東京係日本嘅首都，亦係訪日外國旅客們最熱門嘅旅遊地之一。自1600年江戶幕府成立以來，東京就一直都係日本政治、經濟以及文化中心，如今更進一步繁榮發展成匯集現代觀光景點、傳統歷史景點等等各式各樣旅遊魅力嘅旅遊重鎮。
關於東京
東京位於關東地區南部。面積約2200平方公里，人口約1300萬，係日本人口最稠密嘅城市。（截至2019年11月資訊）
東京主要被分三個旅遊區：擁有各式各樣設施嘅東京市區「都心部分」、可以感受山區大自然氣息嘅「奧多摩地區」，以及有伊豆及小笠原等多座原始島嶼嘅「島嶼部分」。
東京晚上安全嗎？
夜晚嘅東京相對安全。根據英國《經濟學人》雜誌2019年一項調查指出，東京被評為世界上最安全城市之一。
基於2003年制定嘅「東京都安全・安心城市建設條例」(東京都安全・安心まちづくり条例)，東京內會有義工作日夜巡邏。部分人潮絡繹不絕嘅購物區，亦有警察巡邏並採取反恐措施。
2020年東京奧運
第32屆奧運會將於2020年假東京舉行。東京曾於1964年首次主辦夏季奧運會，因此本屆奧運會將會係東京第二次主辦。2020年夏季奧運比賽項目共有28項，您可以趁機欣賞世界頂尖運動員聚首一堂。
東京天氣
由於東京四季分明，因此欣賞日本獨特風景及品嚐美食亦係遊客一大樂事。本文將為大家介紹東京每個季節特色及旅遊注意事項。
春天（３月～５月）
於３月到５月春暖花開期間，您可以喺東京內欣賞到繁花爭艷鬥麗。屆時將會有櫻花、紫藤花等等相繼大放異彩，為春天添上美麗色彩。3月低於攝氏10度嘅日子比較多，但5月氣溫就會超過攝氏20度，建議隨身攜帶一件針織衫或薄外套注意保暖。如果係比較怕冷嘅朋友，可以在再喺外套下內搭保暖衣。
夏天（6月～8月）
東京嘅夏天潮濕悶熱，但同時亦係體驗多項傳統文化嘅最佳時機。遊客可於夏季期間穿上浴衣、參加七夕慶典，又或參加花火大會、逛逛廟會祭典。由於6月將進入梅雨季，因此最好手邊帶定把縮骨遮或或雨褸以備不時之需。6～8月平均氣溫為30度以下，而8月日頭氣溫則通常會超過30度，而且濕度頗高，所以夏天到東京觀光旅遊時，記得要隨時補充水分、做好防曬措施、必要時亦可擔遮防曬。
秋天（9月～11月）
日本人稱秋天為「食慾之秋」。顧名思義，您可以於秋天期間品嚐到各式各樣嘅食物，如當年種植收割嘅新米、伊勢龍蝦、水果以及各種新鮮蔬菜。秋天同時亦係欣賞楓葉嘅季節，雖然9月初天氣依然炎熱，但一踏入10月後就會遂日轉涼，直至11月平均溫度會低至攝氏13度。如果係比較怕凍的話，最好加件厚外套或披肩。
冬天（12月～2月）
日本嘅冬天十分寒冷、全國各地大雪紛飛係家常便飯，但與其它地方相比，東京會落雪嘅日子唔多、亦唔太經常出現積雪。聖誕期間嘅聖誕燈飾係日本冬天一大常見活動，大約從12月開始，東京街頭就會開始掛上五顏六色嘅燈飾照明，最適合影相打卡。東京冬天平均氣溫約為攝氏５度左右，打算冬天到訪東京的話，就要記得著上厚毛衣或羽絨外套喇！
東京10個必去地方
東京分成多個區域，以下將為大家推薦10個必去地方。
| 新宿 | 原宿 | 淺草 |
| 上野 | 秋葉原 | 銀座 |
| 澀谷 | 谷中 / 根津 | 台場 |
| 月島 |
新宿
新宿係同時擁有商業辦公區與購物區兩種面貌嘅地區。車站西側建有東京都政府大樓、酒店及辦公大樓。
而車站東側兩旁，則係百貨公司、時尚建築、餐廳及娛樂設施。入夜後新宿將展現一種截然不同嘅氣氛，搖身一變成為霓虹燈閃爍嘅閃爍購物區。
原宿
原宿充滿多間以“卡哇伊”（Kawaii）概念為主題嘅購物設施及餐廳，例如主要購物街「竹下通」內就林立著多間精品店及小食甜品店。
除咗購物，原宿亦係一種擁有豐富大自然嘅地方。推薦大家遊覽明治神宮及代代木公園等景點，以上地方嘅櫻花、菖蒲花等等花卉景觀都非常動人。
淺草
淺草係一個擁有眾多寺廟及神社嘅地區。 除淺草寺外，區內亦有矢先稻荷神社、淺草神社，以及遊客必到嘅淺草寺商店街。另外亦推薦乘搭隅田川觀光船，從河上遊覽淺草風光。
上野、東京晴空塔等等多個著名旅遊景點，亦係位處淺草周邊。
上野
上野係一個聚集博物館、美術館、動物園以及寺廟等多個觀光景點嘅地區。包含阿美橫商店街在內，區內一共有9條商店街。
上野恩賜公園係日本第一個城市公園，亦係著名賞櫻勝地及上野極具代表性嘅觀光景點。
秋葉原
秋葉原係日本首屈一指嘅電器街，區內駐有多間電子零售商，使其成為最適合購物電子產品嘅地方。
秋葉原同時亦係日本動漫及宅男文化聖地。街道上充斥著動漫角色廣告，亦有唔少人會喺街上cosplay。街上林立著多家充滿特色嘅店舖，例如充斥著遊戲及日本漫畫嘅專賣店，可以結識流行偶像嘅劇院以及可以體驗角色扮演嘅商店。
銀座
銀座係一處融合傳統與現代感嘅小鎮。主要街道「銀座通」係一個大型購物區，街上建有奢侈品牌商店及時尚建築。
銀座亦有多間餐廳提供各種美食，日式、西式以及中式美食應有盡有，當中更有唔少係米芝蓮星級餐廳。
澀谷
澀谷集時尚與美食等潮流最尖端於一身，區內有多座深受年輕人歡迎嘅設施，例如「109」大樓就係澀谷象徵。
「澀谷十字交叉路口」係東京地標之一，行人過馬路時嘅光景尤其震撼可觀。即使非假期祭典嘅日子，街上亦充滿熙來攘往嘅人潮，好多外國遊客第一次親眼見到時都會留下深刻印象。
谷中 / 根津
谷中與根津都保留著1900年代中期東京嘅街景風貌。喺充滿昔日特色嘅「谷中銀座商店街」散步時，您更可以一嚐買小食掃街嘅滋味。
此外，區內亦有多間美術館、博物館以及墓地及神社等歷史景點，非常適合踏上一趟藝術之旅。
台場
台場係面向東京灣嘅海濱小鎮。區內雲集購物中心、遊樂設施、溫泉及旅館等設施。
遊客可以喺台場內乘搭觀光遊覽船、欣賞美麗夜景。
月島
月島係日本特產「文字燒」嘅發源地。「文字燒街」上有大約50間文字燒專門店。
月島內亦有可以欣賞東京灣及隅田川美景嘅地方。春天時街道兩旁櫻花盛開，水面與花瓣交織出一幅幅自然美景。
東京獨有特色景點
以下將為大家介紹部分東京獨有特色景點。
| 景點名稱 | 特色 |
| 東京車站 | 位於東京中心嘅車站，同時亦係著名觀光景點 |
| 東京晴空塔 | 全世界最高嘅自立式電波塔 |
| 東京鐵塔 | 東京象徵地標 |
| 豐洲市場 | 東京魚類批發市場 |
| 阿美橫商店街 | 從戰後復興時期持續至今嘅商店街 |
東京車站
東京車站係位於千代田區嘅大型轉運站。佢唔單只係一個交通樞紐，同時亦係一個充滿特色嘅觀光景點。建築嘅最大睇頭，就係其紅磚外觀與圓頂內嘅壯觀天花板。車站大樓經修復後將100年前嘅外觀成功重現，現時已被指定為日本重要文化財產。
JR東京站站內與周邊購物設施內，則匯聚咗甜品、生活雜貨等來自日本全國各地、代表日本特色嘅特色產品。
景點資訊
- 名稱：東京車站
- 地址：〒100-0005 東京都千代田區丸之内1
- 交通方式：東京單軌電車羽田機場第2大樓站→[東京單軌電車]約25分鐘→東京單軌電車濱松町站→[步行]約2分鐘→JR濱松町站→[JR山手線・京濱東北線]約6分鐘→JR東京站
- Wi-Fi：有（JR-EAST FREE Wi-Fi）
- 語言：中文、英文
- 信用卡：可以使用VISA, MasterCard, JCB, AMERICAN EXPRESS, Diners Club International, DISCOVER
東京晴空塔®
東京晴空塔®係全世界最高嘅電波塔，總高度達634米。（截至2011年11月資訊）
嚟到東京晴空塔®，您唔單只可以購物或享受美食，仲可以順便欣賞風景，當中特別推薦到展望台及展望迴廊。天望甲板距離地面350米，四周被巨型360度玻璃面板包圍，方便遊客以最佳視角飽覽前方大約70公里區域嘅絕佳景觀。
「展望迴廊」則係一條離地450米高嘅環狀玻璃回廊，遊客可於迴廊上體驗彷彿於半空中散步嘅不可思議感覺。
景點資訊
- 名稱：東京晴空塔®
- 地址：〒131-0045 東京都墨田區押上1-1-2
- 交通方式：JR東京站→［JR總武線快速］約8分鐘→JR錦系町站→[東京地鐵半藏門線]約3分鐘→東京地鐵押上（晴空塔前）站…地下3樓B3出口・A2出口出來步行即達
- Wi-Fi：有（TOBU FREE Wi－Fi）
- 語言：中文、英文、韓文、法文、西班牙文、義大利文、印尼文、馬來文、泰文、越南文、俄羅斯文、阿拉伯文
- 購票方式：現場購票
- 信用卡：可以使用VISA, Master Card, JCB, AMERICAN EXPRESS, Diners Club International, DISCOVER, UnionPay
東京鐵塔
東京鐵塔係東京象徵地標之一。雖然其作為電波塔嘅功能已由東京晴空塔接棒，但至今依然吸引唔少觀光客前往朝聖。
鐵塔總高333米，主要甲板高150米、特別瞭望台則高250米。您可以從主甲板及瞭望台眺望東京美景，同層亦設有café及商店。
除此之外，東京鐵塔下方亦設有紀念品商店及餐廳。
景點資訊
- 名稱：東京鐵塔
- 地址：〒105-0011 東京都港區芝公園4-2-8
- 交通方式：JR東京站丸之内南口→[東急巴士]約20分鐘→東京鐵塔巴士站…步行約1分鐘
- Wi-Fi：有（依店家而異）
- 語言：中文、英文、韓文（導覽摺頁）
- 中文、英文、韓文、義大利文、法文、西班牙文、泰文、越南文、俄羅斯文、印尼文（最頂層語音導覽）
- 購票方式：現場購票
- 信用卡：可以使用VISA, Master Card, JCB, AMERICAN EXPRESS, Diners Club International
豐洲市場 (東京魚類批發市場)
豐洲市場係位於東京江東區嘅蔬果、新鮮魚類及肉類批發市場，由築地市場於於2018年搬遷至此。
遊客可以透過觀賞魚類拍賣、享用採用新鮮食材製作嘅市場美食以及購物，以感受日本魚市場充滿活力嘅氛圍。
景點資訊
- 名稱：豐洲市場
- 地址：〒135-0061 東京都江東區豐洲6-6-1
- 交通方式：JR東京站→[JR山手線・JR京濱東北線]約4分鐘→JR新橋站→[百合海鷗線]約30分鐘→百合海鷗線市場前站…步行即達
- Wi-Fi：有（FREE Wi-Fi & TOKYO）
- 語言：中文、英文、韓文、法文、西班牙文、德文、義大利文、俄羅斯文、印尼文、馬來文、泰文、越南文、阿拉伯文
- 信用卡：可以使用（依店家而異）
阿美橫商店街
阿美橫商店街係一條沿著JR上野站及JR御徒町站鐵道路軌兩側延伸嘅購物街。據聞商店街起初源於戰後黑市，至今仍然保留著當時嘅繁忙氣氛。
商店街現時林立著各式各樣嘅店舖，無論係食品、貴金屬、化妝品和與時尚有關嘅產品，都一一可以喺到搵到。
景點資訊
- 名稱：阿美橫商店街
- 地址：〒110-0005 東京都台東區上野6-10-7（阿美橫商店街聯合會）
- 交通方式：JR東京站→[JR山手線・JR京濱東北線]約6分鐘→JR御徒町站…步行即達 / JR東京站→[JR山手線・JR京濱東北線]約8分鐘→JR上野站…步行即達
- Wi-Fi：有（依店家而異）
- 語言：中文、英文、韓文（依店家而異）
- 信用卡：可以使用（依店家而異）
東京歷史文化景點
下次有機會去東京，不妨亦到以下地方，感受日本嘅歷史及文化吖。
| 景點名稱 | 特色 |
| 東京歌舞伎座 | 可以欣賞日本傳統藝能嘅劇場 |
| 兩國國技館 | 舉辦相撲比賽、展示相撲相關文物及收藏品 |
| 淺草寺 | 東京最古老嘅寺院 |
| 靖國神社 | 祭祀亡靈嘅神社 |
| 明治神宮 | 擁有日本最大嘅木造大鳥居 |
東京歌舞伎座
歌舞伎座係一座位於銀座地區嘅劇院。劇院建於1889年、歷史相當悠久。遊客可於劇院內觀賞日本傳統藝能「歌舞伎」。
景點資訊
- 名稱：歌舞伎座
- 地址：〒 104-0061 東京都中央區銀座4-12-15
- 交通方式：東京地鐵東京站→[東京地鐵丸之內線]約3分鐘→東京地鐵銀座站A7出口…步行約5分鐘
- Wi-Fi：無
- 語言：英文
- 購票方式：線上購票、現場購票
- 信用卡：可以接受使用VISA, Master Card, JCB（線上購票）
- 不接受信用卡（現場購票）
兩國國技館
「兩國國技館」係位於淺草與東京晴空塔附近嘅多功能設施。除一年舉行三次嘅大相撲比賽以外，亦會舉行各種活動。
只要係相撲比賽以外嘅時間，一樓相撲博物館都歡迎遊客免費入內參觀。館內展出咗相撲相關嘅各種資料，係一個可以近距離接觸相撲文化嘅獨特景點。
相撲比賽期間、又或比賽以外期間嘅每相隔5日，國技館內都會有店家販售相撲相關商品。
景點資訊
- 名稱：國技館
- 地址：〒130-0015 東京都墨田區橫網1-3-28
- 交通方式：JR東京站→[JR山手線・JR京濱東北線]約4分鐘→[JR總武線]約3分鐘→JR兩國站…步行約1分鐘
- Wi-Fi：無
- 語言：英文
- 購票方式：現場購票、線上購票、日本當地便利商店、電話訂票
- 信用卡：不接受信用卡（現場購票）
淺草寺
淺草寺係東京最古老嘅寺廟，歷史約1400年。神社參拜道路入口嘅雷門係淺草一大象徵，亦係遊客摯愛嘅絕佳影相打卡位。
穿過雷門後，您會嚟到一條名為「仲見世」嘅商店街。「仲見世」商店街兩旁遍布販售小食、甜品及傳統雜貨嘅店舖。
淺草寺大殿前方放有一座大香爐，相傳如果沾上燒香煙即可為身體帶來健康。
景點資訊
- 名稱：淺草寺
- 地址：〒111-0032 東京都台東區淺草2-3-1
- 交通方式：JR東京站→[JR山手線・JR京濱東北線]約2分鐘→JR神田站[步行]→東京地鐵神田站→[東京地鐵]約12分鐘→[東京地鐵]淺草站…步行約5分鐘
- Wi-Fi：有（Asakusa_Free_Wi-Fi）
- 語言：中文、英文、韓文
- 信用卡：可以使用VISA, Master Card, JCB, AMERICAN EXPRESS, Diners Club International（依店家而異）
靖國神社
靖國神社位於皇居附近。神社建於1869年，目的係為追悼所有戰爭中嘅犧牲者，至今仍保留著日本人將往生者視為神明祭祀嘅風俗習慣。
神社另一特色，就係位於本殿旁嘅遊就館。館內展出咗戰爭相關物品，當中包括戰爭中犧牲者曾經使用嘅物品。遊客可以於館內了解日本近現代歷史，並再次感受戰爭所帶來嘅悲慘。
景點資訊
- 名稱：靖國神社
- 地址：〒102-8246 東京都千代田區九段北3-1-1
- 交通方式：JR東京站→[JR中央線快速]約5分鐘→JR御茶之水站→[JR中央線・總武線各站停車]約5分→JR飯田橋站…步行約10分鐘 / 東京地鐵東京站→[東京地鐵丸之内線]約1分鐘→東京地鐵大手町站→[東京地鐵東西線・半藏門線]約5分鐘→東京地鐵九段下站…步行約5分鐘
- Wi-Fi：無
- 語言：英文
- 購票方式：現場購票
- 信用卡：不可使用
明治神宮
明治神宮位於原宿附近，係一座建於1920年、並祭祀著明治天皇皇后嘅神社。
神社建築被佔地廣闊、綠意盎然嘅花園環繞，令人忘記自己正身處於市中心。神社範圍內棲息著豐富動植物種類，其中又以簇生菖蒲花尤其著名。
順帶一提，位處南參道與北參道交匯處嘅大鳥居，係日本最大嘅木製鳥居。
景點資訊
- 名稱：明治神宮
- 地址：〒151-8557 東京都澀谷區代代木神園町1-1
- 交通方式：JR東京站→[JR山手線]約30分鐘→JR原宿站…步行約1分鐘
- Wi-Fi：無
- 語言：英文
- 購票方式：現場購票
- 信用卡：不可使用
東京博物館與美術館
另一東京之旅必玩行程，就係參觀博物館及美術館。以下將為大家介紹值得一遊嘅設施。
| 景點名稱 | 特色 |
| 東京國立博物館 | 日本最古老嘅博物館 |
| 江戶東京博物館 | 展出1600年前後嘅東京歷史及文化 |
| 森大廈數位藝術美術館 | 以光影藝術為主題嘅體驗型美術館 |
東京國立博物館
東京國立博物館係位於上野嘅日本最古老博物館。館內收藏著多件日本歷史文化財，並一一向公眾公開展覽。
設施同時亦收藏著多件來自東方各個國家嘅文化財。除咗睇頭甚多嘅常設展覽外，博物館每年更會舉行幾次大型特別展覽，展出多件源自日本國內，甚或來自世界各地嘅展品。
景點資訊
- 名稱：東京國立博物館
- 地址：〒110-8712 東京都台東區上野公園13-9
- 交通方式：JR東京站→[JR上野東京LINE]約5分鐘→JR上野站公園口…步行約10分鐘
- Wi-Fi：有（TNM_Free_Wi-Fi）
- 語言：中文、英文、韓文
- 購票方式：現場購票、線上購票、在日本當地便利商店購票
- 信用卡：可以使用VISA, Master Card, JCB, AMERICAN EXPRESS, Diners Club International, DISCOVER
江戶東京博物館
江戶東京博物館以東京大城市為主題，目的旨在傳承江戶東京嘅歷史與文化。館內主要展覽出自1600年後大約400年期間內嘅東京歷史與文化。
江戶東京博物館建築物嘅獨特外觀與結構靈感來自高床式倉庫，因此館內有部分為挑空兩層嘅空間，充滿開放感。
順帶一提，江戶東京博物館旁邊就係兩國國技館。
景點資訊
- 名稱：江戶東京博物館
- 地址：〒130-0015 東京都墨田區橫網1-4-1
- 交通方式：JR東京站→[JR山手線・京濱東北線]約4分鐘→JR秋葉原站→[JR總武線]約4分鐘→JR兩國站西口…步行約3分鐘
- Wi-Fi：有（Free Wi-fi & Tokyo）
- 語言：中文、英文、韓文、法文、德文、意大利文、西班牙文（5・6樓常設展展廳）
- 購票方式：現場購票
- 信用卡：可以使用VISA, Master Card, JCB, AMERICAN EXPRESS, Diners Club International
森大廈數位藝術美術館
森大廈數位藝術美術館係一間位於台場嘅互動博物館。博物館以「不設地圖的美術館」為概念，透過無界限方式展出多項作品。
作品包括動物、花卉及海洋等等多元化主題。入場一士可以盡情沉浸於絢麗霓虹燈打造出來嘅繽紛世界中。
景點資訊
- 名稱：森大廈數位藝術美術館：teamLab無界（森ビルデジタルアートミュージアム：エプソン チームラボボーダレス）
- 地址：〒135-0064 東京都江東區青海1-3-8 台場Palette Town 2樓
- 交通方式：JR東京站→[JR山手線・京濱東北線] 約2分鐘→JR新橋站→[百合海鷗線]約20分鐘→百合海鷗線青海站北口…步行約3分鐘
- Wi-Fi：無
- 語言：中文、英文、韓文
- 購票方式：現場購票、線上購票、日本當地便利商店
- 信用卡：可以使用VISA, Master Card, JCB, AMERICAN EXPRESS, Diners Club International
東京推薦自然景點
東京經常被認為係一座建築物林立嘅現代化城市，但實際上都內嘅自然景觀優美景點亦相當豐富。以下就為大家介紹部分推薦地方。
| 景點名稱 | 特色 |
| 皇居東御苑 | 皇居內嘅庭園 |
| 代代木公園 | 東京23區內面積第5大嘅都立公園 |
| 新宿御苑 | 由3個形式各異嘅庭園所組成嘅皇室公園 |
| 高尾山 | 米芝蓮3星認證行山景點 |
皇居東御苑
皇居東御苑係皇居（日本天皇住所）內向一般民眾開放嘅花園。園內至今仍然保留著1600年代建造嘅設施，遊客一年四季都可以欣賞到約40種花卉。
例如，春天有櫻花及杜鵑花、夏天有繡球花及百合花、秋天有丹桂，而冬天則有山茶花及和梅花。花園內亦棲息著相當豐富嘅昆蟲及鳥類品種。
景點資訊
- 名稱：皇居東御苑
- 地址：〒100-0001 東京都千代田區千代田1-1
- 交通方式：JR東京站丸之內北口…步行約15分鐘
- Wi-Fi：無
- 語言：中文、英文、韓文、法文、西班牙文
代代木公園
代代木公園係位於原宿繁華街道另一端嘅大型都立公園。園內分為綠意盎然嘅森林公園、陸上競技場與露天舞台等區域。如果想欣賞自然景觀，推薦前往森林公園區嘅中央廣場散步。
尤其係鳥類保護區，遊客更加可以觀察到雜色山雀、翠鳥與頰山雀等等日本野生鳥類。
景點資訊
- 名稱：代代木公園
- 地址：〒151-0052 東京都澀谷區代代木神園町2-1
- 交通方式：JR東京站→[JR山手線]約27分鐘→JR原宿站…步行約3分鐘
- Wi-Fi：有（Free Wi-fi & Tokyo）
- 語言：中文、英文、韓文
- 信用卡：不可使用
新宿御苑
新宿御苑係位於新宿地區東邊嘅國民公園。御苑最初為武士住宅，其後於1906年被重建為皇家公園。園內由日本式庭園、風景式庭園、修整式庭園等風格各異嘅庭園組成，最大特色係可以同時體驗各庭園嘅獨特氛圍。
此外，遊客亦可以於園內參觀珍貴建築物。其中一座於1800年代末至1900年代之間建造嘅歷史建築，就至今一直屹立於御苑內。
景點資訊
- 名稱：新宿御苑
- 地址：〒160-0014 東京都新宿區内藤町11
- 交灀：東京地鐵東京站→[東京地鐵丸之內線]約15分鐘→新宿御苑前站出口1…步行約5分鐘
- Wi-Fi：無
- 語言：英文
- 購票方式：現場購票
- 信用卡：不可使用
高尾山
高尾山係位於東京都最西邊嘅國定公園。由於擁有豐富生態系統，因此公園於2007年被評定為米芝蓮綠色指南三星級景點。
言尾山距離東京市中心車程僅約1小時10分鐘，從東京站出發即可以輕鬆到達。山上設有6條登山路線，亦有纜車，遊客隨心就可以嚟到享受一日郊外遊，因此大受國內外遊客歡迎。
高尾山沿途有瀑布、吊橋及寺廟神社等景點，除咗登山健行，您亦可以順道觀光。山上亦有商店等用餐地方。
景點資訊
- 名稱：高尾山
- 地址：〒193-0844東京都八王子市高尾町2176（高尾遊客中心）
- 交通方式：JR東京站→[JR中央線快速]約15分→JR新宿站[京王線]約47分→京王線高尾山口站下車…步行約5分
- Wi-Fi：有（Free Wi-fi & Tokyo）
- 語言：英文
東京動物園與水族館
東京內有多座動物園、水族館及大人細路都可以盡興而歸嘅地方。以下將為大家介紹部分推薦景點。
| 景點名稱 | 特色 |
| 上野動物園 | 可以觀賞熊貓嘅珍貴動物園 |
| Maxell Aqua Park品川 | 將燈光、音效與生物完美融合嘅水族館 |
| 品川水族館 | 以大約900條魚群悠游嘅水族箱為最大特色 |
上野動物園
上野動物園係位於上野嘅城市動物園。該公園於1882年首次開放，目前約有350種及約2500隻動物。（截至2019年11月資訊）
園區分為東區及西區，東區主要展示日本動物與熊貓、猴子等人氣動物。
西部則以小型動物為主，並設兒童動物園，遊客可以於園內與兔子及天竺鼠互動。
景點資訊
- 名稱：上野動物園
- 地址：〒110-8711 東京都台東區上野公園9-83
- 交通方式：JR東京站→[JR上野東京LINE]約5分鐘→JR上野站公園口…步行約5分鐘
- Wi-Fi：有（Free Wi-fi & Tokyo）
- 語言：中文、英文、韓文
- 購票方式：現場購票
- 信用卡：可以使用VISA, Master Card, JCB, AMERICAN EXPRESS, Diners Club International, DISCOVER
Maxell Aqua Park品川
Maxell Aqua Park品川係位於港區品川王子大飯店內嘅一座水族館。館內裝潢以及水族箱皆用上影像及照明技術，營造出充滿夢幻氣氛嘅環境。
水族館內飼養著各式各樣嘅生物，當中最值得一睇嘅，有全球世界唯一展出嘅「昆士蘭鋸鰩」。遊客可以到2樓總長約20米嘅海底隧道中見到佢嘅盧山真面目。
此外，配搭燈光及噴水嘅海豚表演亦係必睇重頭戲之一。
景點資訊
- 名稱：Maxell Aqua Park品川 (マクセル アクアパーク品川)
- 地址：〒108-8611 東京都港區高輪4-10-30 品川王子大飯店內
- 交通方式：JR東京站→[JR山手線・京濱東北線]約13分鐘→JR品川站高輪口…步行約2分鐘
- Wi-Fi：有
- 語言：中文、英文、韓文、泰文
- 購票方式：線上購票、現場購票
- 信用卡：可以使用VISA, Master Card, JCB, AMERICAN EXPRESS
品川水族館
品川水族館位於品川市最南端。設施特色係館內棲息著於面朝品川嘅海灘、流入東京灣嘅河川等等附近海域中嘅生物。水族館另一看點，則有全長約22米嘅海底隧道，遊客可以喺到抬頭欣賞大約900條魚悠游嘅景象。
官方除咗展出咗刀片魚等稀有魚類，亦設有歡迎參觀人士與水族館魚類互動嘅設施。
景點資訊
- 名稱：品川水族館 (しながわ水族館)
- 地址：〒140-0012 東京都品川區勝島3-2-1
- 交通方式：JR東京站→[JR京濱東北線]約20分鐘→JR大森站北口…步行約15分鐘
- Wi-Fi：有
- 語言：中文、英文、韓文
- 購票方式：現場購票
- 信用卡：不可使用
東京遊樂場與娛樂設施
除咗歷史景點，東京仲有數之不盡嘅娛樂設施。以下為部分推薦娛樂景點。
| 景點名稱 | 特色 |
| 東京巨蛋城 | 匯集遊樂園、博物館與酒店於一身嘅觀光設施 |
| 東京JOYPOLIS | 日本規模最大嘅室內型主題樂園 |
| 東京迪士尼樂園® & 東京迪士尼海洋® | 充滿迪士尼世界觀嘅主題樂園 |
| 賽馬場、彈珠機店 | 體驗日本遊藝嘅地方 |
東京巨蛋城
東京巨蛋係一座位於皇居附近嘅綜合性旅遊設施。以日本首座有蓋體育館嘅東京巨蛋為中心，東京蛋城附近遍佈遊樂場、保齡球館及棒球博物館等多座娛樂設施。
此外，東京巨蛋城亦附設美食廣場、酒店以及療癒疲勞身體嘅SPA設施，保證您喺到玩夠一日都不成問題！
景點資訊
- 名稱：東京巨蛋城 （東京ドームシティ）
- 地址：〒112-0004 東京都文京區後樂1-3-61
- 交通方式：東京地鐵東京站→[東京地鐵丸之內線]約10分鐘→東京地鐵後樂園站…步行約5分鐘 / JR東京站→[JR中央線快速]約5分鐘→JR御茶之水站→[JR總武線]約2分鐘→水道橋站西口…步行約8分鐘
- Wi-Fi：有（Free Wi-Fi Passport）
- 語言：中文、英文、韓文
- 購票方式：現場購票
- 信用卡：可以使用VISA, Master Card, JCB, AMERICAN EXPRESS, Diners Club International（依店家而異）
東京JOYPOLIS
東京JOYPOLIS係一座位於台場嘅室內主題樂園，亦係全日本最大嘅室內主題樂園。
主題樂園內一共設有20多種遊樂設施，從刺激且尖叫聲不斷嘅過山車到可以贏取豐富獎品嘅遊戲皆包羅萬有，當中又以運用數位技術嘅機動遊戲特別值得留意。融合咗「數位」聲光影像圖形與「現實」嘅主題遊樂園，您又無興趣嚟感受一個如此不可思議嘅世界呢？
景點資訊
- 名稱：東京歡樂城 （東京ジョイポリス）
- 地址：〒135-0091 東京都港區台場1-6-1 DECKS Tokyo Beach 3F～5F
- 交通方式：JR東京站→[JR山手線・京濱東北線]約2分鐘→JR新橋站→[百合海鷗線]約13分鐘→百合海鷗線台場海濱公園站…步行約2分鐘
- Wi-Fi：有（FreeWiFi_ODAIBA）
- 語言：英文
- 購票方式：現場購票
- 信用卡：可以使用VISA, Master Card, JCB, AMERICAN EXPRESS, Diners Club International
東京迪士尼樂園® & 東京迪士尼海洋®
東京迪士尼樂園®與東京迪士尼海洋®係日本最受歡迎嘅主題公園。雖然名稱中帶有「東京」字眼，但實際上樂園係位於毗鄰東京嘅千葉縣舞濱市。
兩座樂園均以迪士尼世界為建造主題，從景點、巡遊活動到建築物細節都貫徹迪士尼世界觀，保證大人細路都可以玩得樂而忘返！
景點資訊
- 名稱：東京迪士尼樂園®
- 地址：〒279-8511 千葉縣浦安市舞濱1-1（遊客服務中心）
- 交通方式：JR東京站→[JR京葉線・武藏野線]約20分鐘→JR舞濱站…步行約6分鐘
- Wi-Fi：有
- 語言：中文、英文、韓文、泰文、印尼文
- 購票方式：線上購票、現場購票
- 信用卡：可以使用VISA, MasterCard, JCB, AMERICAN EXPRESS, Diners Club International, DISCOVER
景點資訊
- 名稱：東京迪士尼海洋®
- 地址：〒279-8511 千葉縣浦安市舞濱1-1（遊客服務中心）
- 交通方式：JR東京站→[JR京葉線・武藏野線]約20分鐘→JR舞濱站→[迪士尼度假區線]約9分鐘→迪士尼度假區線・東京迪士尼海洋®站…步行約3分鐘
- Wi-Fi：有
- 語言：中文、英文、韓文、泰文、印尼文
- 購票方式：線上購票、現場購票
- 信用卡：可以使用VISA, MasterCard, JCB, AMERICAN EXPRESS, Diners Club International, DISCOVER
東京動漫相關景點
您鍾意日本動漫嗎？其實除咗秋葉原外，東京仲有多個與動漫相關嘅景點。以下為部分代表性動畫景點。
| 景點名稱 | 特色 |
| 寶可夢中心東京DX店＆Pokémon Cafe | Pokémon官方商店及café |
| 東京航海王塔 | ONE PIECE主題樂園 |
| 東京國際展示場 | 日本同人展「Comic Market」舉辦場地 |
寶可夢中心東京DX店＆Pokémon Cafe
「寶可夢中心東京DX店＆Pokémon Cafe」係一間位於東京站附近嘅Pokémon官方商店兼café。
該店主要販售遊戲軟體、卡牌遊戲及琳琅滿目嘅周邊商品，其中有部分更係店舖限定商品，係粉絲就一定要留意！店內仲會不定期舉辦卡牌遊戲活動，歡迎初心者參加。
官方商店另一端係必須預約入場嘅「寶可夢咖啡廳」。主題食物唔單只味道有保證，外觀更係超級可愛迷人呀！
景點資訊
- 名稱：寶可夢中心東京DX店＆Pokémon Cafe （ポケモンセンタートウキョーDX ＆ ポケモンカフェ）
- 地址：〒103-0027 東京都中央區日本橋2-11-2 日本橋高島屋Ｓ.Ｃ.東館 5樓
- 交通方式：JR東京站八重洲北口…步行約5分鐘
- Wi-Fi：有（日本橋高島屋S.C.的免費Wi-fi）
- 語言：中文、英文、韓文
- 信用卡：可以使用VISA, Master Card, JCB
東京航海王塔
「東京航海王塔」位於東京鐵塔內，係一間ONE PIECE官方主題遊樂園兼商店。
樂園內有多個以ONE PIECE角色為主題嘅景點，例如入口處設有360度環狀巨大投影布幕，令入場人士有如置身於漫畫世界中。
另同場亦有展出動畫原稿、分鏡等等貴重資料嘅「Cruise History」展覽區，各位ONE PIECE粉絲絕對不容錯過！
景點資訊
- 名稱：東京航海王塔（東京ワンピースタワー）
- 地址：〒105-0011 東京都港區芝公園4-2-8 東京鐵塔底下
- 交通方式：JR東京站丸之內南口→[東急巴士]約20分→東京鐵塔巴士站…步行約1分鐘
- Wi-Fi：有（TOKYO_ONE_PIECE_TOWER）
- 語言：中文、英文、韓文
- 購票方式：線上購票、現場購票
- 信用卡：可以使用VISA, Master Card, JCB, AMERICAN EXPRESS, Diners Club International
東京國際展示場：同人展舉行地點
「東京國際展示場」係一座鄰近台場嘅展覽中心，以一年舉行兩次嘅同人展「Comic Market」而聞名。「Comic Market」即係指同場展出並出售漫畫作品及相關商品嘅活動。
展覽場地內設有共10間餐廳及café，提供多款日式料理及西式料理。如果下次有機會嚟到參觀同人展，不妨順便喺場內用餐吖。
景點資訊
- 名稱：東京國際展示場 （東京ビッグサイト）
- 地址：〒135-0063 東京都江東區有明3-11-1
- 交通方式：JR東京站→[JR山手線]約15分鐘→JR大崎站→[臨海線]約14分鐘→臨海線國際展示場站…步行約7分鐘 / JR東京站→[JR山手線・京濱東北線]約5分鐘→JR新橋站→[百合海鷗線]約22分鐘→百合海鷗線東京國際展示場站…步行約3分鐘 / JR東京站丸之內南口巴士站→[都營巴士]約40分鐘→東京國際展示場停留站…步行即達
- Wi-Fi：有（Tokyo-BigSight_Wi-Fi）
- 語言：中文（簡體）、英文、韓文
- 信用卡：可以使用
東京購物指南
嚟到東京旅遊，當然要盡情享受購物樂趣啦！接落嚟，就要按下列3個類別嚟介紹東京嘅推薦購物地點。
- 時尚
- 家電
- 手信
時尚
東京有著各式各樣嘅時尚品牌商店。如果想喺東京買衫，推薦前往OUTLET或購物中心等大型設施。
OUTLET 價格普遍比市面店舖商定價更便宜。例如，位於台場嘅「維納斯城堡VenusFort」(ヴィーナスフォート)或「三井OUTLET PARK」(三井アウトレットパーク)就係兩大好例子。
大型購物中心一般都會匯集時尚、雜貨與餐廳於一身，當中又以六本木「東京中城」(東京ミッドタウン)及「LaLaport」(ららぽーと)購物中心為推薦好去處。
家電
如果您想喺東京購買家電，推薦前往家電量販店，事關店內選擇多元化而且價錢又夠便宜。推薦量販店包括「友都八喜」 (ヨドバシカメラ)、「山田電機」 (ヤマダ電機)及「Bic camera」 (ビックカメラ)等等。
東京各地都有家電量販店，而最推薦嘅地方就必屬秋葉原、新宿及銀座。以上地區都有多間分店設於車站前方，方便遊客格價。
手信
如果您想喺東京購買手信，推薦前往商店街、百貨公司及車站大樓內嘅商舖。商店街的話，推薦淺草「仲見世」或「傳法院通」，街道兩旁都有多間代表性手信及生活雜貨店。
百貨公司大多集中於東京市中心。著名嘅有「三越」、「伊勢丹」、「高島屋」。各百貨公司內都有出售各地手信及日本傳統雜貨。
東京美食與餐廳
東京美食種類非常豐富。除咗日式、西式、中式、法式、意式料理都一應俱全，更有獨特主題餐廳，例如忍者餐廳或機器人餐廳等。
下文將會根據下列5個類別為大家介紹推薦嘅餐廳。
- 壽司
- 拉麵
- 日式料理
- 燒肉
- 甜品
雖然每個地區都有唔少餐廳，但大多數都集中於東京市中心，例如新宿、澀谷或銀座等。
壽司
東京壽司店價格與口味相當多元化。壽司店遍布整舍東京，但著名店家則集中於東京中心地區。您亦可以喺當地市場附近搵到多間壽司店，事關店家可以方便買到最新鮮嘅食材嘛！
特別推薦嘅餐廳有築地場外市場「築地神樂壽司」(つきぢ神楽寿司)、「銀座久兵衛」；淺草「弁天山美家古壽司」。價錢方面，手握壽司約5,000日圓，丼飯約3,500日圓。
如果想要享受平價又好食嘅壽司，推薦迴轉壽司店。 例如「藏壽司」(くら寿司)兩件壽司就只需100日圓。（截止2019年11月資訊）
拉麵
東京都內有數之不盡嘅很多拉麵店，而且拉麵種類眾多。東京拉麵特徵一般為醬油湯底及清湯湯底。
東京各個地區嘅車站周邊都有多間拉麵店。特別係東京站內嘅東京拉麵街，就更加有8間被稱為「嚟到東京後第一時間必食」嘅品牌。於東京有近20家分店嘅拉麵連鎖店「一蘭」亦係另一推薦。
拉麵價格範圍因湯底及配料而異，一般價錢大約為800到1300日圓左右。（截至2019年11月資訊）
日式料理
日式料理店遍布東京各區域。日式料理即係指天婦羅、懷石料理、烤雞肉串、家常菜及烏冬等等多款菜式，遊客喺各地區都可以輕鬆搵到相關食肆。
有多間米芝蓮星級餐廳都有喺銀座及六本木內開設分店。
日式料理價錢範圍根據菜式內容而定，大約為幾千日元到幾萬日圓之間。（截至2019年11月）
燒肉
東京燒肉店選擇甚兔。如果想輕鬆享用燒肉，推薦「牛角」「敘敘苑」等連鎖店。上述餐廳通常位於車站附近，遊客好容易就可以搵得到。
如果想同時品管燒肉與其他料理的話，咁去街邊路面舖頭就最適合。例如，位於銀座及表參道嘅「日本燒肉長谷川」(日本焼肉はせ川)、「代代木Meat Bar Nikutarashi」(代々木ミートバル肉たらし)，以及赤坂「炭火燒HONMA」(炭火焼ホンマ)都係唔錯嘅選擇。
價錢範圍因餐廳而異，單點一份約500至2,000日圓，套餐則約3,000至15,000日圓。（截至2019年11月資訊）
甜品
東京甜品店種類眾多，從日式到西式都應有盡有。例如，日式點心有羊羹（ようかん）、糰子（団子）、餡蜜（あんみつ）及鯛魚燒（たい焼き）。想品嚐日式甜品嘅讀者，推薦到上野「舟和」及新宿「紀之善」。
另一方面，由於西式甜品賣相精緻，因此喺社交媒體上擁有極高人氣。其中著名店家包括「高野水果輕食店&水果吧」（タカノフルーツパーラー）、「Glaciel表參道店」（グラッシェル表参道店）。一份甜品價格約為1,000到2,000日圓左右。（截至2019年11月資訊）
東京酒店
東京嘅住宿設施類別包羅萬有，當中包括酒店、日式旅館及Guesthouse等。以下將介紹各類型住宿較密集嘅地區以及價格範圍。
東京五星級酒店
東京市中心有多間五星級酒店。即使身處大城市，您都可以有如置身度假勝地般放鬆身心。酒店一般都設有日式現代客房及休息室，因此無需去日式旅館都一樣可以體驗到日式風格。
部分提供日本現代客房嘅豪華酒店，例如東京君悅酒店、東京康萊德酒店、東京安縵酒店，價錢方面為標準房每晚約6萬到10萬日圓。（截至2019年11月資訊）
經濟型酒店
東京嘅經濟型酒店集中於新宿，澀谷，東京與上野等匯集咗多條鐵道路線嘅轉運站附近。
經濟型酒店於日本被稱為「商務旅館」，其服務僅限於提供住宿，每晚約5,000至15,000日圓。（截至2019年11月資訊）
多間經濟型酒店都屬於集團式經營，例如Richmond (リッチモンド)、Dormy Inn (ドーミーイン)、APA Hotel (アパホテル)及東橫Inn (東横イン)。
東京膠囊旅館
東京市中心內有多間膠囊旅館並集中於車站周邊。「膠囊」即係指住客瞓喺一個小型個人房間並要同其他客人共用淋浴及廁所。基於以上條件，住宿價格非常便宜，每晚只需約3,000日圓起。（截至2019年11月資訊）
從價格方面嚟講，膠囊旅館只提供僅有床鋪嘅簡單空間，但近年亦有越來越多充滿時尚感、生活用品配備齊全嘅膠囊旅館相繼落成。
推薦嘅膠囊旅館有「上野站東方1 號青年旅舍」(上野ステーションホステルオリエンタル1)、東京車站附近的「an/other TOKYO」(アナザートウキョウ )，以及江東區「東京有明BAY HOTEL」。如果對於膠囊旅館有興趣的話，可以嘗試一下喔。
東京日式旅館
雖然東京幾乎無日式旅館，但遊客可以搵到被註冊為有形文化財產嘅住宿設施，部分酒店嘅傳統氛圍更會令您忘記自己正身在市中心呢！
推薦日式旅館有「鳳明館本館」、「虹夕諾雅東京」(星のや東京)、「高輪花香路- 高輪格蘭王子大飯店」(グランドプリンスホテル高輪 花香路)。鳳明館本館一晚約9,000日圓，相對便宜。其他飯店住一晚則需約65,000日圓起。（截至2019年11月資訊）
東京Guesthouse
東京嘅「下町」地區內林立著多間Guesthouse，例如日本橋、淺草或神田內，就有唔少舊式平戶及歷史悠久建築物。
東京內嘅Guesthouse大部分都係概念式住宿設施，比較著名嘅有上野「toco.」、新宿「UNPLAN Kagurazaka」、淺草「Nui. HOSTEL & BAR LOUNGE」等。
上述住宿費用各不相同，部分一晚只需約3,000日圓起；部分則較貴，一晚約20,000日圓。（截至2019年11月資訊）
如何前往日本玄關－東京嘅機場？
成田國際機場以及東京國際機場（通常稱為羽田國際機場）係接近東京嘅機場。隨著近年航班增加以及廉價航空加入，世界各地嘅遊客同東京嘅距離亦越嚟越近，要飛往東京變得更加方便。
關於成田機場
世界各地每個國家嘅主要城市幾乎都有直航飛往成田國際機場。除咗經由成田國際機場離開東京，遊客亦可從第三航廈可以前往日本其它城市，就算係日本另一個城市都唔一定要去羽田機場！前往成田機場嘅旅客，仲可以順便去成田神社參拜觀光，又或到成田AEON購物中心血拼。
機場資訊
- 名稱：成田國際機場
- 地址：〒282-0004 千葉縣成田市古込1-1
- 交通方式：從台北、新加坡、香港、首爾、上海等地有直飛航班
- Wi-Fi：有
- 語言：中文、英文、韓文
- 信用卡：可以使用VISA, Master Card, JCB, AMERICAN EXPRESS, Diners Club International
關於羽田機場
從其他國家飛往羽田機場嘅直航比較少，但羽田機場離東京市區相對較近，如果東京係您主要目的地，就距離及方便性嚟講的話羽田機場或者就係最佳選擇。國際航廈內部分區域被裝潢成日式傳統風格，同場亦設有豐富餐飲區及多間手信舖，就算係機場都夠您行足一日！下次到東京時，不妨就先從機場開始享受日本旅遊嘅樂趣啦！
機場資訊
- 名稱：羽田機場
- 地址：〒144-0041 東京都大田區羽田空港
- 交通方式：從台北、上海、首爾、香港、新加坡、曼谷等地有直飛航班
- Wi-Fi：有
- 語言：中文、英文、韓文
- 信用卡：可以使用VISA, Master Card, JCB, AMERICAN EXPRESS, Diners Club International
精明使用地下鐵及JR，就唔使再怕東京繁複交通！
東京交通十分方便，鐵道公司第一班電車幾乎早於朝早5點就會開出，而末班車則大概為凌晨12點前後，因此喺東京工作或玩樂嘅時間都可謂十分充裕。最重要嘅係，購買一張IC車飛在手，您就可以輕鬆乘搭東京所有JR電車及地下鐵，從此縱橫東京立即暢通無阻！近年各大車站更遂漸增置多國語言嘅指引路牌，甚至仲提供免費WIFI無線上網，方便各位到日本旅行嘅更方便、更輕鬆地享受悠長假期。
乘搭地鐵
東京嘅地下鐵主要分為「東京METRO」和「都營地下鐵」2間公司，交通網路四通八達，無論要去邊到都非常方便。因各車站規劃而異，部分車站出口能夠直通酒店入口、百貨公司或購物中心等，即使係落雨天都使擔心被淋濕。而且車站出口一般都設有出口編號、導覽標示及地圖，從車站到目的地都有清楚指引。另外，銀座站、新宿站等地區嘅車站亦設有地下商店街，移動途中話唔定您會發掘到意想不到嘅購物或用餐樂趣呢。
乘搭JR (日本鐵道)
包含山手線在內，JR東日本鐵路網一共包括超過10條路線。於地面運行嘅JR山手線於1小時環繞東京市中心一圈，對於去日本旅行嘅遊嚟講係一條方便嘅路線。從羽田機場出發，您可以乘搭單軌列車直達JR山手線濱松町；而從成田機場乘搭NEX成田特快的話，則可通往東京、品川、澀谷、池袋等大站，又或乘搭京成電鐵Skyliner前往上野。澀谷、新宿、池袋、有樂町（鄰近銀座）等車站都係位於山手線上、深受觀光客歡迎嘅熱門車站。
如何前往日本其他主要旅遊地區
遊客可以從東京輕鬆前往日本其他主要旅遊區。以下表格就為您整理出從東京前往7個地區嘅主要交通方式。
| 目的地 | 主要交通方式 | 所需時間 |
| 仙台 | JR東北新幹線 | 約1小時30分 |
| 橫濱 | JR東海道本線 | 約30分 |
| 箱根 | JR中央線快速・小田急浪漫特快車 | 約1小時45分 |
| 京都 | JR東海道新幹線 | 約2小時 |
| 大阪 | JR東海道新幹線 | 約2小時25分 |
| 北海道 | 羽田機場 國內線 | 約1小時30分 |
| 沖繩 | 羽田機場 國內線 | 約2小時45分 |
Comments