從鳥取縣境港市JR境港站到「水木茂紀念館」嘅「水木茂大道」上，竟然設有177個妖怪銅像。當中，亦會見到人氣漫畫作品「鬼太郎」中出現嘅妖怪們，相當吸睛！今次，小編會介紹呢條「水木茂大道」嘅必去精彩位喔。
水木茂大道嘅最佳玩法：必去打卡位&必儲妖怪紀念印章
出生於境港市嘅日本漫畫家水木茂，創作出「鬼太郎」等眾多大受歡迎嘅妖怪漫畫，更有「妖怪博士」之綽號。
從JR境港站到「水木茂紀念館」沿途約800米長嘅「水木茂大道」上，有5個唔同主題區域，並分別設置唔同嘅妖怪銅像，其數量更高達177個！由於2018年曾進行大規模更新，銅像數量比起一開始嘅時候新增成7倍以上。呢度處處都係打卡位，一於喺度盡情影靚相「呃Like」吧！
抵達JR境港站（暱稱為「鬼太郎站」），眼前就係水木茂大道嘅起點。向車站前「水木茂老師執筆中」銅像中嘅水木茂、鬼太郎、星君鼠打個招呼之後就出發前往妖怪世界啦！然後好快就發現，喺附近嘅JR境港站前公園，舉行緊一個世界妖怪會議喔。既然一場嚟到，不妨代表人類出席呢場妖怪會議啦！
呢條街有個「河童之泉」，可以見到河童三平、河童、洗豆妖們等眾妖輕輕鬆鬆地齊聚一堂。當中，仲會遇見惡魔君、游泳中嘅星君鼠、化身成小便小僧嘅鬼太郎等身影。
除此之外，亦設有撒砂婆婆、貓女、布先鋒等鬼太郎故事中嘅眾多妖怪們、以及日本各地嘅妖怪們銅像。可以喺度盡情地與妖怪們近距離接觸。
除咗可以影相留念之外，仲可以進行集印章活動「妖怪Stamp Rally（妖怪スタンプラリー）」紀念呢一趟旅程。可以喺JR境港站前嘅境港市旅客諮詢中心、以及水木茂大道上嘅店舖購買妖怪集章手冊「妖怪Guidebook（妖怪ガイドブック）」，咁就可以一邊睇地圖一邊收集沿途店鋪等35個印章，完成迷你版妖怪圖鑒吧。
另外，如果想要寄妖怪明信片畀親朋好友做手信嘅話，推薦使用可以蓋上妖怪郵戳嘅妖怪信箱。為親朋好友送上水木茂大道嘅獨有手信喔。
「水木茂大道（水木しげるロード）」
- 地址：從JR境港站到「水木茂紀念館」沿途
- 交通方式：從米子鬼太郎機場乘搭「HAMALOOP BUS（はまるーぷバス）」，喺「舊NTT前」車站落車徒步約2分鐘。或從JR境港站（鬼太郎站）徒步即可抵達
- 官方網站：http://mizuki.sakaiminato.net/
妖怪神社
位於水木茂大道上嘅一角，有一間「妖怪神社」。呢間神社嘅鳥居比較特別，以妖怪「布先鋒」為設計概念，而鳥居旁邊會見到由花崗岩打造成「鬼眼爸爸」模樣嘅「手水舍」（淨手池）——「鬼眼爸爸淨水（目玉おやじ清めの水）」， 進入神社參拜前記得要喺度清洗雙手喔。
呢度瀰漫著妖氣氛圍，除咗有由約3米高嘅黑色花崗岩、以及由樹齡300年嘅欅木所構成嘅御神體，仲有一樣就係「目玉石」。據聞呢個「目玉石」係水木茂喺設定御神體，「將眼珠（目玉）放喺呢度～」時，用手指著嘅部分剝落因而成為「目玉石」。
妖怪神社嘅繪馬、御守、神籤等都係設計成妖怪嘅模樣。當中特別推薦嘅係由鬼太郎、貓女等5種妖怪機關人偶為求籤者送上籤詩嘅「機關妖怪神籤（からくり妖怪みくじ）」。唔知你想由邊一種妖怪為你送上籤文呢？
妖怪神社
- 地址：鳥取縣境港市大正町62-1
- 官方網：http://yo-kai.net/jinja/
水木茂紀念館
從JR境港站徒步約10分鐘即可到達「水木茂紀念館」。 喺「GEGEGE之玄關（ゲゲゲの玄関）」就可以見到水木茂、鬼太郎、鬼眼爸爸喺度迎接來賓。首先，可到「水木茂 漫畫世界（水木しげる 漫画ワールド）」欣賞得到精選嘅著名作品及各優秀作品等，可以讓人重新發掘作品與作者嘅魅力呢。
然後，去到重現水木茂位於東京都調布市嘅工作室「水木茂工作房間（水木しげるの仕事部屋）」。旁邊係妖怪公寓與住喺裡面嘅妖怪們。另外，喺「鬼婆婆與孩子王（のんのんばあとオレ）」中，有著對年幼時期嘅水木茂生產影響並隱藏於日常生活中嘅妖怪們身影，仲可以見到鬼婆婆對著年幼嘅水木少年講妖怪故事嘅畫面。
再往前走去到「妖怪洞窟」就可以遇到唔少正在蠢蠢欲動嘅妖怪們。透過中、英文等語音導賞服務，或可令大家與妖怪們更深入地打好關係？享受完妖怪世界嘅樂趣之後可以再去埋「Museum Shop（ミュージアムショップ）入手獨有嘅徽章與明信片喔。
「水木茂紀念館（水木しげる記念館）」
- 地址：鳥取縣境港市本町5
- 開館時間：09:30～17:00
- 休館日：年中無休
- 費用：一般700日圓，初中生及高中生500日圓，小學生300日圓
水木茂大道之夜間投影演出
水木茂大道嘅妖怪們，每日一到日落時分就開始正式活動。妖怪銅像會被點燈，奇幻神秘嘅氛圍瞬間倍增，其燈光顏色會隨著時間產生變化，並於水木茂紀念館嘅前庭附近路上投射出妖怪們自由活動嘅身影。呢個夜間投影演出至晚上10點為止。
點燈顏色會隨著季節而變化，投影圖案亦根據夏日版本、秋季限定、正月時期等，因應季節而推出各種主題嘅妖怪投影圖案。不妨嚟親身睇吓，淨係出現喺夜晚嘅妖怪面貌吧！
妖怪商品及美食
沿著水木茂大道有兩排手信舖與飲食店，當中有唔少特色商品，例如鬼眼爸爸造型嘅「妖菓鬼眼爸爸（妖菓目玉おやじ）」、鬼太郎麵包、布先鋒日式炒麵等美食。另外，喺「GEGEGE妖怪樂園（ゲゲゲの妖怪楽園）」除咗可以購物、品嚐美食之外，仲可以大玩特玩遊樂設施喔。
行到攰嘅話，可以去嘆返杯「妖怪Latte」等特色餐飲，休息一下。另外，亦有布先鋒嘅玩樂場、鬼太郎之家、巨大嘅「餓者髑髏」等人氣打卡景點添！
「GEGEGE妖怪樂園（ゲゲゲの妖怪楽園）」
- 地址：鳥取縣境港市榮町138
- 開園時間：09:30～17:00
- 地址：從JR境港站徒步約10分鐘
- 官方網站：https://www.yokairakuen.jp/
Comments