梅雨季過後，就係時候張開雙手迎接可以盡情同陽光玩遊戲嘅夏天喇！
暑假絕對係飛日本大玩特玩嘅好時機，但係夏天旅行最怕遇上颱風，令預先Plan好嘅行程充滿「天氣不似預期」嘅變化。試想像一下，明明訂好晒機票住宿，滿心歡喜期待即將要出發去日本之際，卻見到天氣預報話海面上有個熱帶低氣壓形成，而且發展成颱風嘅可能性極高，自然會令人搶心事前規劃好嘅旅程會唔會就咁化為烏有？！
今次小編會介紹有關日本颱風嘅小知識，分享一下當飛日本旅遊時，遇上颱風應該點算好！
關於颱風
「颱風」即係指發生喺西北太平洋及南中國海，而且最大風速（10分鐘內平均風速）約達17m/s以上嘅熱帶低氣壓，日本一般會以「規模大細」及「強度」區分颱風威力。
以「強度」區分
- 強：最大風速33m/s以上〜未滿44m/s。
- 非常強：最大風速44m/s以上〜未滿54m/s。
- 猛烈：最大風速54m/s以上。
以「規模大細」區分
- 大型：風速15m/s以上、暴風範圍半徑500km以上〜未滿800km。
- 超大型：風速15m/s以上、暴風範圍半徑800km以上。
日本7月至10月期間颱風最多。每逢颱風來臨，就必須隨時留意交通工具係咪正常行駛，以及旅遊設施嘅營業時間亦有可能會有所調整。
無情嘅颱風唔單止擾亂旅程，更為日本各地帶嚟唔少災情。例如，2019年第15號颱風法茜登陸日本千葉，當地受到狂風暴雨摧殘。強風導致千葉縣多數房屋屋頂被吹起，造成無瓦遮頭等房屋災害，更引發大規模停電。同年，第19號颱風海貝思破紀錄嘅雨量導致各地河川氾濫、堤防潰堤，多處出現水浸、土石崩落等災情，除停電、停水等民生問題，鐵路電車亦出現停駛等眾多交通癱瘓，為當地居民生活帶嚟重大影響。
一年有幾多個颱風登陸日本？
從1991年至2020年嘅30年之間，每年平均大約有25個颱風形成，當中接近日本範圍就大約有12個，其中3個左右曾登陸日本（參考資料來源：日本氣象廳「颱風統計資料」）。
初春颱風多數喺低緯度地區形成，往西即菲律賓方向前進；但一到夏天，形成緯度則會較高並沿著太平洋高壓邊緣行走，朝著台灣、日本等方向前進，一路北上嘅颱風就變多。
居然無颱風警報？！遊客應該如何自保？！
颱風對於日本人嚟講並唔陌生，但實際上日本係無颱風專屬嘅警報（類似香港嘅熱帶氣旋警告信號）！
每當颱風形成、接近嘅時候，就要打醒12分精神，隨時留意住日本氣象廳所公布嘅颱風中心位置、路徑、最大瞬間風速、暴風半徑、強風域等等颱風相關嘅氣象資訊。另外，當颱風越嚟越接近日本時，風雨漸強，亦會發佈大雨、暴風、暴潮等等惡劣氣候相關警報。大家必須小心留意各警報所屬嘅警戒級別，必要時採取適當嘅避難措施，以確保自身安全。
各階段警戒等級如下：
Level1（預警訊息）
表示未來5日內發布氣象警報嘅可能性，將早期預警訊息分為［高］、［中］兩階段。
- 理應採取嘅行動：提高防災意識，做好可能發生災害嘅心理準備
Level2（大雨、洪水或暴潮注意報）
危險指數（黃），發布大雨、洪水或暴潮等等注意報。
- 理應採取嘅行動：確認自身嘅避難動線。從潛在災害地圖等等確認自家等地受災風險，並再次檢視係咪已經確切掌握好避難路線等等避難所需資訊。
Level3（老年人等疏散避難）
危險指數（紅），發佈大雨（土砂災害）、洪水警報、氾濫警戒資訊等等。
- 理應採取嘅行動：將老年人或行動不便者等優先避難，遠離危險地方疏散至安全嘅地方。另外其他民眾根據必要狀況，停止日常行動，開始準備避難或自行避難。
Level4（避難指示）
危險指數（紫），發佈土砂災害警戒資訊、氾濫危險資訊、暴潮警報、暴潮特別警報等等。
- 理應採取嘅行動：所有人員儘速離開危險地區，前往避難。
Level5（緊急安全措施）
危險指數（黑），發佈大雨特別警報、氾濫發生訊息。
- 理應採取嘅行動：有生命危險！做好緊急安全措施！無法立即安全避難的話，生命就有可能處於相當危急嘅狀況。
但係，當警戒等級升至Level5時，表示災害已經發生，或狀況相當迫在眉睫。一旦發佈，可能為時已晚，趕唔切逃走，所以當警戒達到等級4時，為咗自身安全，一定要去避難！
颱風形成過後，會以咩風速接近，又會直擊抑或係擦邊而過等等路徑皆難以預測，再加上狂風暴雨可能釀成二次災害，事先做好防颱風準備就顯得相當重要。喺颱風形成、緩緩接近之前，確切做好防颱措施，例如修理好並加強門窗修補，執一執緊急避難袋睇吓有咩要補，買齊緊急用嘅食品或水等等。另外，颱風吹襲下伴隨著強烈風雨，街外活動基本上變得十分危險，最好留喺室內以策萬全。
颱風下嘅種種影響
颱風所帶嚟嘅風雨影響會導致交通停駛、旅遊設施暫停營業等等多種影響。若果颱風咁啱揀正您要踏上飛去日本，或飛返香港嘅當日，記得要向航空公司問定有關航班延遲、停飛或變更等等相關資訊。
如前往目的地嘅交通工具有所影響，可以喺「乗換案内」網站查詢有關各大鐵路或新幹線遲開、停駛等相關交通狀況資訊，或者直接詢問各大交通公司嘅客戶服務處。
颱風用語小知識—咩叫「上陸」？「颱風銀座」？
跟著落嚟會為大家介紹颱風相關詞彙與小知識。
上陸（登陸）
日本「上陸（登陸）」一詞指嘅係颱風中心抵達日本本土（北海道、本州、四國、九州等等）海岸嘅時候先至會使用；而「通過」指嘅係颱風嘅中心橫越過小島或半島，短時間之內又再次返回到海上。
因此，每當颱風侵襲沖繩，就唔會講颱風「登陸」，而是講颱風「通過」。另外，無海岸線嘅都道府縣嘅登陸次數亦會係0次。
颱風銀座
大家有聽過「颱風銀座（台風銀座）」呢個詞嗎？「銀座通（銀座通り）」嘅意思係有好多人來來去去，人來人往嘅熱鬧街道。因此「颱風銀座（台風銀座）」即係話颱風經常通過，容易受災嘅地區，多數係指沖繩、九州、四國，甚至係近畿地區。
日本人喺颱風天仍無懼風雨去返工！？
雖然日本經常有大型颱風接近、登陸，特別喺九州地區、沖繩，颱風更加係夏天嘅常客，但日本無颱風假嘅情況卻比比皆是。
出晒名工作認真嘅日本人，當中有唔少人認為即使喺颱風天都要正常返工。如果電車有可能因為颱風影響而停駛，有唔少日本人為咗返工會選擇喺颱風來襲嘅前一日，入住公司附近嘅旅館、酒店，以確保第二日可以順利去公司工作。不過，近年隨著時代變化，以上提到嘅不成文規定亦漸漸出現變化，唔少人都開始認為颱風天都係留守家中會比較安全！
Comments