相信有唔少讀者都會擔心新年期間去日本玩，會遇上百貨公司或餐廳放新年假，所以去唔到自己想去嘅舖頭…的確喺日本新年期間，好多舖頭都會休息，但亦都有好多舖頭係照常營業架！只要事前精明規劃行程，就算新年期間都可以享受到喺日本購物「食好西」嘅樂趣～！
大型電器舖同埋家電零售店係全年無休！
大型電器舖，例如BicCamera或Yodobashi Camera雖然會縮短營業時間，但係跨年期間係唔會休息。如果你想行家電零售店，激安之殿堂-唐吉軻德嘅銀座店本館或淺草店等店舖都係24小時營業，而且喺新年期間亦會照常營業。所以其實只要揀啱舖頭，就唔會遇到舖頭閂門無得瘋狂購物嘅問題。特別喺1月1日，唔少店舖都會大搞過年大特賣會，話唔定仲可以買到特價貨呢！
如果唔知道要食啲咩，最好揀Family Restaurant或者連鎖居酒屋！
除咗「ガスト（Gusto）」或者「ジョナサン（Jonathan‘s）」之類嘅Family Restaurant（日式連鎖家庭餐館）以外，「北の家族」或「磯丸水産」等連鎖嘅居酒屋亦係24小時營業，而且喺跨年期間都唔會休息。又例如大受遊客歡迎嘅「一蘭拉麵」，亦有部份分店，包括「澀谷店」、「新宿中央東口店」等係24小時營業，跨年期間一樣唔會休息！
參加日本年尾同新年期間嘅特別活動
唔少觀光景點都會趁日本新年期間額外舉行應節活動。例如喺池袋SUNSHINE CITY入面嘅「ナンジャタウン（nanja town）」，就會喺12/31當日會舉辦跨年活動，邀請搞笑藝人到現場表演，亦會特設跨年倒數舞台！
亦會有好多人趁1月1日，去東京鐵塔、六本木Hills、東京晴空塔等景點，觀望新一年嘅「第一道晨光」，所以無論係東京鐵塔、六本木Hills或者東京晴空塔都會有大批人潮，搶住上觀望台。另外，相信大家都知道日本人喺新一年開始時，會去神社進行「初詣参拝（新年第一次參拜）」，因此明治神宮、淺草寺等著名熱門神社，每年都係大排長龍呢。
雖然日本喺跨年期間確實會有部分舖頭休息，但係亦正因為喺年尾／新年期間，先至可以享受跨年期間有嘅特別活動。唔知過去曾經有去過日本跨年嘅讀者，各位又有咩推介嘅慶節方法呢～？
Comments