「食」已經係遊客去日本旅行最期待嘅精彩環節之一。講到日本代表性嘅食物，大家可能會即時諗起拉麵、壽司、章魚燒等經典美食。只不過，其實日本每個都道府縣都有屬於自己當地嘅美食，飲食文化亦大不相同，去到邊都食到邊！今次編輯部就精選出幾款日本都道府縣嘅各地經典美食，下次日本之旅保證食得更地道！
北海道：拉麵口味多元化
北海道年中大部分時間處於寒冷、滿天白雪嘅狀態，講到北海道地道美食，梗係唔少得拉麵！
北海道拉麵有多款口味可以揀，當中以札幌拉麵最廣為人知。札幌拉麵屬於味噌拉麵，味道相當濃郁，拉麵上頭嘅粟米粒與牛油更加係不可或缺。想嘆返個夠地道又好味嘅札幌拉麵？不妨去鄰近狸小路商店街與薄野車站嘅拉麵橫丁行個圈覓食，內裡匯聚多間札幌拉麵任君選擇，絕對可以搵到一款啱您心水。
北海道除咗札幌拉麵，旭川拉麵亦相當出名。旭川拉麵特色莫過於會喺醬油湯底裡面放入一塊豬油，據聞起源係靠豬油於喺寒冷嘅天氣底下發揮保溫作用。北海道釧路當地嘅拉麵亦係以醬油為基礎，麵條最大特徵係極幼細嘅卷麵。另一遊客重點函館，則以鹽味函館拉麵而聞名。口味清淡卻風味絕妙，高湯多數係以豬骨與雞骨熬煮而成，湯頭既濃郁又鮮甜，令人一試難忘。
岩手：碗子蕎麥麵
大家應該對日本蕎麥麵唔會陌生，唔知您又有無聽過岩手縣嘅碗子蕎麥麵（わんこそば）呢？
碗子蕎麥麵係將蕎麥麵放喺一個個細碗仔裡面，每碗麵大概係可以一口份量，當您食完一碗，店員就會馬上以令人難以置信嘅「光速」配上獨特呼喊聲幫你加麵。如果唔想繼續食嘅話，就要睇準時機冚上碗蓋，趕唔切嘅話下一份蕎麥麵就會立即被加入碗裡面！碗子蕎麥麵食法既獨特又搞笑，過程就好似比賽咁，睇吓您加得快定係我食得快（笑）。
岩手縣內有多間餐廳提供碗子蕎麥麵任食放題，大家可以趁機挑戰自己極限，睇吓最多可以食到幾多碗（畀個數據大家參考，大概15碗碗子蕎麥麵就等於一碗正常蕎麥麵嘅份量）。據聞喺2019年嘅比賽當中，獲勝者竟然喺10分鐘裡面食完451碗，簡直令人難以置信！
茨城：納豆
納豆係日本國民早餐配菜，相信大家就算無食過都一定有聽過。日本國民食物納豆基於本身獨特嘅口感與奇特嘅味道，令到唔少人退舍三分，尤其係大部分遊客，根本唔會想將佢列入覓食清單中。
令人又愛又恨嘅納豆由發酵黃豆所製成，擁有獨特「香」味且黏稠又牽絲，但食法可謂相當豐富。當中，倒喺白飯上直接享用就係最經典嘅食法！日本全國又以茨城縣盛產納豆，品質極佳，下次有機會去茨城縣嘅話不妨試一試當地嘅納豆。如果您一開始被獨特「香」味嚇到彈開，建議可以畀多幾次機會佢，話唔定會一食就上癮呢；而若然您本身係一位納豆迷，就更加應該去茨城縣大嘆特嘆當地特產嘅納豆，仲可以順便參觀埋高野食品納豆博物館，了解納豆嘅歷史等相關知識。茨城縣有多間餐廳都會提供用納豆去烹調出嘅特色美食，鍾意納豆嘅您必定大飽口福！
東京：文字燒
講到鐵板上嘅麵粉美食，關西有「大阪燒」，關東非「文字燒」莫屬。好多人都會將「文字燒」與「大阪燒」混為一談，但其實「文字燒」並唔係「大阪燒」！
文字燒嘅製作過程非常獨特，先炒蔬菜、肉類等食材配料，然後做成一個空心大圓圈，再將高湯與麵粉攪勻後嘅麵糊慢慢倒入圓圈裡面。等麵糊煮滾之後，再將麵糊與食材配料攪勻並舖平煎好，最後就用「文字燒鏟」鏟著食。想要一嚐地道嘅文字燒，不妨去東京嘅月島文字燒一條街，裡面有多間文字燒專門店任君選擇，梗有一間啱您心水。
山梨：餺飥
可以飽覽得到富士山美景嘅山梨縣，一直係大家必去嘅日本景點之一。講到山梨縣當地美食，就不得不提麵條呈扁平狀嘅「餺飥」。
「餺飥」是怎樣煉成的？其做法為先加入山梨縣當地食材，例如南瓜、香菇、洋蔥等時令新鮮蔬菜，然後放入味噌去燉煮湯頭，最後加入麵條煮熟。「餺飥」料多營養又多湯底又正，索盡食材精華嘅扁平麵條，味道更甜更濃郁！聽聞「餺飥」更係江戶時代武士熱愛美食之一呢。推薦您如果去山梨縣嘅話，一定要試一試「餺飥」，無論係登完山，或者玩足成日攰攰地，甚至喺冬天凍凍地嘅時候嘆返個「餺飥」，絕對會令您嘅旅程更加分。
京都：懷石料理
懷石料理，唔單止望落精緻，食落味道亦相當細膩，係高級日本餐廳常見嘅套餐之一。懷石料理每道菜式都選用當季時令嘅食材，單單用肉眼望過去，每道菜式已經充分反映出當地季節嘅特色；外觀方面懷石料理更係「顏值」滿分，根據當季節重點精心設計擺盤等等，每一個環節都經過深思熟慮，務求完美呈現富有季節感嘅菜式，如秋季紅葉造型、冬季莓果等等。
懷石料理由寺廟菜式、茶道中嘅飯菜，演變成如今成為日本傳統經典嘅高級美食。到京都，又點唔可以試一試充滿歷史情懷，好睇又好食嘅懷石料理呢。
大阪：章魚燒
大阪被美譽為「日本的廚房」，美食多得好難揀一款去代表大阪！不過，小編就私心推薦「章魚燒」為大阪美食代表，相信大家都「英雄所見略同」吧？
章魚燒係由麵糊包著章魚嘅大阪街頭小食，淋上章魚燒醬、蛋黃醬、柴魚片、海苔粉等等增添風味。章魚燒賣相可愛香味濃郁，令人睇見就食指大動，未食先興奮。路上小販極速翻滾章魚燒嘅神技巧手法，簡直熟練到就好似耍雜技表演咁令人目不轉睛。順帶一提，大阪燒同炸串亦係大阪當地值得一試嘅地道美食喔。
兵庫：神戶牛
神戶牛油花分佈均勻，咬落入口即溶，亦係世界上最受歡迎嘅高級牛肉品牌之一。神戶牛出產自但馬和牛，簡簡單單煎成牛扒，就可以食到神戶牛最極致嘅美味，亦可放入壽喜燒、涮涮鍋享用。牛牛們雖然無專人每天提供按摩服務，但食得好瞓得好，而且經過最嚴格嘅品質測試，先可以達到神戶牛認證嘅最高標準，絕不馬虎。
山口：河豚
河豚（又稱為雞泡魚），係日本高級食材之一，由於河豚具有毒素，要食就一定要揀廚師經過認證嘅餐廳。負責河豚料理嘅廚師係需要經過多年培訓，通過考試等嚴格程序先會得到「河豚專業調理師執照」，要有專業牌專先至有資格去處理烹煮河豚，務求提供安全又安心嘅河豚界客人。日本80%嘅河豚嚟自山口，河豚日文係「ふぐ」，而山口縣叫「ふく」，諧音意思為「福」，引伸為招來福氣嘅含義。鍾意清淡鮮魚肉嘅您，絕對要出發一個山口縣河豚之旅喔。
香川：讚岐烏冬
日本四國香川縣當地特產「讚岐烏冬」相當聞名，由於香川縣縣民太熱愛烏冬，香川縣更被稱為「烏冬縣」，無論係產量抑或係銷量「讚岐烏冬」都位居日本第一。
「讚岐烏冬」食落口感既煙韌又滑溜，相當彈牙，其食法亦相當多元化。當中，最受歡迎嘅食法就係「釜揚烏冬」。「釜」意指「煮爐」，「揚」意指「搯」，顧名思義「釜揚烏冬」係指將烏冬煮熟之後直接從鍋中撈起，即撈即食，並無經過冰水冰鎮。「釜揚烏冬」通常會放喺木桶裡面，再跟一碗沾醬，簡單好滋味就係「釜揚烏冬」嘅精髓。
福岡：豚骨拉麵
湯頭濃郁、層次豐富、美味鮮甜，保證令人一啖食上癮嘅豚骨拉麵，係屬於九州福岡縣嘅當地美食。豚骨拉麵係用豬骨熬成嘅湯頭所製成，湯頭通常帶有油脂，再加上幼麵容易吸收湯汁，食落嘅每一口都令人回味無窮。雖然熊本麵、久留米等九州各地都有屬於自己風格嘅豚骨拉麵，但相比之下福岡嘅博多拉麵比較為人所知，亦被視為豚骨拉麵嘅經典。福岡縣內有超過1,700間拉麵店，間間都有屬於自己獨特風格嘅自家拉麵口味，絕對會搵到一款，甚至好幾款令您「食過返尋味」嘅豚骨拉麵。
沖繩：沖繩炒苦瓜
沖繩炒苦瓜係融合沖繩特有嘅當地食材所製作而成嘅地道美食，最適合夏天消暑開胃！沖繩炒苦瓜以沖繩山苦瓜、豆腐、豬肉以及雞蛋去炒出鹹甜略帶苦味嘅好滋味，用嚟「送飯」一流，令人忍唔住食完一啖又一啖，可能仲想添多幾碗白飯。
Comments