相信對日本神話稍有認識嘅讀者們，應該都有聽過關於「因幡白兔」嘅傳說。唔知大家仲記唔記得，我哋撰寫過一篇介紹島根縣出雲大社嘅文章呢？當中，神社裡主宰人間姻緣嘅祭祀神「大國主神」之所以能夠與「八上姬」結婚，聽聞與「因幡白兔」有莫大關係！如果你都想祈求良緣嘅話，就要先了解一下呢隻可愛兔仔嘅相關傳說，再去鳥取縣必去嘅「白兔神社」拜求良緣啦！
好心有好報？因幡白兔嘅傳說
島根縣出雲大社以「結緣神社」而聞名全國，如果有去過嘅話就一定有遇過，神社裡面出現多隻可愛吸睛嘅兔仔石雕。雖然每隻兔仔望落都非常可愛，不過大家又有無諗過點解會有咁多隻兔仔出現呢？其實，出雲大社裡面見到嘅「因幡白兔」，正正係鳥取縣「白兔神社」中主要祭祀嘅「白兔神」喔。
出雲大社的白兔石像
根據相傳於日本最古老嘅歷史書籍《古事記》中記載，話說有一日，大國主神與八十眾神齊齊出發去因幡國（現時嘅鳥取縣）嘅途中，行到去氣多之前（「気多ノ前」，現時嘅鳥取縣鳥取市白兔海岸）嘅時候，遇到一隻因為欺騙鱷鯊而被剝皮嘅白兔。當時，行喺最前面嘅八十眾神就同白兔講，只要用海水沖洗身體就能療傷，白兔照做，但無好轉之餘仲痛苦不堪；於是行喺最後面，為兄弟揹行李嘅大國主神，就教導白兔先去浸池水再用香蒲花粉抹身，白兔照做後果然因此痊癒。為咗報恩，白兔就向大國主神送上預言，話大國主神會與八上姬牽線結緣。預言最終實現，呢個就係「因幡白兔」嘅故事。
白兔神社：祈求良緣必去景點
作為「因幡白兔」傳說嘅舞台，白兔神社嘅主祭神當然就係故事中嘅主角「白兔大明神」。白兔神社唔單止被認定為對祈求姻緣、愛情運相當靈驗嘅神社，亦同時作為日本最古老嘅愛情故事發源地，被認定為全日本「戀人聖地」之一，年中吸引唔少想要得到良緣嘅善男信女、或情侶們到訪。除此之外，由於神話故事中大國主神伸出援手，拯救咗因幡白兔，令其皮膚劇痛得以治癒，因此白兔神社除咗可以保佑結良緣，仲可以保佑皮膚病、寵物們疾病盡快康復添！
如果你現時無任何戀愛煩惱嘅話，去到白兔神社不妨將重點放喺各種可愛兔仔身上吧！首先喺穿過鳥居之後，你會發現參道兩邊放置著各種唔同姿態嘅白兔石像，非常可愛。另外，呢度仲有販售各種與兔仔相關嘅「授與品 」，例如畫有白兔圖案嘅愛心形繪馬、擁有一對兔仔耳嘅結緣御守，仲有可以當裝飾品使用嘅兔仔靈籤等等，全部都萌度十足，令人少女心爆發！
白兔神社除咗可以依照一般參拜方式，仲有另一種比較特別嘅許願方法。先去購買一包五粒嘅「結緣石（結び石）」，將寫有「緣」字嘅石頭拋上去第二道鳥居嘅上方，如果石頭無跌落嚟嘅話，就代表你所許嘅願望得以成真。剩低嘅石頭，就拎返屋企當紀念吧！
景點資訊
- 名稱：白兔神社（白兎神社）
- 地址：鳥取縣鳥取市白兔603
- 交通方式：從JR鳥取站乘搭前往「鹿野」日之丸巴士約40分鐘，於「白兔神社前」落車即可抵達
- 官方網站：https://hakutojinja.jp/
白兔海岸：係神話之地，亦係絕佳嘅打卡景點
聽完因幡白兔嘅傳說之後，推薦大家親身去故事中嘅舞台「白兔海岸」行個圈喔。神話中，白兔因為想從「淤岐之島」前往氣多之前嘅海岸上，而講大話欺騙鱷鯊令佢能夠踩著鱷鯊背過海抵達目的地。現時，去到白兔海岸仍然可以遠眺傳說中嘅淤岐之島。另外，呢個離海岸約150米嘅淤岐之島，從側面望過去，有少少似一隻正準備向前跳嘅兔仔呢！島嘅四周會見到唔少岩礁群，其稍微露出水面嘅姿態，望落與鱷鯊魚背有幾分相似，令人不禁會邊回想神話中嘅內容，邊欣賞迷人風景，令旅程更添樂趣！
就算唔認識因幡白兔呢個神話故事，白兔海岸仍然係一個非常值得一遊嘅旅遊景點。呈弓字型嘅白色海灘，水清沙細，每到夏天就成為當地人戲水、衝浪嘅勝地。天氣好嘅時候可以喺度玩吓水，或者喺沙灘上散吓步，過返個舒適又愉快嘅下午好時光。唔落水玩嘅話，都可以企喺行人橋上飽覽海岸全景。鍾意影相嘅話，就更加唔可以錯過呢個擁有絕美海岸景色嘅白兔海岸喔！
景點資訊
- 名稱：白兔海岸（白兎海岸）
- 地址：鳥取縣鳥取市白兔
- 交通方式：從JR鳥取站乘搭前往「鹿野」日之丸巴士約40分鐘，於「白兔神社前」落車即可抵達
道之驛 神話之里 白兔
如果回程時唔係太趕嘅話，可以喺走之前，去位於白兔神社與白兔海岸之間嘅道路休息站「道之驛 神話之里 白兔」休息一下，兼順便買手信喔。除咗一般零食點心以外，仲可以喺度搵到唔少與白兔相關嘅擺飾、使用鳥取縣特產食材所製作嘅漬物、調味料等商品，不妨預多少少時間喺度行個圈，相信大家都可以尋找得到心儀手信喔。另外，仲可以喺二樓餐廳，一邊享用美食一邊眺望白兔海岸美景，相當寫意！
景點資訊
- 名稱：道之驛 神話之里 白兔（道の駅 神話の里 白うさぎ）
- 地址：鳥取縣鳥取市白兔613
- 交通方式：從JR鳥取站乘搭前往「鹿野」日之丸巴士約40分鐘，於「白兔神社前」落車徒步5分鐘
- 官方網站：http://sirousagi.com/
有人話，因幡白兔嘅傳說係日本最古老嘅愛情故事，唔知你覺得呢個神話故事，夠唔夠浪漫呢？即使你對日本嘅神話傳說毫無興趣，擁有壯麗海景嘅「白兔海岸」、可以祈求良緣嘅「白兔神社」等地，都係你值得一去嘅鳥取縣旅遊景點喔！
Comments