日本有多個景點獲選為世界遺產，自然景色、歷史建築、村莊部落等。當中，「日本城堡」，不單止由過去傳承至今，其存在係非常珍貴，更係無可取代嘅寶物之一。今次FUN! JAPAN編輯部要向大家介紹被聯合國教科文組織（UNESCO）列為世界遺產，著名嘅日本城堡同城跡！
日本唯一單以城堡獨立建築獲選為世界遺產嘅「姬路城」
姬路城係日本最具代表性嘅城堡之一，亦係日本國寶，係現存12座天守當中最大嘅一座。1993年12月，與奈良法隆寺一齊被列為日本首個聯合國教科文組織（UNESCO）嘅世界遺產。純白嘅土牆包圍下，宛如白鷺飛舞身姿嘅優美外觀，令人情不自禁影到唔停手，想將眼前呢座城嘅美態永久收藏於相片上。春天櫻花盛開、秋天紅葉環繞，更加增添姬路城嘅美麗，令人流連忘返。
- 想睇更多有關姬路城介紹：【日本兵庫】400年歷史國寶級建築—兵庫縣世界遺產「姬路城」
屬於「京都古城歷史建築」嘅一部分「二條城」
從794年至1868年，京都都係日本首都，亦係天皇居住嘅地方，除咗武士政權時期曾經將政治中心轉移到鎌倉、江戶之外，京都向來係日本文化、經濟、政治嘅中心，繁榮昌盛逾千年之久，至今仍保留眾多文化財產，可以窺探得到各個時代建築特色。以京都市為中所建造嘅17座寺院、神社等建築，無論係歷史定景觀，都有好重要的價值，於1994年，以「京都古城歷史建築」列入聯合國教科文組織（UNESCO）嘅世界遺產。呢啲京都故城歷史建築，包括咗建於公元8世紀嘅東寺、清水寺、平等院，以及佇立於廣闊土地上，仍然保留昔日華麗風貌嘅「二條城」。二條城，更加係江戶時代開始同結束嘅舞台，見證咗江戶時代嘅興起與沒落。
「琉球王國嘅聖地遺跡與相關建築」
分布於沖繩嘅「琉球王國聖地遺跡與相關建築」一共有9個景點，喺2000年被選為世界遺產，係日本第11項世界遺產。呢9個景點包括首里城跡、金歸仁城跡、座喜味城跡、勝連城跡、中城城跡、園比屋武御嶽石門、玉陵、識名園、齋場御嶽。順帶一提，「琉球王國聖地遺跡與相關建築（琉球王国のグスク及び関連遺産群）」中「グスク」係「城堡」嘅意思。
首里城跡
「琉球王國聖地遺跡與相關建築」當中，最搶眼嘅存在就係首里城跡。首里城正殿唔單止係沖繩最大嘅木造建築，更表現出當時琉球人嘅智慧，除咗融匯咗日本與中國建築風格，仲凸顯沖繩文化獨特性。好遺憾地，2019年喺首里城跡上重建嘅建築慘遭大火肆虐，正殿、北殿以及南殿等建築幾乎全數焚毀於大火之中。而
- 更多有關首里城跡介紹： 沖繩「首里城公園」推薦遊覽路線！保證您可以更有效率玩首里城！！
今歸仁城跡
今歸仁城過往係沖繩縣縣內最大規模嘅城。公元14世紀琉球王國三山時代，係三山勢力之中北山王嘅城堡，所以亦稱為「北山城」。位於海拔約100米之處，岩石城牆長約1,500公里，並使用最古老堆疊工法「野面壘砌」。呢度種植咗緋寒櫻（山櫻花），係沖繩縣出名嘅賞櫻景點，每年1月底至2月，緋寒櫻盛開時期，都會吸引唔少人嚟欣賞櫻花。
- 更多有關今歸仁城跡介紹： 今歸仁城跡：沖繩世界遺產、著名賞櫻勝地
勝連城跡
勝連城以阿麻和利嘅居城聞名，阿麻和利曾起兵叛變琉球王府。勝連城利用天然地形優勢，建造於斷崖之上，易守難攻，係一座難以攻陷嘅城堡。勝連城城牆呈現出優雅柔和嘅曲線，就好似女性優美線條，具有獨特又顯著嘅特色。登上勝連城嘅最頂端，一望無際嘅太平洋就會映入眼簾，仲有閃耀蔚藍嘅海面，令人心曠神怡。呢度係沖繩屈指可數嘅旅遊勝地。
- 更多有關今歸仁城跡介紹：勝連城跡：沖繩世界遺產當中最古老嘅城跡
中城城跡
沖繩城堡當中，中城城跡因原貌保存得最為完整而聞名，可以欣賞到城跡有彎彎曲曲嘅曲線石牆，用咗精巧砌石技術建成嘅拱形城門等。中城城跡嘅景色亦非常優美，企喺石牆上，望可西邊可眺望東海、望東邊就欣賞到太平洋。萬里無雲之下，仲可以遠眺到太平洋上零星島嶼。中城城跡位於海拔150～170米嘅山丘上，東南方係超過15米高嘅懸崖峭壁，西北方係相當傾斜嘅斜坡，可以講得上係一座易守難攻嘅城堡。
- 更多有關中城城跡介紹：沖繩「中城城跡」魅力徹底介紹！親眼見證雄偉巨型石牆！
座喜味城跡
座喜味城跡現今仍然保留著美麗曲線嘅石牆和拱式城門，而座喜味城嘅拱式城門，更相信係沖繩現存最古老嘅拱門。去到座喜味城，可以走上城牆，眺望四周景色，體驗居高臨下嘅魅力，望向南邊係那霸首里城，望向北邊就係本部半島、伊江島，望向西邊最遠可以眺望到慶良間群島，景色美不勝收。
- 更多有關座喜味城跡介紹：座喜味城跡：擁有優美曲線石牆嘅沖繩世界遺產
「長崎地區隱藏的基督教遺址」相關遺址之一「原城跡」
2018年6月30日「長崎地區隱藏的基督教遺址」被聯合國教科文組織（UNESCO）列為世界遺產，包括日本國內現存最古老教堂「大浦天主堂」、發生島原之亂嘅舞台「原城跡」等等12處景點。原城於公元1599年至1604年，係由天主教大名有馬晴信所建造嘅城堡，更加係日本禁教初期，隱藏喺島原及天草地區嘅吉利支丹(吉利支丹係日本16至19世紀對基督教信徒嘅稱呼)群起反抗，爆發「島原之亂」主要戰場，最有名事蹟係當時以天草四郎為首嘅3萬7000人，困守原城長達88日。
Comments