日本漫畫『名偵探柯南』至今已被翻譯成超過25種語言並於多個國家出版，而原作者・青山剛昌嘅故鄉，就係有「漫畫王國鳥取」之稱嘅鳥取縣北榮町。位於北榮町內嘅「青山剛昌故鄉館」除咗展出咗漫畫原畫，仲充滿各種驚喜體驗，當您踏入「青山剛昌故鄉館」，瞬間就好似去咗解謎世界一樣！同場更有唔少喺度先買得到嘅限定稀有商品，絕對係柯南粉絲必去景點。今次，小編就會為大家介紹「青山剛昌故鄉館」嘅魅力與必睇精彩位！
關於『名偵探柯南』原作者・青山剛昌
青山剛昌係全球著名嘅『名偵探柯南』、『鐵刃』、『魔術快斗 / 神偷怪盜』等多部作品嘅原作者。踏入「青山剛昌故鄉館」一刻，您即刻可以體驗得到作品嘅整個世界觀。入場時獲得嘅精美門票一共有3種設計，每款都加上經過漆膜特殊加工插圖，令人不禁會猜想入館時，究竟會拎到邊一款設計嘅門票，心情既期待又興奮。
關於青山剛昌故鄉館
以下落嚟，小編將會帶大家踏入廣闊嘅推理世界─柯南博物館。嚟到偵探團廣場，您會先遇上阿笠博士嘅愛車，不過精彩好戲在後頭！博物館不可錯過嘅必去地區，就由FUN!JAPAN編集部為大家進行詳細介紹！
必去展區1：青山剛昌夢想～創作秘密
首先係「青山剛昌嘅夢想～創作秘密」，區內真實重現出青山剛昌先生工作室嘅「工作房間」。還原程度之高，甚至會令人不禁懷疑青山剛昌先生係咪一直都身在此處呢。
『名偵探柯南』被翻譯成25個國家與地域嘅語言版本發行。於世界地圖上擺放著所發行嘅單行本，令人更能感受得到『名偵探柯南』席捲全球嘅真實感。
區內有展出複製原畫、以及青山剛昌憧憬嘅推理作家與名偵探嘅相關介紹。（細細聲，聽講幅肖像畫原來隱藏著有機關…？）
必去展區2：青山剛昌夢想～構思工房
跟住落嚟，就要去展出阿笠博士眾多發明物品嘅「青山剛昌嘅夢～構思工作室」。遊客可以喺呢個區域實際體驗到發明物品之一嘅「渦輪引擎滑板」，望著大螢幕上放映嘅北榮町疾馳，目標就梗係要拎高分啦！
同場亦有可以體驗各種犯罪手法嘅區域畀你挑戰一番。當犯罪手法被解開之後，一定要講返句經典台詞：「真相永遠只有一個」。
必去展區3：大結局GRAND FINALE
展區內可以欣賞得到大型影像投影，喺極具魄力嘅影像中所播映嘅，係與黑衣組織對抗嘅序幕…。一場嚟到，記得仲要體驗埋另一大投影技術－「3D漫畫人物視覺區」，絕對會帶畀您無盡驚喜！
只要將手機鏡頭掃瞄入場門票背面嘅標誌，畫面上就會就出現「柯南·怪盜基德·鐵刃」當中嘅人氣角色。究竟邊位人氣角色會登場？敬請拭目以待！記得要影返張合照，作為旅遊嘅美好回憶喔。
去柯南偵探社爆買原創商品
如果想要更投入名偵探柯南嘅世界，應該會想入手其原創商品吧？小編話您知，只要去「柯南偵探社」就可以實現呢個願望。「柯南偵探社」除咗有印有35名人氣角色，一口大小嘅貓舌餅（含稅1,080日圓），仲有多款零食、商品、文具等，都係只有喺度先至買得到嘅限定商品。
利用商店內郵筒寄明信片嘅話，仲可以得到印上柯南郵戳嘅服務。作為旅遊紀念之一，買嚟自用或送禮兩相宜！
※「柯南偵探社」不需要入館費
景點資訊
- 景點名稱：青山剛昌故鄉館
- 地址：鳥取縣東伯郡北榮町由良宿1414
- 營業時間：AM09:30～PM05:30（最終入館PM5:00）
- 公休日：年中無休
- 入館費用：小學生以下免費、小學生300日圓、中學生・高中生500日圓、成人700日圓
- 付款方法：可使用信用卡付款
- 地址：從JR由良站徒步約20分鐘或搭的士約5分鐘
Comments