鳥取縣境漁港可以捕獲多款日本海嘅豐富海產。當中，吞拿魚與螃蟹漁獲量更加係全國數一數二！大家亦可以喺境漁港相鄰嘅海鮮直賣場，即買即食新鮮海鮮喔。除咗可以喺度大飽口福之外，仲可以感受一趟隨時會「幸會鬼太郎」嘅驚喜之旅。皆因呢度有以境港出身嘅漫畫家「水木茂」，所描繪嘅著名作品「鬼太郎」為主題嘅JR境線、「水木茂大道」等充滿妖怪魅力嘅吸睛位會隨時出現，等你可以喺度盡情享受妖怪世界嘅國度！今次，小編就會為大家介紹一下，境港旅遊必去嘅精彩景點。
吞拿魚與螃蟹嘅漁獲量為全國數一數二！鳥取縣境港必食海鮮逐樣捉！
去到境港，又點可以錯過當地漁獲量為日本數一數二嘅吞拿魚與螃蟹呢！境港聚集唔少日本海嘅豐富海產，例如境港6月～7月盛產「生本鮪（吞拿魚）」、6月～翌年9月盛產「紅楚蟹」。另外，11月～3月於海底拖網捕魚中所捕獲嘅「松葉蟹」（帝王蟹）、6月～9月嘅「劍尖槍魷」（白魷魚）等亦聞名全日本。小編跟住落嚟，會介紹可以大嘆特嘆以上提到嘅新鮮海鮮好去處！除此之外，仲可以體驗「魚市場見學團」添。
境港水產直賣中心
「境港水產直賣中心」與境港魚市場相鄰，販售當日所捕獲嘅海鮮，由於鮮度十足，小編推薦可以即買即嘆返碟新鮮魚生喔！亦可喺食堂品嚐得到吞拿魚等各式各樣嘅海鮮丼飯。不妨到此一遊，享受當地特有嘅新鮮海鮮吧。
景點資訊
- 名稱：境港水產直賣中心（境港水産物直売センター）
- 地址：鳥取縣境港市昭和町9-5
- 交通方式：從JR境港站出發約5分鐘車程
「 大漁市場中浦 」&「境港魚中心」亦不可錯過！
「大漁市場中浦 」嘅入口處可以見到高達7.7米嘅鬼太郎石像「GAINA鬼太郎（がいな鬼太郎）」。呢度唔單止係人氣嘅打卡景點，仲係買手信嘅好地方。呢度除咗有賣螃蟹、一夜干、魚板、零食、鬼太郎相關商品之外，喺館內食堂亦可以品嚐得到新鮮嘅海鮮美食。
「境港魚中心」有提供代客烹煮服務，會幫客人烹煮於店鋪內所購買嘅海鮮，並可於併設嘅用餐處享用。館內仲有祭祀鬼太郎神體嘅「鬼太郎大漁社」。
景點資訊
- 名稱：大漁市場中浦（大漁市場なかうら）
- 地址：鳥取縣境港市竹內團地209
- 交通方式：從JR境港站出發約10分鐘車程
景點資訊
- 名稱：境港魚中心（境港さかなセンター）
- 地址：鳥取縣境港市竹內團地259-2
- 交通方式：從JR境港站出發約10分鐘車程
海與生活的歷史資料館
擁有美麗白壁設計嘅「海與生活的歷史資料館」陳列著魚類等標本，有700種類、高達4,000個，此收藏數量堪稱日本第一。除咗可以一睹體積長達4.2米嘅食人鯊、日本第一巨大嘅翻車魚等多種魚類標本，多款標本更以帶有光澤嘅姿態下展出，相當特別。其實海與生活的歷史資料館致力重現海洋中嘅魚類們顏色、以及其光澤色彩，到場嘅參觀人士能夠觀察得到有別於圖鑑嘅魚類姿態。另外，除咗魚類以外，仲有海產、捕魚方法等相關資訊，甚至可以踏上真正嘅漁船「MINATOMARU（みなと丸）」體驗一番添。
景點資訊
- 各稱：海與生活的歷史資料館（海とくらしの史料館）
- 地址：鳥取縣境港市花町8-1
- 交通方式：從JR境港站乘搭「HAMALOOP BUS」約8分鐘即可抵達
鬼太郎、妖怪相關景點
境港有唔少水木茂嘅代表作「鬼太郎」為主題嘅人氣景點。當中，不得不提繪畫上鬼太郎故事中嘅角色人物，以米子站為起點站運行嘅JR境線「鬼太郎列車」。另外，終點站嘅境港站又被暱稱為「鬼太郎站」，車站附近可以見到「妖怪巨大壁畫」、「鬼太郎郵筒」等多個鬼太郎景點喔。
從境港站起，長達800米嘅「水木茂大道」上，設有鬼太郎等177個妖怪銅像、「妖怪神社」、「水木茂紀念館」等多個妖怪景點，可以趁機體驗一個非日常嘅妖怪之旅。
江島大橋
全長1,446.2米嘅「江島大橋」以其陡峭斜坡嘅橋面廣為人知，亦被稱為「猛踩油門坡」(ベタ踏み坂)，一度成為城中熱話。但其實呢個驚人斜坡畫面，只係錯覺效果所造成。實際上，將橋樑最高點建設成45米高係為咗可以令5千噸級數嘅船隻通過，但呢個斜度又未去到要猛踩油門先至上到橋嘅程度。而且江島大橋附近，都無地方可以拍攝得到好似上圖斜到咁驚人嘅相片㗎喎。
如果想影到上圖超陡斜坡畫面嘅江島大橋，小編建議你去到旁邊「大根島」海岸線，從橋頭與最上方望落呈一直線嘅位置，再使用相機將對焦面放大，就可以拍攝出比實際更加陡峭嘅「猛踩油門坡」絕景奇觀啦。
景點資訊
- 名稱：江島大橋
- 地址：從島根縣松江市八束町到鳥取縣境港市渡町之間
- 交通方式：從JR境港站於發約10分鐘車程
境台場公園
「境台場公園」位於距離JR境港站約5分鐘車程嘅位置，係於江戶時代期間鳥取縣內建造嘅8個炮台場之一，更被指定為國家史蹟。春季時分，園內有成240棵櫻花盛開，每年都會舉行「櫻花節」。園內復原了山陰地區最古老嘅白亞木造六角洋式燈塔，於櫻花節期間可以進入內部參觀。白色燈塔與櫻花互相交織出嘅迷人景致，非常推薦大家喺度影返幾張靚相留倩影喔。
景點資訊
- 名稱：境台場公園
- 地址：鳥取縣境港市花町
- 交通方式：從JR境港站出發約5分鐘車程
日本漁港特有嘅祭典・節日活動盡在境港
喺漁業盛行嘅境港，全年都會舉行與漁業相關嘅節日和活動。特別係夏天舉行嘅「MINATO祭（みなと祭）」，每年都會盛大舉辦。約50艘漁船舉行充滿魄力嘅巡遊、抬神轎、緣日活動等，玩足成日之後仲可以參加埋煙花大會，約有2000發煙花點綴夜空，為全日嘅旅程作完美結束。
另一個夏日祭係「境港吞拿魚感謝祭」（※2022年中止舉辦），可以欣賞到吞拿魚嘅解體Show、品嚐各種吞拿魚美食。秋天會舉辦「境港水產節」（※2022年中止舉辦），有蟹湯飲、有漁獲競標體驗、有乘搭漁船體驗等活動。冬季會舉辦「螃蟹感恩節」（※2022年中止舉辦），由裝扮成鬼太郎、各種妖怪人物嘅隊伍，拉著擺滿螃蟹嘅兩輪人力手拉車，於水木茂大道遊行，並於妖怪神社供奉螃蟹，以祈求漁獲豐收。
前往境港嘅交通方式
從米子機場站乘搭JR境線約20分鐘，從JR米子站約45分鐘即可抵達JR境港站。 從米子鬼太郎機場乘搭「HAMALOOP BUS（はまるーぷバス）」約25分鐘即可抵達境港。
Comments