講到鳥取縣，大家可能第一時間會聯想到「鳥取砂丘」。雖然鳥取砂丘獨特嘅砂丘絕景，絕對稱得上係必去一次嘅旅遊勝地，但鳥取嘅魅力又豈止得「沙粒」呢？鳥取砂丘附近唔單止有展示世界最高水準嘅沙雕「砂之美術館」、仲有由日本名建築家隈研吾設計嘅新名勝「TAKAHAMA CAFE」，以上兩者都係鳥取縣嘅推薦旅遊景點。今次，小編會向大家介紹，鳥取砂丘與周邊地區嘅推薦玩法與打卡景點！
鳥取砂丘係沙漠？從了解形成原因與地理環境，感受其大自然鬼斧神工嘅魅力吧！
僅憑相片，應該唔少人都誤以為「鳥取砂丘」係沙漠吧？但其實沙漠與沙丘兩者，概念係完全不同。沙漠是指極端少雨嘅乾燥地區，另一方面，沙丘則係因受風力持續推動，進而形成嘅沙丘地帶。
鳥取砂丘係經過十萬年以上嘅歲月，所形成嘅地形。小編先簡單說明一下鳥取砂丘嘅形成過程吧！首先，日本嘅中國地區山地嘅岩石受風化而變成沙狀，從縣內嘅千代川流到去日本海，並堆積於海底。然後，堆積於海底嘅沙狀物被海浪沖上岸，受到西北季候風吹到內陸，經過長年累月後，變成現時嘅鳥取砂丘。
鳥取砂丘位於鳥取縣鳥取市日本沿海嘅海岸，其長度擴展東至西16公里、南至北2.4公里，亦係山陰海岸國立公園嘅一部分。雖然鳥取砂丘並非日本最大嘅沙丘（日本最大嘅沙丘係青森縣嘅猿森砂丘），卻係日本最大型嘅可觀光砂丘。另外，除咗被日本政府指定為國家天然紀念物，亦係日本地質百選之一。咁精彩嘅鳥取砂丘，絕對係去遊鳥取縣時，必要親臨其境嘅絕美景點喔。
鳥取砂丘嘅魅力，在於根據唔同季節、時間帶、角度等因素而持續變化，隨著風向同强度不同，砂丘嘅風貌亦會瞬間改變，出現沙柱、沙簾、風紋等自然現象。站立於名為「馬背」嘅小山丘上，鳥取砂丘與日本海所交織出嘅絕景同時映入眼簾，令人嘆為觀止。另外，由於甚少會受到光害影響，鳥取砂丘亦係絕佳嘅星空觀測場所。
如果有時間嘅話，非常推薦大家喺鳥取砂丘享受騎駱駝、滑沙、滑翔傘等絕不可錯過嘅體驗活動。鳥取砂丘可謂精彩位滿載，即使玩足成日都唔厭！
感受沙像雕刻家嘅非凡巧手，融合大自然力量共同演出嘅獨有魅力：砂之美術館
欣賞完鳥取砂丘其以大自然力量所製作嘅天然藝術品之後，下一站就去「砂之美術館」欣賞雕刻家嘅作品吧！「砂之美術館」係世上唯一一個主要展示沙雕展品嘅室內博物館。館內展示著雕刻家傾注熱情去製作嘅沙雕作品。
每年以「用沙環遊世界」為概念，定期更換主題進行展覽。往年展覽期間多為4月至翌年1月上旬，至今為止曾舉辦過以英國、東南亞、美國、北歐等地區為主題嘅展覽。2022年至2023年，為埃及獨立100周年，因此已選定「埃及」為第14期「用沙環遊世界」嘅展覽主題。
※可於官方網站查詢每年嘅展覽主題相關資訊。
世界各地嘅著名沙像雕刻家，會使用鳥取砂丘上嘅沙去製作以各國文化、藝術、歷史、神話為題材嘅沙雕作品。完美重現存在於各國嘅景點與建築物，如美國篇嘅「紐約摩天大樓」、亞洲篇嘅「兵馬俑」、埃及篇嘅「金字塔」、「尼羅河」等。最大特徵係完全不使用任何化學粘合劑，只以沙和水為材料，加上雕刻家嘅優秀技巧，完成巧奪天工嘅沙雕作品。展覽期結束後，沙雕作品會重新變回沙粒原貌，並會於下一次嘅展覽中被再次使用，化身成嶄新嘅沙雕作品。想感受沙雕嘅鬼斧神工，於美術館用眼睛去世界旅行嘅話，就一定唔可以錯過「砂之美術館」呢個地方啦！
景點資訊
- 景點名稱：砂之美術館
- 地址：鳥取縣鳥取市福部町湯山2083-17
- 開館時間：9:00～17:00（週六至18:00）
- ※展覽舉辦時間每年各異，詳情請查詢官方網站。
- ※展覽舉辦期間外，為製作沙雕與進行開館準備而休館。
- 交通方式：從鳥取站巴士總站嘅0號乘車處乘搭「砂丘線」，於「砂之美術館前」落車，徒步約1分鐘。
- 官方網站：http://www.sand-museum.jp/
隈研吾設計嘅新名勝「TAKAHAMA CAFE」
位於鳥取砂丘附近，由日本名建築家隈研吾設計嘅新名勝「TAKAHAMA CAFE」，於2022年8月20日開幕後，便一躍成為鳥取縣嘅旅遊新名勝。小編誠意推薦畀一眾鍾意咖啡與建築、尋找吸睛打卡景點嘅大家喔。
行入「TAKAHAMA CAFE」前，先欣賞一下以沙丘為主題設計嘅外觀吧！從側面望起嚟，就好似一條又一條刺穿大地上嘅樹枝。不過，換個角度從後面去睇嘅話，又營造出有如稻草屋頂小屋一樣嘅氛圍，相當神奇。使用鳥取縣產嘅木材，所建造嘅呢座建築物，活用美麗自然木紋，設計出有如砂丘風紋一樣吸睛嘅店舖內觀，到處都充滿心思。
除咗建築物夠晒吸睛之外，連餐單都非常講究。飲品與食物皆使用鳥取縣產嘅食材。例如「刨冰」、「奶昔」係選用鳥取縣特產「二十世紀梨」所製作。脆脆嘅口感，加上甜度恰到好處嘅梨，相當適合夏天品嚐喔。另外，使用鳥取縣產嘅大山煙肉、以及鳥取和牛燒肉所製作，令人食到相當滿足嘅兩種漢堡包都非常推薦。天晴時，喺三樓嘅開放式露天座位一邊享用美食、一邊欣賞藍天兼吹著凉風，飽覽眼前鳥取砂丘嘅絕景，相當寫意喔。
景點資訊
- 景點名稱：TAKAHAMA CAFE
- 地址：鳥取縣鳥取市福部町湯山2164
- 營業時間：11:00~16:00
- 交通：從鳥取站巴士總站嘅0號乘車處，乘搭「砂丘線」或「岩美・岩井線」巴士，於「砂丘會館」或「砂丘東口」落車，徒步約10分鐘。
- 官方網站：https://takahama-cafe.com/
鳥取砂丘嘅魅力，其實遠遠超出大家嘅想像。無論係去過，抑或係未曾踏足過鳥取砂丘嘅大家，睇完以上嘅介紹之後，對鳥取砂丘嘅睇法或已出現90度，甚至180 度嘅大轉變！下個假期，不妨出發一個鳥取砂丘與周邊巡遊之旅吧！
Comments