當去到日本旅行時，遊客經常都會被「應該去邊度同點樣洗衫」呢個問題考起，唔知各位有無試過嚟到日本展開行程時需要洗衫嘅經驗呢？如果您都曾經遇過一樣情況，呢篇文章喺就非常值得您bookmark，因為以下即將介紹喺唔同嘅情況下，應該點使用洗衣機同乾衣機嘅問題！
投幣式洗衣機
如果你留宿嘅地方無設置洗衣機，或者都需要搵投幣式洗衣店嚟洗衫。如果喺東京嘅話，其實都唔太難搵。但係當入到投幣式洗衣店時，可能會唔知點用呢啲機器，而且大多數投幣式洗衣店都無外語使用說明，並且有九成都係自助式嘅。
呢個時候，以下提供嘅說明就幫到你喇！
首先，請揀選合適尺寸嘅洗衣機
首先，你必須先依照要洗嘅衫嘅份量，去挑選一部容量合適嘅洗衣機。揀好之後，請打開洗衣機睇吓入面係咪吉嘅、confirm吓有無人用緊。如果啱啱好無人用梗，咁就去下一步嚕。
第二步，入錢（硬幣）！
跟住就請投入200日圓硬幣（因機種而異，價格會有唔同）！由於只能用硬幣，有啲較大型嘅投幣式洗衣店會提供唱錢機，但亦唔係一定會有，所以最好請預先準備硬幣。喺入完硬幣之後，會有30秒嘅時間可以撳「洗濯槽シャワーボタン」，係一個畫著蓮蓬頭圖案嘅掣。撳咗呢個掣嘅話，就會先洗乾淨洗衣槽，去確保你可以用到乾淨嘅洗衣槽。經過30秒洗槽之後，就可以打開個蓋放衫入去，再放洗衣液（如果係呢款機種，請自備洗衣精）。一旦關上洗衣機嘅蓋，就會馬上上鎖同啟動，您可以喺左上方確認洗衫所需時間。
唔需要放洗衣液嘅機種
例如呢種洗衣機可以洗10公斤嘅衫，當您放咗啲衫入去、再入400日圓硬幣就會隨即啟動。呢種機型會自動幫您加洗衣液，所以唔需要自行準備。大約35分鐘之後，就可以拎返啲衫走人㗎喇。
用乾衣機烘乾衣服
而家啲衫就洗好咗喇，下一步就係乾衣。圖片顯示嘅係一般喺投幣式洗衣店有嘅乾衣機，可以容納9公斤清洗好嘅衫。每10分鐘100日圓，入好錢後，就會自動開始乾衣，啟動方式非常簡單！
家用式洗衣機
以上介紹咗投幣式洗衣店洗衫嘅方法，但係如果係民宿或Airbnb入面嘅洗衣機呢？呢種家用洗衣機因為提供多種功能，所以相對地都比較複雜。如圖所示係一款家用嘅洗衣兼乾衣機。
當然，每部洗衣機都會有各自唔同嘅外觀設計。所以請對照以下提供嘅漢字來睇說明介紹。而且，每部洗衣機會提供嘅功能都有啲唔一樣，以下將針對部分常見、基本嘅功能說明。一時三刻要搞清楚咁多掣咁多功能可能會唔知點算好，希望下面嘅介紹可以幫到您啦～
通常只需要撳「入（開機）」同「スタート（啟動）」
一般情況下，首先請將衣服放入洗衣機裡面，跟住撳「入」掣開啟洗衣機電源。喺「入」呢個掣嘅左邊，有三個長方形嘅掣。分別係表示洗衫嘅「洗濯」、表示洗衫加乾衣嘅「洗濯・乾燥」以及表示乾衣嘅「乾燥」。揀好需要嘅模式撳好個掣之後，將左邊所有細節設定維持喺「おまかせ（omakase）」模式，代表洗衣機會自動完成所有洗衣階段。然後，洗衣機會自動度放入咗嘅衫嘅總重量，並且顯示出需要加入1.2匙嘅洗衣液。放好洗衣液之後，只要撳右邊黃色代表開始、啟動嘅「スタート」掣，就會開始自動洗衫㗎喇！
手動自選清洗功能
- 如果唔想用自動設定，可以撳「コース」嘅掣，進入自選設定嘅模式。以下將列出部分洗衣機可以揀嘅功能。
- わたし流：字面上就係「我的設定」嘅意思，全手動嘅模式。喺呢個模式下，可以喺左邊，自行選擇以下各項目嘅時間：洗淨「洗い」、 清水洗「すすぎ」、脫水「脱水」、烘乾「乾燥」。
- お急ぎ：如果趕時間，或者希望洗衣機可以洗快啲，可以揀呢個模式。
- 約60C除菌：60℃除菌模式
- 約40C消臭：40℃消臭模式
- ナイト（night）：夜間靜音模式，洗衫時運轉嘅聲音會較細聲。
- 柔らかプラス（yawaraka plus）：柔軟加成，洗好嘅衫會更柔軟
- おうちクリーニング（o-uchi cleaning）：柔洗模式，呢個模式下會輕柔咁洗衫以防傷到啲衫
- 毛布：毛毯／墊子模式
- 槽洗浄・乾燥：清洗洗衣機內部嘅功能
有咗呢篇文章說明，希望可以協助你順利喺日本用洗衣機洗衫啦！
Comments