米、闊10.2米，名為「妖怪們的森林」嘅大型玻璃彩繪相當吸睛。生活喺「妖怪們的森林」裡面嘅有「一目小僧」、「砂婆婆」等等「鬼太郎」裡面經常出現嘅妖怪們。呢一幅玻璃彩繪沿用1,000多年嘅傳統技術，並以手作嘅「Antique stained glass」，使用專用顏料繪畫燒製而成。奉勸拎相機嘅讀者們，要帶定多張SD卡以防影爆卡喔。
於旅客登機橋所遇見嘅妖怪們同樣地充滿顏色美學。窗戶上所畫上嘅黃、橙色妖怪們，透過陽光與陰影，於道路上所構成嘅妖怪們圖案令人感到驚喜萬分。
機場內餐廳・手信店資訊
米子鬼太郎機場內同樣有可以買到鬼太郎相關商品與販售當地手信嘅店舖，可以喺度盡情購物。國際線候機室內亦設有可以買到各種商品嘅免稅店。另外，推薦去可以品嘗到使用當地食材所製作嘅美食餐廳。大家去到米子鬼太郎機場，絕對可以享受到各種不同樂趣喔。
路線
只有羽田機場飛往米子鬼太郎機場嘅國內航線；國際航線則有香港國際機場、仁川國際機場、上海浦東國際機場。
景點資訊
- 名稱：米子鬼太郎機場
- 地址：鳥取縣境港市佐斐神町1634番地
- 交通方式：從米子站搭機場接駁巴士約25分鐘
利用邊個機場路線會比較方便？
從國際航班比較多嘅東京，搭飛機約1小時10分鐘～1小時20分鐘即可抵達鳥取。究竟要去鳥取砂丘柯南機場，定係米子鬼太郎機場？就要根據返大家想要去嘅旅遊景點去安排喔。
若然係想去鳥取砂丘、或去浦富海岸欣賞沉降式海岸嘅壯麗海景，推薦去鳥取砂丘柯南機場；如果係想遊覽日本百名山之一「大山」，以及去一睹與一眾鬼太郎妖怪們相遇嘅「境港」，推薦去米子鬼太郎機場則比較方便。
Comments