結束完一日旅程，最期待嘅就會返酒店沖個熱水浴或浸浴，舒緩一下全日舟車勞頓後嘅疲憊！但當你行入沖涼房時，先發現唔識用房內㖾熱水加熱、啲水係冰冰冷冷…（冷冷雨～WOO～）？為咗避免呢個情況，出發前記得學定加熱控制面板點用喇！
首先，尋找控制面板
相信好多外國遊客喺去日本時都發生過呢啲情況－唔識用浴室㖾熱水！有別於外國住宅一般備有熱水槽，一開水龍頭就會有熱水，日本多數屋企都係用熱水加熱器（又或者係熱水爐），需要事先啟動如上圖般嘅加熱器！
然後，尋找漢字
有啲日本住宅會設有兩個控制面板，一個喺客廳附近，另一個喺浴室入面。先由客廳嘅控制面板講起。好似圖中顯示咁，控制面板上有以面部份：
運転（Unten）：開關掣。按呢個掣就可以有熱水用！
- 自動（Jido）：自動模式。當打開自動模式時，就可以令浴缸嘅水保保溫喺之前設定好嘅溫度。
- おいだき（Oidaki）：再加熱。日本人幾乎每日都會浸浴，如果日日都用20到30升水嘅話，耗費非常大。呢個功能可以用嚟將前一日留落嚟嘅水再加熱。
- 「給湯」（Kyutou）：以向上同向下箭嘴頭按鈕調整熱水溫度。
使用「熱水定時器」預約功能
最後「ふろ予約」（Furo-yoyaku）呢個掣就係用嚟設定時間，等浴缸喺預定時間自動將水加滿、並維持喺預設嘅溫度。例如將定時器設定喺每日夜晚8點，大家就可以係食完飯之後去沖涼，唔使「等了又等」啦。
設定定時器方法非常簡單，只要簡單先按一下，用兩個箭嘴頭掣嚟選擇時間，最後再按一次「予約」掣就搞掂。
如果設定自動加水，水就會由呢個入水口裝滿浴缸。
調整水溫到最合適溫度
設定好定時器後，就可以準備好去浴缸浸浴，但入到浴室後又發現仲有另一個控制面板？
確保淋浴或浸浴時隨時控制水溫於最合適溫度。
我地嚟睇吓浴室入面嘅控制面板同外面嗰個有咩唔同！
喺右手邊，一樣可以見到上文介紹過嘅3個掣，包含開關、自動模式同埋再加熱。跟住可以見到「たし湯」（Tashiyu）掣，用來添加熱水。仲有「たし水」（Tashisui）掣用嚟加凍水。
- たし湯（Tashiyu）：當覺得水溫太低時，可以用加熱水升溫。反之亦然，當覺得水溫太熱時，可以使用「たし水」（Tashisui）加冷水降溫。
- ふろ（Furo）／給湯（Kyutou）：位於中間嘅兩組箭嘴頭掣，作用為調節溫度。「ふろ」即浴缸水水溫，「給湯」則係指淋浴時花灑同埋水龍頭嘅水溫。
- 呼び出し（Yobidashi）：連接客廳嘅控制器或通話用。如果沖涼時覺得唔舒服，或者有任何意外，佢就係緊急求救「平安鐘」！
- 優先（Yusen）：設定浴室優先使用熱水。因為廚房亦有機會同時用熱水，咁按咗呢個掣嘅話，就浴室優先使用熱水，唔會沖沖吓涼有人洗碗，然後變一凍一熱咁。
希望呢篇介紹可以令你了解「溫水控制器」，點樣可以舒舒服服沖個熱水涼！
Comments