JR境線係連結著鳥取縣JR米子站到境港站嘅列車路線。以日本國民人氣漫畫，水木茂嘅作品「鬼太郎」為主題嘅列車——「鬼太郎列車」，由2000年8月開始於JR境線運行，深受動漫粉絲歡迎。今次，小編會介紹列車相關嘅運行狀況、車站與周邊景點等，為大家介紹「鬼太郎列車」嘅魅力。
關於JR境線
JR境線係一條連結JR米子站至境港市嘅JR境港站嘅列車路線，總長17.9公里，全程約45分鐘。運行班次一般為每45分鐘～1小時一班車，憑乘車劵即可乘搭。另外，JR境線於平日來回17班次當中，鬼太郎列車等彩繪列車嘅運行班次為14個來回班次，而星期六、日及公眾假期則全數為鬼太郎列車共15班次。（2022年3月修改後資訊）
呢條列車路線可謂非常方便，從米子機場站徒步約5分鐘即可抵達米子鬼太郎機場，而且境港站亦距離「水木茂之路」、「水木茂紀念館」非常近，絕對係大家作為旅遊交通工具嘅最佳選擇。
※運行資訊可能會有所變更。
鬼太郎列車嘅種類
JR境線運行嘅「鬼太郎列車」經2018年更新後，圖案從4種新增到6種，現時一共有6種圖案。全都是依照動漫中嘅角色人物、以及加入鳥取與島根嘅旅遊景點為主題所設計嘅彩繪圖案。
小編先逐一講解，每架列車嘅彩繪圖案所代表嘅旅遊景點設計吧！
首先，彩繪圖案為主角鬼太郎嘅「鬼太郎列車」，加入以日本中國地區最高峰「大山」、以美麗海岸線而聞名嘅「弓濱」等元素為設計主題；「撒砂婆婆列車」（左）加入鳥取嘅代表名勝之一「鳥取砂丘」元素為設計主題；「子泣爺爺列車」（中）加入被稱為「日本第一星空景點」嘅鳥取「星空」元素為設計主題；「星君鼠列車」加入距離水木茂大道約15分鐘即可抵達嘅漁師町——「美保關」元素為設計主題。
除此之外，「貓女列車」（上）畫上被夕陽染紅嘅半鹹水湖泊「宍道湖」嘅彩繪圖案；「鬼眼爸爸列車」（下）則畫上「溫泉」嘅彩繪圖案。另外，大家亦可以喺月台上拍攝列車嘅吸睛外觀喔。
鬼太郎列車嘅車站&月台
JR境線嘅每個站，都有著與「鬼太郎」相關嘅妖怪站名暱稱。例如，米子站暱稱為「星君鼠站」，米子機場站暱稱為「足音先生站」，位於作者水木茂出生地嘅境港站暱稱為「鬼太郎站」。
另外，每個站嘅月台都會見到各種裝飾、車站顯示牌等，皆畫有與車站名暱稱相關嘅妖怪圖案。特別係作為JR境線起點嘅米子站「星君鼠站」0號月台上，到處可見鬼太郎、星君鼠等一眾於「鬼太郎」中主要登場嘅妖怪角色，令人瞬間彷似踏入妖怪世界一樣，心情既緊張又興奮。下次大家不妨喺妖怪們最熱鬧嘅0號月台，搭著鬼太郎列車出發一趟妖怪之旅吧。
抵達終點境港站「鬼太郎站」後，唔單止當站月台充滿妖氣，就連車站附近都可以見到「妖怪巨大壁畫」、「世界妖怪會議」等精彩打卡景點。
鬼太郎列車嘅車廂內觀
鬼太郎列車從外觀、天花板、甚至廁所側面嘅牆壁等車廂內部裝修，都繪畫上滿滿嘅妖怪角色，簡直係「妖氣衝天」！唔單止天花板畫滿鬼太郎，就連座位上都有大量鬼太郎出現，係坐低同鬼太郎合照嘅好時機喔。
除咗鬼太郎列車之外，以星君鼠、貓女、撒砂婆婆、子泣爺爺、鬼眼爸爸為主題嘅各車廂內部裝飾，都充滿妖怪魅力。另外，仲可以喺彩繪列車內，聽到動畫「鬼太郎」中所登場嘅角色聲音作車內導覽廣播，盡享妖怪世界嘅氛圍！
JR境線沿線嘅旅遊景點
JR境線沿線有好幾個旅遊景點。抵達終點JR境港站之後，就代表著經已踏足妖怪王國喇。從車站前嘅「水木茂大道」嘅路上，設有鬼太郎等177個妖怪銅像、妖怪神社、水木茂紀念館等多個旅遊景點。下個鳥取之旅，不妨體驗一個非日常嘅妖怪之旅啦。
距離境港站約5分鐘車程，有個叫做「境港魚市場」嘅漁港，鳥取縣為生吞拿魚與螃蟹嘅漁獲量為全國數一數二嘅海產王國。更加可以喺度參觀境港漁獲嘅卸貨風景，親身感受箇中氣氛。不過一場嚟到，又點可以淨係用對眼去睇呢？推薦大家去附近嘅「境港水產物直賣中心」品嚐新鮮海鮮喔！另外，仲可以喺「米子鬼太郎機場」遇見機師造型嘅鬼太郎，以及一眾妖怪們嘅蹤影，趁機盡享「米子鬼太郎機場」獨有嘅鬼怪世界！
Comments