京都有多個充滿古都情懷嘅溫泉旅館、富有歷史風情嘅住宿等多種選擇。而喺眾多選項中，入住傳統嘅「京町家」絕對係一種獨特嘅京都旅遊體驗。
今次，小編會介紹「京町家」嘅住宿，等你可以體驗瞬間化身成京都居民，入住地理位置優越，徒步或乘搭巴士即可輕鬆前往京都名勝、觀光景點，增添京都旅遊嘅樂趣。
※本文章所記載嘅價格為截至2023年6月底時於預訂網站上所顯示價格。
若用戶經由文中連結購買或預約內文所介紹之商品，FUN! JAPAN將有機會收取部分收益。
京都的「京町家」係？
「町家（町屋）」係指喺街上店舖兼民家住宅（香港俗稱「前舖後居」）嘅建築物，前方為商人招待客人或者職人嘅工作空間，後方則為住宿空間，於江戶時代至戰爭結束前嘅商業繁榮時期喺多個地區大量興建。
而喺京都府京都市中心以及周邊地區，至今仍然保留住數以萬計嘅「京町家」，其中好多都已經改建成為住宿設施或咖啡店等。
根據京都市制定嘅「京町家條例」，京町家嘅定義包括「建築於1950年之前」、「木造建築物」、「三層或以下」等等。一般嚟講，京町家嘅特徵包括平入屋檐（*1）、長而窄嘅建築結構，以及擁有用作款待客人嘅座敷房間。
*1：建築物嘅出入口設置與屋頂脊樑方向平行
入住京町家的好處係？
除咗能夠親身體驗日本傳統建築嘅魅力之外，大部份京町屋都可以整棟租用，非常適合多人數旅行。而且，京町家嘅特點之一就係可以喺屋內邊欣賞庭園美景，邊感受到四季風情，可以話係住宿京町家嘅獨有享受。
而且，亦有多個地理位置優越嘅住宿，徒步即可輕鬆前往嵐山、金閣寺等著名景點，咁就可以避免喺旅遊旺季時遭遇公共交通擁擠嘅問題，輕鬆地遊覽各大名勝景點亦屬一大優點。
【嵐山周邊住宿推薦】湯淺長：歷史超過100年！擁有日式庭園的整棟出租京町家
「湯淺長」係一座建於大正時代（1912年至1926年），所有建築材料皆使用檜木製造嘅京町家。
一打開門，眼前出現鋪設紅色絨毯、擺滿古董嘅空間。行入內部，仲可見到採用茶室特色設計嘅數寄屋造（*2）「奧座敷」，令你住宿時可近距離欣賞到各種日本傳統建築技術，簡直係一舉幾得。
*2：「數寄屋」係指採用茶室或茶道房間風格嘅建築
呢度仲有一個必睇位，就係可以獨佔四季美景嘅日式庭園，夜晚時分，庭園會進行點燈，展現出獨特嘅韻味，可以欣賞到白天和夜晚各具不同風情嘅魅力。
呢度有三種房型可供選擇：一樓有吊燈閃耀嘅洋室，二樓有榻榻米和被褥可以鋪設嘅和室、擺放有加大雙人床(Queen Size)嘅洋室。換言之，你可以按個人喜好，選擇心儀嘅睡床。
💡周邊觀光Tips
從湯淺長步行約10分鐘，即可輕鬆前往嵐山地區，欣賞嵯峨野小火車和竹林小徑。同樣位於步行範圍內，仲有一個名為「天山之湯」嘅天然溫泉。據聞其源泉係於1200米地底下湧出，且廣受溫泉愛好者好評。
- 入住時間：約15:00～20:00
- 退房時間：11:00
- 價格：每晚25,000日圓起（含稅）
- 交通方式：從京福電鐵「車折神社站」步行約2分鐘。從京都巴士或京都市巴士「車折神社前」巴士站步行約2分鐘
- 預訂頁面：湯淺長
【金閣寺周邊住宿推薦】京町屋〇 En：徒步3分鐘即到金閣寺！適合作為神社巡禮據點的京町家
「京町屋〇 En」係一棟使用「織屋建築」技法興建嘅獨棟出租京町家。呢棟擁有超過100年歷史嘅建築物，曾經係京都西陣地區製作「西陣織」等織物嘅機織職人之家。目前仍保留用於放置織機嘅高樓底設計空間，呈現出開放而寬敞嘅建築設計。
建築物整體喺保留粗壯柱樑等美麗建築風格下進行基本翻新。可以喺舒適嘅環境中，感受到百年前居民住宿於此嘅生活方式。
臥室只有和室，可以喺舒適的床墊和被褥入眠。另外，提供多種生活用家電和烹飪器具，非常適合長期居住人士。
💡周邊觀光Tips
步行約3分鐘即可抵達鹿苑寺（通稱金閣寺）。另外，世界遺產龍安寺、仁和寺亦位於徒步範圍內。建議周圍閒逛時亦可順道去國家登錄有形文化財嘅「船岡溫泉」，體驗錢湯文化。
- 地址：〒603-8362 京都市北區衣笠西馬場町43-17
- 入住時間：15:00〜18:00
- 退房時間：10:00
- 價格：每晚起價15,000日圓（含稅）
- 交通方式：從京都市巴士「金閣寺道」巴士站步行約6分鐘
- 預訂頁面：京町屋〇 En
【西陣周邊住宿推薦】西陣 藤田：每日僅限一組入住的國家指定文化財
「藤田家住宅」係建於江戶末期至明治初期嘅京町家，保留當時特有嘅蟲籠窗、格子窗等特色。
呢座住宅被列為國家登錄有形文化財，由不同建造年代和風格嘅東棟和西棟組成，其中東棟一樓嘅京町家「西陣 藤田」，特別限定每日僅接待一組客人入住。
原本屬於畫廊嘅空間經過改建後成為客廳和餐廳。配備簡易廚房、雪櫃、微波爐，可以喺附近嘅「割烹」和「料亭」（即高級日本料理餐廳）購買懷石料理或京料理，然後坐喺大窗戶前邊欣賞庭園，邊享受美食。
主臥室和內部空間最多可容納9位住宿者，使用高級床墊和被褥，務求提供最舒適嘅睡眠體驗。
💡周邊觀光Tips
喺以紡織業聞名嘅西陣地區有多間創業自江戶時代以前嘅古老名店，專門出售西陣織腰帶、和服小物等商品。對於喜愛傳統工藝品嘅人嚟講，充滿令人雀躍嘅名店係選購紀念品嘅好地方。
- 地址：〒602-8422 京都府京都市上京區堀川上立賣下ル西入山名町811
- 入住時間：15:00〜21:00
- 退房時間：10:00
- 價格：每晚起價150,000日圓（含稅）
- 交通方式：從京都市營地鐵「今出川站」步行約10分鐘。從京都市巴士「堀川今出川」巴士站步行約2分鐘
- 預訂頁面：西陣 藤田
【鴨川周邊推薦住宿】慶有魚 鴨川：推薦給想參加鴨川納涼活動的人！位於鴨川旁的京町家
「慶有魚 鴨川」係一棟經過翻新，可整棟出租嘅京町家，座落於京都鴨川河畔。呢座建築物擁有180平方米嘅寬敞空間，最大嘅特色係一樓庭園和二樓陽台，可以俯瞰鴨川。每年八月舉辦嘅夏季風物詩「鴨川納涼」係一大盛事，另外，想參與可以邊享受水邊涼風邊品嚐京都料理嘅「鴨川納涼床」的話，呢度係最理想嘅據點喔！
喺枯山水（又稱假山水）設計嘅坪庭中，放置著以藥師如來而聞名嘅三千院石佛，伴隨著綠葉和蘚苔，讓心靈感到寧靜和諧。
遇上晴朗嘅日子，可以走上二樓陽台，享受心曠神怡嘅微風，盡情欣賞鴨川和東山連峰嘅景色。
💡周邊觀光Tips
喺非活動舉辦期間，推薦沿著河邊嘅散步路線漫步。可以觀察到白鷺、鴨等鳥類，與身在河邊嬉戲嘅當地居民互動等當地特有魅力。
- 地址：〒600-8112 京都府京都市下京區加茂川端六軒町上八柳町348-2
- 入住時間：15:00～22:00
- 退房時間：10:00
- 價格：每晚起價61,714日圓（含稅）
- 交通方式：從京阪本線「清水五條站」步行約6分鐘
- 預訂頁面：Vacation STAY
【北野天滿宮周邊住宿推薦】桂倶樂部：保留著當初建築風貌，獲得京都市認證的京町家
京都市認證嘅京町家「桂倶樂部」係超過100年歷史嘅木造建築物，至今仍保留著當初嘅狀態。正面裝有名為「庇」（ひさし※）嘅屋簷，以及扮演防犯角色嘅格子窗等，外觀洋溢著京町風情，溫暖地迎接到訪客人。
※庇有著遮陽、防雨功能，無柱且與兩側房屋相連，類似於商店街嘅拱廊結構
一踏入內部，眼前展現彷彿瞬間穿越時光後嘅景象。四周充滿著古董，彷彿正模擬京都人生活嘅入住體驗。
室內有三間和室寢室、兩個客廳，一樓仲有一個可以見到庭園嘅臥室。庭園中嘅植物和石燈籠亦彰顯出京都町家風情。
💡周邊觀光Tips
步行15分鐘嘅範圍內，除咗以梅花和紅葉而聞名嘅北野天滿宮之外，仲有多間神社和寺廟，如法輪寺（達磨寺），裡面有大約8,000個達磨，可以盡情享受一趟歷史之旅。
- 地址：〒603-8333 京都市北區大將軍東鷹司町37, 38
- 入住時間：16:00〜20:00
- 退房時間：10:00
- 價格：25,000日圓起/每晚（含稅）
- 交通方式：從JR「圓町站」步行約10分鐘。從京都市營巴士「大將軍」巴士站步行約1分鐘
- 預約頁面：桂倶樂部
日本全國各種住宿設施皆可預訂！利用「Vacation STAY」好處係？
「Vacation STAY」唔只有多個京町家介紹，仲可以預訂日本全國各地嘅古民家、溫泉旅館，包括北海道、東京、大阪、沖繩等地。另外，網站仲有提供各住宿設施嘅詳細資訊。如果你係樂天會員嘅話，預訂時仲可以獲得1%樂天積分回贈，非常划算。下個日本之旅，記得使用「Vacation STAY」尋找並預訂心儀住宿啦！
去京都旅行前，你需要知道的五件事
- 【2023年最新版】日本京都車站必買手信推薦！抹茶甜品＆零食餅乾
- 【日本47都道府縣特輯 Vol.3】 千祈唔好輕易相信京都人嘅稱讚說話！？盤點日本全國城市傳聞 ～京都篇～
- 【日本京都】去京都旅行都要大嘆特嘆溫泉！京都站周邊溫泉旅館&溫泉區推薦
- 【懶人包】紅葉季去日本玩必睇！享受紅葉絕景實用資訊&最佳玩法全攻略！
Comments