冬去春來，每當換季時，日本大街小巷嘅店舖內都會有大堆「花粉」相關商品陳列於貨架上。對於日本人嚟講，春天可謂一個令人又愛又恨嘅季節，「愛」係因為正值欣賞櫻花嘅時節，「恨」卻係因為唔少人都會受「花粉症」之苦，需要依賴各種商品，例如戴口罩、戴眼鏡、食藥等等，為求稍微減輕症狀。到底我哋成日聽到嘅「花粉症」係乜東東呢？以下文章就為大家一解「花粉症」之謎！
何謂花粉症？
花粉症係一種人體對於花粉所引起嘅過敏反應，除咗打噴嚏、流鼻水、鼻塞之外，仲會出現各式各樣嘅症狀，例如係眼睛痕癢、流眼淚、甚至肌膚粗糙等等。特別係正值春天，杉樹花粉等四處飛散嘅時期，就更係引起過敏反應嘅罪魁禍首，但只要過咗呢個時期後，就幾乎唔會再出現任何症狀。順帶一提，杉樹花粉症係日本當地特有花粉症，據講目前日本人口當中，就有約20％都係患者！連帶長期住喺日本嘅外國人都會花粉症發作，甚至連動物園馬騮、養喺室內嘅貓咪都深受其害呢。
花粉症發作時期
受花粉症之苦嘅人數主要於春天與秋天明顯增長，而花粉飛舞嘅時期亦會因應植物種類、地區有所不同。春天花粉症嘅原因，主要來自杉樹花粉，以及檜木等樹種嘅花粉。以上樹木嘅花粉會乘風飛到幾十公里、甚至幾百公里之遠，因此即使係杉樹、檜木稀少嘅城市地區都會飄來大量花粉。另一方面，秋天花粉症嘅代表則係豬草、艾草等草類花粉。每年9月左右，都係草類花粉嘅散佈高峰期。
花粉症由幾時開始？
花粉症嘅歷史，可以追溯到公元前1800年代巴比倫尼亞（即現時伊拉克南部，底格里斯河與幼發拉底河下流地區）嘅咒文，上頭就已經記載著類似花粉症嘅症狀。而季節過敏性鼻炎與花粉症之間嘅關係，則係到咗19世紀時先至明朗化。當時嘅英國，每逢夏天都會有好多人出現類似感冒嘅症狀，而患者幾乎都從事畜牧業，出現症狀時啱啱好就係牧草收割時期，因此症狀就被稱為「hay fever（乾草熱、花粉熱）」。
日本最早出現嘅花粉症報告病例，係1961年首宗豬草花粉症。杉樹花粉症係2年後嘅1963年，果園草則係1964年，然後再到1969年接獲艾草花粉症病例。據報告顯示，至今為止一共有大約60種植物會引起花粉症。
北海道、沖繩不在杉樹花粉症受害範圍？
除咗部分區域之外，杉樹幾乎無法於北海道自然生長，因此越往北上，杉樹花粉就越嚟越少，沖繩情況亦一樣相同。杉樹及檜木數目與日本本州相比，壓倒性地稀少，因此上述地區居民甚少會有杉樹花粉症嘅煩惱。
睇到呢到，可能有人都會心諗：「遊客去日本旅行會患上花粉症嗎？」當花粉進入人體後，份量必須超過一定水準，過敏反應先會發作，因此短期逗留喺日本嘅人大可以放心，完全唔需要擔心花粉症發作！
Comments