識得食其實好多嘢食！香川縣美食及餐廳推介

相信大家都聽過「讚岐烏冬」，咁又知唔知其實係日本香川縣嘅各產食物？香川縣被稱為「烏冬之縣」，所以有好多烏冬嘅美食特產。今次就為大家搜羅各款讚岐烏冬，同推薦嘅名店啦。

讚岐烏冬係乜東東？

讚岐烏冬係香川縣嘅特產。最大嘅特徵係彈牙嘅口感，食落有咬口。有多種烏冬款式，但普遍都有帶出魚湯精華嘅「鰹魚湯烏冬（かけうどん）」、直接品嚐麵條味道嘅冷麵「竹簾烏冬（ざるうどん）」等多種選擇。價錢每間店都唔同但基本上好多店提供嘅烏冬都係500円左右，非常實惠抵食。

而有關讚岐烏冬起源係唔同講法，但普遍認為係因為讚岐地方降雨量少，導致難以生產米，所以造就咗使用麥製作嘅烏冬。

香川縣內有好多餐廳都有提供讚岐烏冬。當中以香川縣中心地區同高松市集結最多店舖。

香川縣中央地區有多間讚岐烏冬名店，當中推薦嘅有「山越烏冬」、醬油烏冬嘅元祖店「小縣家」等。

而高松市的話推薦「中西烏冬」、「竹涌」等等多間自助式烏冬名店。「自助式烏冬店」即係落單揀好鳥冬份量後，煮麵、調味、加入高湯嘅全個流程都係由食客自己負責。雖然要花點工夫，但係可以自己調節麵條嘅軟硬度及湯味嘅濃度係一大特色。

其實讚岐烏冬唔只淨係食烏冬麵條，仲有全新一變嘅各種食法。以下介紹啲特別嘅讚岐烏冬食品俾你試吓先。

讚岐烏冬雪糕係喺道之站（道路設施）就有販賣嘅雪糕。喺牛奶味雪糕加入高湯同烏冬麵條。味道有清爽、濃郁、超濃郁三種口味，味道越濃，烏冬味越突出為一大特徵。一般推薦食清爽味，不過既然難得嚟到香川縣，不如挑戰吓食超濃郁口味，好好細味香川特產「讚岐烏冬」係咩味啦！不過價錢都係200円，買埋清爽味試吓無妨吖。

讚岐烏冬漢堡包係津田嘅松原Service Area（高速公路服務區休息站）可以食到嘅名物。蔥、木魚、雞肉漢堡扒、荷包蛋、生薑風味嘅醬油醬汁加入油炸烏冬，再放入麵包夾餡而製成。食漢堡包嘅同時，又可以食出烏冬嘅美味，所以都好受歡迎。價錢係450円左右。（2019年7月資訊）

溫馨小提示，讚岐烏冬漢堡包係星期六、日先會賣，而且數量有限，有興趣試吓嘅就要早啲去買啦。