山口縣位於日本中國地區（山陰、山陰地區）內，由於面向日本海，因此遊客身處縣內可以飽覽多個自然美景，例如橫架於蔚藍色大海上嘅角島大橋，以及沿海排列著綿延不絕、擁有如鳥居隧道般嘅元乃隅神社等人氣打卡景點。
另外，山口縣喺江戶時代由具有權力嘅大名所統治，被稱為「長州藩」，所以如今山口縣各處亦存在多個具有重要歷史意義嘅古蹟。去到山口縣，唔單止可以感受美景，仲可以漫步於充滿歷史風情嘅古老街道喔！
今次，編輯部會將山口縣分為「山口市區域」、「下關市&美禰市區域」、「萩市・長門市區域」、「岩國市區域」4個區域，分別介紹當中嘅旅遊景點。大家喺計劃下個山口之旅嘅時候，不妨可以參考一下！記得排行程嘅時候，亦要加以考量各個旅遊景點嘅距離喔。
（山口市）一之坂川：山口縣櫻花＆螢火蟲勝地
一之坂川係將山口市一分為二嘅河川，屬山口縣內數一數二美景勝地。蜿蜒河流兩旁種滿櫻花樹，春季可以欣賞美麗櫻花景色。如果係7、8月夏季夜晚去，更可以睇到河畔翩翩飛舞嘅螢火蟲呢。
景點資訊
名稱：一之坂川
- 地址：山口縣山口市後河原
- 交通方式：從JR山口站步行12分鐘
（山口市）瑠璃光寺：國寶級景點！日本三大名塔之一
琉璃光寺嘅五重塔係日本三大五重塔之一。古塔係西元1442年建造而成，屬日本國內現存五重塔中第10古老。除咗欣賞五重塔建築本身，遊客仲可以漫步於廣大寺院範圍內，順便遊覽一旁嘅香山公園內多座歷史建築，例如倉庫、鐘塔、及古物博物館等。公園內亦有江戶時代統治此地嘅毛利家族嘅墓園，以及與著名武士西鄉隆盛有關嘅茶館「枕流亭」。臨走前記得仲要參觀埋琉璃光寺資料館，細賞五重塔模型及相關資料喔。
景點資訊
- 名稱：琉璃光寺
- 地址：山口縣山口市香山町7-1
- 開放時間：全年自由開放進入（瑠璃光寺資料館開放時間為09:00～17:00）
- 入場費：免費（琉璃光寺資料館需另行收費）
- 交通方式：從JR山口站乘搭山口市社區巴士「大内路線」，至「香山公園五重塔前」站落車即可抵達，車程約15分鐘
（山口市）山口沙勿略紀念教堂：日本聖誕節發源地
十六世紀，耶穌會傳教士「聖方濟各沙勿略」去亞洲傳教期間曾造訪山口縣。為紀念聖方濟各沙勿略到山口縣400週年，當地決定於1952年建造「聖方濟紀念教堂」。教堂曾於1991年毀於火災，其後於1998年再次重建，重建後嘅教堂外觀充滿現代感，彷如一座館藏豐富嘅博物館，內部現時展出著多個多基督教繪畫、雕像、宗教文物等，當中包括基督教傳播到日本嘅古老地圖。
景點資訊
- 名稱：山口沙勿略紀念教堂
- 地址：山口縣山口市龜山町4-1
- 開放時間：09:00 ~ 17:00
- 入場費：免費（自由捐獻）；參觀教堂博物館300日圓
- 交通方式：位於山口站西北方1.3公里處，從山口站步行15-20分鐘，或於車站外租借單車 (每兩小時300日圓、一天700日圓)
（山口市）常榮寺 雪舟庭：日本屈指可數名庭
常榮寺係一座禪寺，以田園般寧靜環境同廻遊式庭園「雪舟庭」聞名。雪舟庭於500年前完工，係由一位對美學具有敏銳嘅眼光、身兼僧侶及藝術家嘅雪舟造景得名。雪舟庭最出名係山石造景，寺院主殿內則有寬敞榻榻米空間。參觀完主殿後，可以沿著行山路去雪舟庭遊覽，附近仲有禪風枯山水石庭可以悠閒地散步。
景點資訊
名稱：常榮寺
- 地址：山口市宮野下2001-1
- 開放時間: 08:00～17:00（11月到翌年3月開放至16:30）（最後入場為關門前30分鐘）
- 入場費: 300日圓
- 交通方式：
從宮野站落車，徒步約25分鐘（或從宮野站搭的士約5分鐘）
從山口站或從山陽自動車道「山口 IC」駕駛前往約10分鐘
（下關市）角島＆角島大橋：「一生人至少要去一次」絕景景點
日本人經常會將橋樑聯想到靈性，好似日本歌舞劇「能劇」中嘅橋掛（連接幕及舞台），就被認為係將人與另一個世界之間聯繫起嚟嘅地方。
角島大橋全長1,780米，係日本第二長嘅跨海大橋。筆直嘅大橋橫跨湛藍大海上，畫面被譽為「一人生絕對要去一次嘅世界絕景」之一。欣賞角島大橋最佳時機，係日出同日落時份。喺角島大橋影完靚相後，仲可以去埋鄰近島嶼享用海鮮及當地美食呢。
景點資訊
名稱：角島・角島大橋
- 地址：山口縣下關市豐北町大字角島
- 開放時間：24小時開放
- 入場費：免費
- 交通方式：從瀧部站乘搭往角島方向嘅巴士約30分鐘，於「西長門度假酒店門口」站落車，徒步約3分鐘即可抵達
（下關市）城下町長府：江戶時代古老街道
江戶時期，城下町長府曾經係由大名毛利家所統治嘅「長州藩」嘅支藩「長府藩」，亦係當時嘅行政據點，因而得名。區內至今仍保留著曾作為政治、文化嘅中心地帶，繁榮興盛嘅城下町街道上林立著大大小小嘅武家宅邸遺址、神社佛閣、土牆與石垣相連嘅「古江小路」等，保證遊客可以充分感受昔日日本風情及豐富歷史面貌。
「功山寺」及「長府毛利邸」更加係必去著名紅葉勝地！
景點資訊
名稱：城下町長府
- 地址：山口縣下關市長府
- 交通方式：從JR長府站乘搭巴士約5分鐘，於「城下町長府」落車
（下關市）嚴流島：來去不一樣嘅無人島！深度遊日本歷史性決鬥舞臺吧～
巖流島係山口縣內最出名嘅景點之一，作為日本名劍客宮本武藏與對手佐佐木小次郎決鬥嘅地方而聞名。想去巖流島的話，您可以從下關港乘搭渡輪約10分鐘，費用為大人800日圓，小童400日圓（來回費用）。
據說宮本武藏喺決鬥時故意遲到，令佐佐木小次郎久候。決鬥中，小次郎被宮本武藏以備用木槳削成嘅木劍攻擊不幸喪命。對武士故事有興趣嘅朋友絕對唔可以錯過！
景點資訊
名稱：巖流島
- 地址：山口縣下關市大字彥島字船島648番地
- 入場費：免費
- 交通方式：從唐戶棧橋搭船約10分鐘
相關文章
（美禰市）秋芳洞：日本最大型鐘乳洞
日本規模最大嘅鍾乳洞秋芳洞位於有「礦山城」之稱嘅山口縣內。秋芳洞於100多萬年前形成，經過日積月累嘅雨水侵蝕而形成目前嘅樣貌。
同場嘅秋吉台遠足路線亦吸引來自世界各地嘅遠足人士。秋吉台四季各有不同美景，春夏係一片清新綠色嘅樣貌，而秋天則因芒草而變身一片金黃色。
景點資訊
名稱：秋芳洞
- 地址：山口縣美禰市秋芳町秋吉3506-2
- 開放時間: 08:30～17:30（3月～11月）；08:30～16:30（12月～2月）
- 入場費：成人及高中生1,300 日圓, 中學生 1,050日圓 , 小學生700日圓
- 交通方式：
從山口巴士總站乘搭巴士約40分鐘（1,230日圓）；或從JR新山口站乘搭巴士約40分鐘，於「秋芳洞巴士站」落車（1,170日圓）
相關文章
（美禰市）別府弁天池：日本名水百選之一
別府嚴島神社境內嘅別府弁天池泉水透明度極高，於陽光照射下呈現寶石藍般閃閃發光，美麗又神秘。據聞泉水唔單止有美肌功效，飲用後仲會有助身體健康！店舖所販賣嘅弁天名水咖啡亦相當受歡迎。
景點資訊
名稱：別府弁天池
- 地址：山口縣美禰市秋芳町別府1951番地2
- 交通方式：從「美禰IC」揸車約20分鐘
（萩市）萩城下町：世界遺產景點
萩城下町於江戶時代作為大名毛利家所統治嘅長州藩據點曾繁榮一時，其規模比上文提及過嘅長府城下町更大。城下町至今仍完整保留著武家宅邸、商人及醫生住居，以及白壁、生子壁（日本傳統凸棱格子牆）、黑色板牆等昔日江戶時期街道氛圍。特別係被選為「日本街道百選」嘅「菊屋橫町」一帶最出名，漫步於此最能感受到古時萩市嘅復古街道風情，亦係著名嘅攝影名勝喔。
萩城下町內隨處可見萩市特產夏蜜柑。下個日本之旅，不妨著住出租和服，漫步於擁有由舊民宅所改造嘅Café、雜貨店、或歷史遺跡等等嘅萩城下町吧！
景點資訊
名稱：萩城下町
- 地址：山口縣萩市南古萩町附近
- 交通方式：從JR東萩站徒步約20分鐘
相關文章
（長門市）元乃隅神社：獲CNN選為「日本最美31個地點」之一！
元乃隅神社從1987年開始花費10年時間建造，從神社到日本海一帶有成123座赤紅色鳥居，構成總長達100米㖾「鳥居隧道」。赤紅色鳥居、翠綠山林與湛藍大海相輝映嘅自然美景，簡直猶如仙境！運氣好嘅話，仲有機會遇到海浪拍打參道入口附近位置嘅岩石，噴出可到達30米嘅巨高水柱，有如天龍飛昇一樣壯觀嘅絕景。
景點資訊
- 名稱：元乃隅神社
- 地址：山口縣長門市油谷津黄498
- 交通方式：從「美禰IC」揸車約60分鐘／從長門古市站搭的士約20分鐘
（岩國市）錦帶橋：日本三大名橋之一
全長約200米嘅木造5連拱橋錦帶橋，除咗係日本代表性木造橋，亦係國家指定名勝。無論係木材配置，抑或係以弧度力學所打造出其極美弧度等等，其精巧且獨創嘅技藝均獨見職人匠心，讓錦帶橋成為獨一無二嘅存在。
走訪錦帶橋上，您可以親身感受當中嘅鬼斧神工以及其絕美拱橋姿態。春天可以賞櫻、夏天可以欣賞煙花與鵜飼、秋天可以賞紅葉，冬天則可以欣賞夢幻雪景，一年四季美景各有特色。橫過錦帶橋後嘅岩國城亦係一大朝聖目的地喔。
景點資訊
名稱：錦帶橋
- 地址：山口縣岩國市岩國1
- 交通方式：從西岩國站乘坐「往錦帯橋方向」嘅巴士約4分鐘／從新岩國站乘坐「往錦帯橋方向」嘅巴士約15分鐘／從岩國站乘坐「往錦帯橋方向」嘅巴士約20分鐘
相關文章
山口縣購物景點
山口縣當地商店街與城下町內店舖成行成市，最適合遊客喺度盡情挑選日本當地特產做手信。如果想購買與流行時尚相關嘅商品，推薦您去交通方便嘅山口市購物中心喔。
youme Town 山口
youme Town 山口中販售嘅商品包羅萬有，從服飾、珠寶首飾到家電產品都有。購物中心裡有嘅「HARD OFF」主打二手商品，商品大多都係使用唔超過五年嘅中古物品，隨時可以用實惠價格尋到寶！
景點資訊
名稱：youme Town 山口
- 地址：山口縣山口市大內千坊6-9-1
- 營業時間：10:00～21:00
AEON TOWN小郡
AEON TOWN小郡（AEON TOWN OGORI）係日本知名連鎖購物中心AEON旗下一間分店，樓層眾多而且商品種類五花八門。遊客可以喺呢度搵到日本時下最新嘅潮流商品，無論男、女定係兒童用品都有。飲食區亦有多款美食選擇，行到攰休息吓，花一整日時間喺度都得啦。
景點資訊
名稱：AEON Town小郡
- 地址：山口縣山口市小郡前田町2-24
- 營業時間：10:00～21:00
山口縣住宿推薦
難得去日本旅行，應該唔少人都會想入住設有溫泉嘅住宿，體驗一下日本獨特嘅溫泉文化吧？編輯部推薦山陽地區首屈一指嘅大溫泉街「湯田溫泉」，以及歷史悠久嘅「萩溫泉鄉」。如果時間唔多充裕嘅話，則推薦住宿JR新山口站附近嘅酒店，因為從JR新山口站出發嘅話，無論去邊都相當方便喔。
精選酒店名單如下：（詳情請參考以下個別相關文章）
相關文章
山口縣交通
山口宇部機場所提供嘅國際航班非常之少，建議最好從日本國內其他縣坐飛機或新幹線前往。
乘搭飛機：
JAL日本航空同ANA全日空都有從東京羽田機場直飛山口宇部機場嘅航班，飛行時間大約一個半鐘。從山口宇部機場去市中心，可以搭巴士去新山口站，車程約35分鐘，單程票價約為910日圓。
乘搭電車：
前往山口地區最簡單嘅方法之一係乘搭新幹線前往新山口站。乘搭山陽新幹線，從大阪站到山口站約需時2個鐘，單程票價約12,000日圓。 從東京站搭新幹線NOZOMI號去山口站，車程需4個半鐘，單程車票為20,000日圓。另外，仲有從福岡出發去山口就搭山陽新幹線，車程約35分鐘，單程票價約5,000日圓。
山口縣內嘅主要公共交通工具係電車或巴士，推薦乘搭名為「やまぐち絶景満喫バス（山口絕景滿喫巴士）」嘅觀光周遊巴士遊覽。另外，乘搭蒸汽火車「SL山口號」體驗舊時代嘅懷舊風情亦相當受歡迎。不過，始終會有某部分乘搭公共交通工具無法前往嘅地方，如果想自由自在地旅遊嘅話，推薦自駕遊或乘搭周遊觀光的士喔。
山口縣冬季嚴寒、夏季炎熱，而且夏天雨季較長，因此最適合去山口旅行嘅季節係春天，每年四至五月都可以欣賞到櫻花。秋季的話，十至十一月氣候乾爽、氣溫宜人，仲可以乘機欣賞紅葉及整個城市披上繽紛色彩嘅景色，一樣咁推薦！
相關文章
Comments