FUN! JAPAN編輯部，就猶如一個小型國際大使館。
印尼、泰國、臺灣、香港、中國，以及越南。一班嚟自東亞・東南亞嘅精英們（自吹自擂）齊聚一堂，組成國際色彩豐富嘅隊伍。當中既有居日大前輩，亦有日文屬菜鳥級嘅小編。但係，所有人都有一個共通點ー
就係一開始去到日本嘅時候，都曾經感受過唔少文化衝擊。
小編決定要將佢哋嚟到日本後，覺得驚訝・感動・不可思議嘅小故事一舉公開。相信聽完佢哋嘅故事後，尤其係嚟自同一個國家嘅讀者們，一定會引起強烈共鳴！
顛覆至今為止嘅印象！日本旅行與真實日本社會之大不同
日本旅行（以日為單位）vs日本生活（以月・年為單位）。
昔日嘅日本短期旅遊，每分每秒都係讓人目不暇給嘅美好時光。只不過，一旦開始喺日本紮根，就會發現原來有好多嘢，一直以嚟都無察覺到…
「因為日本係一個人口密度高嘅國家，所以我以為大部分地區都係都市，但無諗過除咗高山、森林比想像中多之外，面積仲好大，讓我非常驚訝。特別係對於熱帶氣候地區成長嘅人嚟講，一定會對日本嘅氣候溫差方面感到驚訝。」（印尼・男性）
「嚟到日本之後，我對四季變化方面感到驚訝。櫻花、雪、春天花粉症、冬天乾燥氣候…根據唔同地理環境，原來氣候及四季變化係可以咁唔相同！雖然喺臺灣嘅時候與花粉症無緣，但自從居住喺日本第5年開始，就開始同花粉症進行苦戰。」（臺灣・女性）
「喺路上會經常出現飲到爛醉如泥嘅人，呢個情景無論見到幾多次，都覺得非常震驚。真係唔明點解日本人要飲咁多……」（越南・女性）
相關文章：
生活環境習慣嘅不同之處仲多過多啦A夢（叮噹）法寶！
出生國家唔一樣，文化當然亦會有所不同。
究竟喺有如四次元百寶袋嘅日本街道上，隱藏著咩文化差異與讓人驚訝嘅小故事呢？小編決定從與多啦A夢法寶數量旗鼓相當嘅小故事中，挑選出大家異口同聲表示驚訝嘅精選內容同讀者們分享－就係關於交通禮儀與日本廁所方面嘅習慣！
〈交通禮儀篇〉
「喺臺灣，的士門係唔會自動開關，所以一定要手動開關車門。我啱啱嚟到日本嘅時候，並唔知道日本的士車門都會自動開關，因此有一次當我擅自伸手去閂車門後被的士司機派嬲嬲之後，先知日本嘅的士門原來係自動門呢。」（臺灣・女性）
「喺臺灣，基本上係車比人優先，但日本原來係會出現車讓人嘅情況。我啱啱嚟日本嘅時候，因為唔係好習慣車會讓路畀自己，所以曾經多次停低同車輛互相讓嚟讓去。」（臺灣・女性）
「香港基本上都係以車輛優先，但係當交通燈轉為綠燈嘅情况下，係唔會有車駛過。我啱啱嚟日本嘅時候，曾經試過交通燈明明係綠色，但都會有車轉彎駛過呢個情況，頓時嚇到個心離一離呢。」（香港・女性）
「喺日本，好多人搭巴士嘅時候，都唔會主動讓座畀老人家及孕婦（無視、扮瞓、玩手機）。越南嘅話，會有巴士乘務員（銷售巴士車票嘅工作人員）在場，當老人家上車之後，會向年輕人催住咁講『快啲起身喇！』，大家都（被逼）養成自動起身讓座嘅習慣。」（越南・女性）
〈廁所二三事〉
「嚟日本之前，我係完全無見過免治馬桶（日本稱為溫水洗淨便座）。泰國嘅廁所一般係西式廁所，馬桶旁邊會設有水槍，用作洗pat pat時使用。」（泰國・女性）
「好驚訝可以直接將廁紙掉入馬桶。因為泰國係唔會直接將廁紙掉入馬桶沖水，所以第一次嚟日本嘅時候，唔知將廁紙掉去邊度好。」（泰國・女性）
相關文章：
日本人係咪工作過度？
日本職場文化，絕對係一大經常被海外打工仔談論嘅話題（好嘅方面與壞嘅方面）。
「喺日本，公司一般都會承擔員工由屋企去到公司嘅交通費，真係好開心。」－有人認為車費由公司支付可以幫員工慳返唔少錢；另一方面，就如「過勞死」一詞所示，好多人對日本嘅工時長、OT多等長時間工作方面抱有負面印象（FUN！JAPAN係良心企業，唔使擔心！）。咁究竟編輯一部一班員工又點睇？即刻去比較一下各國嘅職場文化啦。
「日本與臺灣相比，無論係公眾假期、有薪假都意外地多。除咗年末年始、盂蘭盆節、暑假等，每年都會有16日日本公眾假期（日本稱為國民祝日）。相比起臺灣就每年只得8日（農曆新年，政府規定補假之外）。根據唔同公司，仲會有盂蘭盆節假期及暑假，有薪假日數亦比臺灣多。」（臺灣・女性）
「越南嘅話，一般食完Lunch後、下午工作時間之前，大家都習慣會先瞓一陣晏覺。好多人都係趴喺檯上面瞓，屋企近嘅話就會返屋企抖完再返公司繼續做嘢。雖然日本都會瞓晏覺嘅人，但係大部分人都係出去食完Lunch再返嚟即刻開工，集中力真係好強大呢。」 （越南・女性）
「日本就算打風、遇上颱風正面吹襲，公司都係無假放。喺臺灣，如果打風嘅話，只要風力同雨量達到一定標準，地方政府就會發佈『颱風假』，宣布停工停課。日本方面，判斷是否停工停課嘅單位並非地方政府，而係多數係交由市村町、公司及學校去決定。」 （臺灣・男性）
「日本過年情况同臺灣完全相反。因為臺灣有很多人會喺年末年始期間放假，所以店舖同旅遊地區基本上係唔會休息，維持營業；但係日本嘅店舖或旅遊地區，反而會喺呢段時間選擇暫停營業。」 （臺灣・女性）
相關文章：
喺日本居住太耐反而出現「逆文化衝擊」！？
或者係因為完全習慣晒日本嘅生活，一旦回國就會面臨「逆文化衝擊（*1）」。如果認真細數嘅話，或者會沒完沒了，數極都數唔完…
*1：結束異國生活後，返到去原本熟悉嘅環境時，所感受到出現喺文化與環境上嘅不協調、衝擊感。
「一開始覺得日本人用餃子送飯呢個習慣好怪，但而家喺食餃子嘅時候，反而會不由自主地想要碗飯。（笑）」（香港・女性）
「喺日本已經習慣直接打開水龍頭飲自來水，就算返到去臺灣嘅時候，都差啲直接飲水龍頭嘅自來水！（要留意台灣自來並非可以直接飲用嘅水質）」（臺灣・男性）
「泰國嘅百貨公司同海灘嘅廁所都係要收費。另外，亦有廁所係唔提供廁紙。」（泰國・女性）
「逆文化衝擊之一，係原來泰國嘅電車、巴士都唔會準時到達！最近同朋友一齊玩嘅時候，亦有人遲到30分鐘以上…」（泰國・男性）
「每次去完廁所，要處理廁紙嘅時候都會停一停，諗一諗。『咦？究竟係直接沖入廁所定係掉入垃圾桶？』。」（臺灣・女性）
「日本人個性相當體貼，好為對方著想，無論事無大小都會馬上講『對唔住』。離開日本去其他國家嘅時候，不知不覺間就會將『對唔住』掛喺口邊，無意間地多次為對方帶嚟罪惡感…」（印尼・女性）
如果您對以上小故事，感覺到一點點共鳴嘅話，記得喺右邊留言話畀小編知喔！
Comments