歷史武士時代、壽司等日本美食…相信大家總有千萬個鍾意日本嘅理由。今次，小編會介紹一個，無論您係因為任何原因而愛上日本，都可以感到心滿意足嘅地方－山口縣下關市！下關市除咗擁有櫻花名勝景點，超級好食嘅豐富海鮮，仲係曾經發生日本歷史上無人不曉戰爭嘅舞台。睇完呢篇文章，包保您會立即想飛一轉山口縣下關！
山口・下關市喺邊度？
山口縣下關市係位於日本本州最西邊嘅城市。人口比縣廳所在地山口市多約25萬人，屬山口縣最大規模嘅城市。由於下關市3面環海，因此自古以來就係連接日本與亞洲大陸嘅海上交通重要據點。自1864年下關港開港後，就一直作為貿易街而繁榮興盛至今。
位於下關市「毘沙之鼻」嘅海岬上，建有標示「本州最西端」嘅紀念碑。從觀景台可以眺望到雄偉日本海景色！
JR下關站
- 地址：山口縣下關市竹崎町4-3-18
- 交通方式：
從東京出發約5小時：從東京站乘搭山陽新幹線到小倉站。從小倉站乘搭JR鹿兒島本線到下關站。
從大阪出發約2小時20分鐘：從新大阪站乘搭山陽新幹線到小倉站。從小倉站乘搭JR鹿兒島本線到下關站。
毘沙之鼻
- 地址：山口縣下關市吉母御崎
- 交通方式：JR下關站自駕前往約30分鐘
下關－歷史戰爭發生地
下關喺日本歷史上曾經係多場戰爭嘅發生地舞臺場地。以下將會向大家介紹，喺下關曾發生嘅兩場著名戰爭。
1. 壇之浦之戰（1185年）
講到下關曾經發生過嘅戰爭事件，又點可以唔提到發生於平安時代末期（西元1185年）嘅「壇之浦之戰」！壇之浦為下關市所在地區舊稱，壇之浦之戰則係當時擁有勢力嘅兩大武士家族、平氏與源氏之間所發生嘅戰爭。源氏於此戰爭中戰勝平氏後，開啟源氏統治日本嘅時代「鎌倉時代」。從貴族打理政治嘅平安時代，轉換到武士打理政治嘅鎌倉時代...為日本歷史帶嚟巨大轉捩點嘅呢一場戰爭，就係發生喺下關。
現時，上演壇之浦之戰嘅壇之浦古戰場遺跡內放有以曾活躍於戰爭中嘅源義經為原型嘅雕像。
壇之浦古戰場遺跡
- 地址：山口縣下關市三茂川町1
- 交通方式：從JR下關站搭巴士約15分鐘
2. 嚴流島決鬥（1612年）
第二場戰爭嘅舞台係嚴流島。嚴流島距離下關唐戶碼頭站約10分鐘船程，係一個周長約1.6 km嘅無人小島。
江戶時代1612年，宮本武藏與佐佐木小次郎兩位劍術家於嚴流島上展開一場「嚴流島之決鬥」。雖然係武藏向小次郎提出決鬥，武藏卻足足遲咗2個小時先出現。最終，武藏於決鬥中獲勝，不過令人驚訝嘅係，據聞武藏所用嘅係竟然係一把以木頭製成嘅木刀呢。
嚴流島嘅正式名稱其實係「船島」，後來取其小次郎劍術流派「嚴流」之名，被稱為嚴流島。
嚴流島
- 交通方式：下關市唐戶棧橋（山口縣下關市南部町31-2）搭船約10分鐘
- 船票費用（來回）：成人900日圓，小童450日圓
世上罕見！可以用腳行過去嘅海底隧道
位於日本本州最西邊嘅下關，自古以來就係連接日本本州與九州嘅交通據點。
1958年，連接下關與福岡縣北九洲市門司嘅海底隧道關門隧道正式完工。隧道建於本州與九州之間嘅關門海峽海底，內裡設有車輛專用隧道，以及行人・單車專用隧道（關門隧道行人道）兩種隧道。行人道深度為55m～60m，從地面入口搭𨋢，出𨋢後會到達海底。隧道全長780ｍ，需步行15分鐘左右。
關門隧道亦係山口縣一大人氣旅遊景點，您甚至會見到當地人經常喺到跑步或散步，非常有趣！
關門海峽每年8月13日都會舉辦花火大會。下關市與位於關門海峽對岸嘅北九洲市門司兩個地方將合共燃放1萬5000發煙花，為夏天夜空增添美麗色彩。
關門隧道行人道
- 地址：山口縣下關市三茂川町22
- 交通方式：JR下關站搭巴士約10分鐘
- 可通行時間： 06:00～22:00
- 料金：徒步免費，單車20日圓
櫻花名勝景點？當然有
唔少人去日本都會想睇櫻花靚景，當然下關亦唔例外！縣內推薦嘅賞櫻好地方，就係戰場原公園。每到4月上旬，園內大約350株染井吉野就會一同盛開，相當吸睛。
由於公園位於高地上，所以從展望臺亦可以眺望到下關市街景色喔。
戰場原公園
- 地址：山口縣下關市後田町5
- 交通方式：從JR下關站乘搭山陽本線到幡生站，從車站步行18分鐘。
下關必食！從新鮮海鮮到特色美食都相當吸引
被海包圍著嘅下關，係一個擁有新鮮海鮮嘅聖地，當中當然包括相當著名嘅河豚（又稱為雞泡魚）。小編即刻同大家分享，究竟去下關有咩必試美食。
1. 下關必食河豚料理！
下關擁有日本唯一專門經營河豚嘅市場南風泊市場。據聞日本國內所捕獲嘅河豚當中多達80%都會聚集於此，就知道市場有幾巴閉！拜豐富漁穫所彫，下關亦因此發展出多間提供新鮮河豚菜式嘅店舖。河豚時令期間係9月下旬至翌年2月，刺身、鍋料理、壽司…淨係諗起都已經流晒口水了。
2. 員工超親切！掃海鮮必去唐戶市場
唐戶市場內匯聚豐富魚貝類及農產物，除咗河豚、仲有鯛魚、鰤魚等多種不同魚鮮。
遊客嚟到市場，唔單止可以買到又平又正嘅美食，員工仲出晒名超級親切。顧客可以一邊購物，一邊同員工有講有笑。您都不妨問吓員工點樣可以將魚煮得更好味，打聽一下更出色嘅烹飪方法喔。
每逢星期五・六・日與公眾假期，市場都會舉辦以海鮮美食作為主題嘅飲食活動，非常推薦睇準舉辦時機去朝聖。多款著數價值就可以入手嘅新鮮魚鮮壽司等美食，您又點可以錯過？
唐戸市場
- 地址：山口縣下關市唐戶町5-50
- 交通方式：從JR下關站搭巴士10分鐘
- 營業時間：星期一～星期六：05:00～15:00、星期日・公眾假期：08：00～15:00
- 飲食活動：星期五・六：10:00～15: 00、星期日・公眾假期：08:00～15:00
3. 下關當地美食「瓦片蕎麥麵」
下關必食嘅除咗海鮮，近呢幾年亦出現一款超級吸睛嘅全國知名美食－瓦片蕎麥麵。瓦片蕎麥麵喺新垣結衣所出演嘅日本人氣電視劇《逃避雖可耻卻有用》（2016年播出）中登場後，知名度瞬間爆升，一躍成為全國知名美食。
瓦片蕎麥麵係一道於加熱好嘅瓦片上，放上炒好嘅茶蕎麥麵（於蕎麥粉中加入抹茶製作而成嘅蕎麥麵）、肉、葱等食材嘅美食，再喺食材上擺放檸檬與紅葉泥（白蘿蔔泥和辣椒混合而成），一般會配上蕎麥麵專用沾麵醬汁享用。
據聞，瓦片蕎麥麵嘅發源地係位於下關溫泉街、川棚溫泉內嘅蕎麥麵店「元祖瓦蕎麥麵」。現時山口縣內有多間提供瓦片蕎麥麵嘅店家，您仲可以買返個瓦片蕎麥麵套餐作為山口縣手信，咁特別嘅蕎麥麵就梗係要食完又買返屋企慢慢嘆啦！
Comments