位處沖繩本島中部嘅「中城城跡」係一座建於琉球時代嘅城堡。古城位於標高150至170米嘅石灰岩丘陵上，特徵為利用天然岩石與地形巧妙構築出具有優美曲線嘅城牆，從東北到西南幾乎呈一直線；而古城所在位置嘅南側為斷崖、西北側則呈陡峭斜面，建築結構上可謂易守難攻！
古城於2000年作為「琉球王國城跡及相關遺產群」獲登錄為世界遺產。沖繩內現時共有首里城等5座城堡被登錄為世界遺產，不過除咗首里城之外，其他城堡都如中城城跡般，現時只剩低殘留下來嘅石牆。
中城城跡必睇魅力之一：晴天視野非常好！
中城城跡位於海拔約160米高嘅山丘上，四周幾乎無遮擋，因此視野非常開揚。西側可以眺望東海、東側可以遠眺太平洋（中城灣），晴朗天氣下更可以將周遭島嶼一覽無遺！特別推薦由「二之郭」城牆上眺望到嘅絕景。
中城城跡必睇魅力之二：令人驚嘆嘅石造建築
中城城跡第二個必睇特色，就係其獨特石造建築。遊客可於中城城跡內見到年代各異嘅3種石砌技術：例如南郭就採用將天然石頭按原本樣貌直接堆砌而成嘅「野面堆砌法」、一之郭及二之郭使用切割成方形嘅石塊堆砌出「布捆堆砌法」、三之郭及北之郭則使用多邊形石塊堆砌出「相方堆砌法」。順帶一提，城牆係以一種名為「琉球石灰岩」建成，呢款由珊瑚石灰質堆積而成嘅石頭，係沖繩獨有㗎！
中城城跡必睇魅力之三：堅固主城門
圖上被兩側突出嘅石牆夾著嘅，就係古城「正門」。有別於大家所認知嘅拱門，佢係一款兩側都設有石牆嘅城門。
中城城跡觀光注意事項
中城城跡佔地廣闊，城跡內設有電動車單程接駁服務，接載遊客從入口到城門。因城跡內有眾多上落斜坡及梯級，因此建議最好準備運動鞋等舒適又耐用嘅鞋款再前往。
前往中城城跡嘅交通方式
遊客如欲前往中城城跡，可選擇揸車或乘搭巴士兩種方式。從那霸機場揸車約需35～40分鐘；如果搭巴士，您可以從沖繩都市單軌電車(Yui-Rail)旭橋站那霸巴士總站上車，然後於「中城小學校」巴士站落車。落車後到城跡需走大約2公里嘅登山道路，建議先換定舒適又耐用嘅鞋款，又或者直接從巴士站搭的士前往。
景點資訊
- 名稱：中城城跡
- 地址：〒901-2402 沖繩縣中頭郡北中城羽字大城503番地
- 交通方式：那霸機場→[駕車]35～40分鐘→中城城跡。或者，那覇機場→[沖繩都市單軌電車(Yui Rail)]10分鐘→旭橋站…徒步5分鐘…那覇巴士總站→[東陽巴士(30號)]約70分鐘→中城小學→[的士]約5分鐘
- 語言：提供簡體中文、英文、韓文導覽手冊
- 票價：400日圓
- 時間：8:30～17:00（5月到9月開放到18:00）
- 休息日：無休
Comments