今歸仁城跡：沖繩世界遺產、著名賞櫻勝地

今歸仁城遺址係位於沖繩縣國頭郡那歸津村嘅著名城堡。城堡歷史最早可以追溯到13世紀，遊客現時則可以喺城內欣賞到修復後嘅城牆、石牆以及大門等各種遺跡。古城同時亦係沖繩著名嘅欣賞櫻花同海景勝地。

今歸仁城跡特色

今歸仁城遺址係一座極具歷史價值嘅城堡。古城於2000年作為「琉球王國城跡及相關遺產群」被登錄於世界遺產，六年後更被選為日本百大城堡之一。

今歸仁城遺址與沖繩首里城大小相約，總面積約為5公頃。

今歸仁城遺址係一座由七個城郭所組成嘅廣闊城堡廢墟，包括外郭、城門以及村落遺址標記在內，城內共有超過12處值得一睇嘅景點。其中位於今歸仁城後門嘅「志慶真門郭」，就係一處保留著原始樣貌嘅珍貴景點。城堡邊界處嘅石牆亦呈現出相當迷人嘅曲線美。

除咗精緻石牆，遊客亦不容錯過從城堡眺望到嘅壯麗景色。據講城堡中間於古時曾有一個圍繞著北殿嘅「大庭」，而位處比北殿更高位置嘅「御內原」，就係城堡睇景嘅最佳觀景點。今歸仁村、國頭山不在話下，晴朗天氣下您更可以眺望到鹿兒島離島與論島與無敵大海景𠻹。

難得一場嚟到今歸仁城遺址，不妨再順便參觀埋相關設施吖！遊客可以到「今歸仁村御城交流中心」內嘅休憩區購買門票，參觀關於世界遺產以及今歸仁城遺址嘅解說影片；從休憩區再沿路前進，則可以欣賞到「今歸仁城遺址室外模型」，確認您目前身處城堡遺址內嘅位置，同時亦可以查看城內各處祭祀神明嘅地方。

參觀完今歸仁城遺址後，您可以前往今歸仁村歷史文化中心。中心位於今歸仁村城堡交流中心旁邊，遊客可以喺中心內欣賞今歸仁城遺址出土陶瓷以及其他今歸仁村出土文物。

每年1月下旬至2月上旬，今歸仁城跡都會舉行「今歸仁城櫻花祭典」。祭典期間，平郎門前廣場及今歸仁村城交流前中心廣場前會上演傳統表演藝術，並設有沖繩傳統服飾試穿體驗；入夜後城牆則會亮燈，營造出夢幻景象。屆時從平郎門到城堡內嘅一段步道亦會點上燭光，相當值得一睇！

今歸仁城遺址係著名嘅賞櫻景點。從平郎門到大隅（戰時飼養戰馬、訓練兵隊嘅地方）嘅753級樓梯參拜道兩旁都會開滿寒緋櫻。親眼見證著眼前一片色彩艷麗嘅粉紅櫻花，相信您一定都會對佢嘅姿態驚嘆不已！