喺日本浸浴屬唔單只係人生一大樂事，仲可以順便體驗埋日本浸浴文化！不過「梳乎」之餘，如果可以了解埋日本人係點樣利用最新科技嚟浸浴，浸浴時樂趣肯定加倍！FUN! JAPAN之前就已經介紹過日本浴缸嘅「熱水加熱控制面板」用法，而今次就會為大家介紹喺日本浴室見到嘅另一個裝置－換氣暖風機（類似香港嘅「浴室寶」）。
初初去到日本，相信大部人都唔太識點用電器，因為啲掣都只有日文，當然連浴室嘅通風設備都唔例外！大家可能會覺得區區一部換氣暖風機都有咁多掣，真係有需要用到咩？其實認真研究嘅話，就會發現上圖唔同功能通通都非常實用！
換氣暖風機主要功能
換氣暖風機主要四大功能，分別係換氣（標準換氣／循環換氣）、暖氣、涼風同埋乾燥。香港讀者可能會覺得一個通風設備唔需要用到咁多功能，但日本人出晒名係世界上最鍾意、最享受沖涼同浸浴嘅民族，喺沖涼嘅時候如果覺得浴室溫度太熱或者太冷，呢部機就大派用場，可以依情況調節「暖氣」或者「涼風」，喺最舒服嘅環境吓享受浸浴樂趣
通風換氣方面，一般都會設有「標準換氣」同埋「循環換氣」兩種選擇，只需要撳個掣就可以自由切換模式。沖完涼想要去除浴室入面嘅殘留濕氣時，就可以用 「標準換氣」模式；而想要徹底整乾成個浴室嘅話，就可以用「循環換氣」。
「乾燥」功能對於日本以外嘅國家而言，或者算係一項幾特別嘅功能。「乾燥」功能其實就係畀你喺浴室入面晾衫，喺日日都落雨嘅雨季（尤其係春天梅雨季）難免要喺室內晾衫，但又驚喺室內嘅話會令到屋企入面充滿「噏」味而呢個時候就可以用「乾燥」功能喺浴室裡面晾衫！
換氣暖風機其他功能
介紹完主要功能之後，等我哋地再睇吓仲有啲咩其他功能啦！上行由右至左分別係「停止」、「24小時換氣」、「運轉時間設定」、「時間設定」以及「清潔濾網」：
- 停止：顧名思義，即停止運作。
- 24小時換氣：保持1日24小時通風換氣嘅運作，因為日本好多新款浴室入面都無窗，如果唔通風就會有異味同埋其他衛生問題，所以令浴室保持通風狀態功能就變得非常重要。
- 運轉時間設定：設定唔同功能嘅開始同閂嘅時間。例如您想要喺返到屋企前就已經事先預熱好浴室嘅溫度，就可以用呢個掣嚟開始設定，令佢每日指定時間開啟暖氣/涼風功能。
- 時間設定：於換氣暖風機上顯示時間，如果要改顯示嘅時間嘅話，就可以按呢個掣，再用向上向下嘅箭嘴嚟調較。
- 清潔濾網：當你每次更換或清潔瀘網後按呢個掣重設，咁佢就會重新開始計時、話你知咩時候要再清潔瀘網。
清潔保養方法
換氣暖風機同其他電器一樣，都係要保養、清潔同維修。所以要每個月清濾網，清除濾網上積聚嘅灰塵。最好嘅方法係拎瀘網出嚟之後，用濕布抹，或者用吸塵機。如果真係太污糟，就可以考慮將濾網浸入落咗清潔劑嘅水入面，浸完之後再洗，洗完喺室內晾返乾，唔好放喺太陽下暴曬。
Comments