從2022年10月11日起，日本政府大幅放寬應對新冠疫情嘅邊境口岸措施，取消入境人數上限，亦解禁了外國遊客嘅個人旅遊，恢復免簽證旅行。意味著大家等到望穿秋水嘅日本自由行之旅，終於可以實現啦！準備好去日本旅行未吖？
日本解除入境限制，開放自由行嘅時期，啱啱好係踏入秋天時分，第一時間就梗係想去賞紅葉勝地啦！不過講起紅葉季嘅活動，可能大家會諗起行山、遊車河兜風、祭典等經典休閒活動，但如果淨係用對眼去「睇」紅葉嘅話，未免太浪費！想要玩盡紅葉季，就梗係要試勻「食」、「玩」、「飲」3種玩法，先至稱得上係1年1度嘅紅葉季達人啦。本篇文章整理咗關於日本旅行嘅實用資訊、為你介紹紅葉季嘅最佳玩法，享受紅葉絕景之旅嘅全攻略。
【紅葉×住宿】星野集團BEB5輕井澤：酒店房間內外&美食都享受得到紅葉氛圍
唔知讀者們喺計劃賞紅葉行程嘅時候，會比較偏好以下邊種方式呢？
- 根據想要去嘅紅葉勝地再决定前往區域
- 决定好將要前往嘅區域後，再尋找想去嘅紅葉勝地
大部分遊客都會使用以上提及到嘅2種方式去排賞紅葉行程，不過小編會喺呢篇文章分享第3種「配合想要住嘅優質酒店嘅地理位置，去决定旅遊目的地」嘅方式。
皆因近幾年「Staycation」酒店宅度假相當盛行。試想像一下，除咗可以善用酒店設施好好Relax之餘，仲可以喺旅行中加入 「享受紅葉」嘅環節，簡直係一生一大樂事啊。
想喺日本實現住宿豪華酒店兼體驗「Staycation」嘅美夢？小編推薦以下落嚟所介紹，從東京乘搭電車約1小時即可抵達，位於長野縣・輕井澤，交通非常方便嘅酒店住宿！
呢間酒店嘅特徵係可以留喺酒店房，置身於私人空間內享受賞紅葉嘅樂趣。今次介紹嘅有別於一般酒店，從房間眺望窗戶「外」嘅賞紅葉方式，而係享受房間「內」近距離接觸有成5,000塊以上嘅紅葉美景，可謂既罕見又過癮。大家可以好似上圖咁瞓喺滿地嘅紅葉上，被紅葉360度包圍，感受猶如飄來秋天香氣嘅美好體驗！
*1 ：考慮到紅葉方面嘅衛生層面，以假花代替
呢間令一眾紅葉迷欲罷不能嘅夢想房間，叫做「紅葉房間」，位於長野縣・輕井澤「星野集團 BEB5 輕井澤」。附近有多個賞紅葉嘅名勝景點，例如輕井澤高原教會位於酒店旁邊，著名嘅雲場池、白絲瀑布等駕駛出發約20分鐘即可抵達，絕對係紅葉巡遊嘅好據點喔。
「星野集團 BEB5 輕井澤」於紅葉季節登場嘅住宿計劃「BEB 全力 紅葉STAY」，令一眾住宿者可以喺日頭遊覽完輕井澤嘅紅葉名勝，夜晚返到酒店嘅「紅葉房間」繼續賞紅葉，更可化身成電視劇男/女主角盡情拋撒地上嘅紅葉，或瞓喺紅葉地氈上，陶醉於紅葉美景之中！小編相信應該無人可以抵擋得到呢間極具魅力又攞晒滿分嘅酒店住宿吧？
喺「紅葉房間」玩到興起嘅話，不妨著上紅葉花紋嘅吉利服（*2），喺附近嘅紅葉森林玩捉迷藏，感受一個不一樣嘅紅葉體驗。盡情享受秋天嘅輕井澤兼玩吓小遊戲，瞬間重拾童心，為旅程帶來無窮樂趣。（住宿期間內隨時都可以玩捉迷藏喔）
*2 吉利服（Ghillie Suit）：外觀類似於灌木叢嘅迷彩服裝
除咗玩同睇之外，仲可以喺酒店食到一款期間限定嘅Mont Blanc（香港稱為法式栗子蛋糕，簡稱栗子蛋糕）。呢款栗子蛋糕名為「＃盛れる紅葉モンブラン」（盛載紅葉Mont Blanc），以紅葉為設計風格，係一款可以自己親手擠栗子泥，再放上紅葉外型嘅點心，完成自家「擠」嘅栗子蛋糕，相當過癮！
星野集團 BEB5 輕井澤
- 地址：長野縣輕井澤町星野
- 費用：每晚9000日圓～（2人1房時嘅1人房價，已含稅，不含餐）
- 交通：從JR「輕井澤」站乘搭的士或西武巴士約15分鐘
- 入住/退房：15:00/11:00
- 官方網站：https://hoshinoresorts.com/zh_tw/hotels/beb5karuizawa/
BEB 全力 紅葉STAY
- 限定期間：2022年10月17日～11月13日
- 費用：1間房1晚為18,480日圓～（含稅，不含餐）
- 限定人數：1日1組（1組最多3位房客）
【紅葉×手信】唔係淨係得「紅葉饅頭」！仲有利用紅葉製作嘅美食&飲品
如果有去過日本中國地區嘅話，應該有聽過廣島縣嘅銘菓「紅葉饅頭」吧。外型仿照廣島縣嘅縣花・縣木嘅紅葉形狀，於Castella（又稱作長崎蛋糕）嘅麵糰中加入內餡烤製而成嘅特色食品，廣島縣・宮島作為紅葉饅頭嘅發源地而廣為人知，以創業140年嘅博多屋為首，銷售紅豆餡、紅豆泥餡、抹茶餡、忌廉餡、朱古力餡等各種口味嘅「紅葉饅頭」。
將「紅葉饅頭」油炸，製作而成嘅「宮島Jakee（*3）」亦非常著名。
*3：「Jakee（じゃけぇ）」：廣島方言，意思係「所以」
「博多屋」每日都會喺店舖裡面烤製「紅葉饅頭」，大家可以喺度享受得到新鮮出爐嘅「紅葉饅頭」！另外，仲可以隔著玻璃參觀職人製作嘅過程喔。
博多屋
- 地址：廣島縣廿日市市宮島町459
- 營業時間：09:00～18:00
- 交通方式：從宮島棧橋徒步約10分鐘
- 官方網站：https://miyajimahakataya.com/
究竟「紅葉Cider」＆「紅葉天婦羅」係乜東東！？
「紅葉饅頭」係「與紅葉有關嘅特產」，但實際上並非只有於名稱中加入「紅葉」2字嘅特產，仲有直接使用紅葉製作嘅美食&飲品喔！
由「紅葉饅頭」嘅老字號店舖設計，使用紅葉所製作嘅碳酸飲品「紅葉Cider」，喺廣島縣宮島就可以買得到。雖然係2021年新登場，但早就被納入新宮島名產嘅候選名單。
於瀨戶內檸檬果汁中，加入從紅葉所抽取嘅提取物，製作成淡粉紅色嘅全新感覺飲品。據聞呢款「紅葉Cider」味道係易入口嘅檸檬味，淡粉紅色嘅可愛外觀，與宮島紅葉美景簡直係最佳搭配喔！
大阪府・箕面市 箕面山嘅紅葉
圖片提供：（公財）大阪觀光局
從大阪市內乘搭電車約30分鐘，即可抵達箕面市，喺度就可以買到以紅葉所製作嘅美食。另外，箕面山・箕面公園作為關西首屈一指嘅紅葉名勝而廣為人知，落差約33米嘅箕面大瀑布（也被稱為箕面瀑布），與其四周盛放嘅紅葉交織出嘅絕景令人嘆為觀止。
代表著箕面嘅名產就係「紅葉天婦羅」。相信大家從名稱就可以想像得到，係一款以油炸所製作嘅紅葉點心。從11月中旬到12月上旬，於箕面山上以人手收集紅葉，並將其以鹽醃漬、再去除鹽後，加入麵粉、水、砂糖、芝麻，炸成香脆口感嘅「紅葉天婦羅」。
從品嚐過嘅人口中得知，「紅葉天婦羅」嘅香脆口感令人感覺到砂糖嘅甜味之餘，仲好味到一開始食就停唔到口。想要親身品嚐其好滋味嘅話，可以喺通往箕面瀑布，沿途所經過嘅一整排店舖當中，買返件「紅葉天婦羅」大嘆特嘆啦。
放上紅葉天婦羅嘅雪榚「紅葉天雪榚」 亦係箕面名產之一。無論係視覺定味覺都瞬間變成紅葉嘅世界！
箕面公園
- 地址：大阪府箕面市箕面公園
- 交通方式：阪急電鐵箕面線「箕面」站落車後，徒步約5分鐘即可抵達箕面公園入口
- 官方網站：https://www.mino-park.jp/
【紅葉×和傘】想為旅程影靚相留倩影嘅最佳小道具——「紅葉與傘」
難得遇上正值秋季時期嘅日本，就梗係想影返張個人史上最呃Like嘅靚相！
想將紅葉背景發揮到100分，就要加返把和傘（*4）作為攝影小道具啦！和傘充滿懷舊美好嘅日本風情，唔少旅館與料亭（日本傳統高級料理餐廳）都會用作室內裝飾、接送時使用。喺眾多設計當中，由職人親手摘下一塊又一塊嘅紅葉所製作嘅和傘，簡直就係藝術品！賞紅葉嘅同時，一定要拎返把和傘影返張靚相留倩影喔。
*4：和傘：使用竹、木、線等天然素材，於骨架上貼上和紙製作嘅傘之總稱
- 左上＆右上：黑竹蛇之目傘「透現紅葉」/71,500日圓（含稅）
※使用防水加工完畢嘅手漉特選和紙 - 左下＆右下：黑竹和陽傘「紅葉」/36,300日圓（含稅）
※雨天不能使用
使用「透現紅葉」嘅技法，只用日本產嘅天然素材所製作嘅和傘。 從內側可以望見被光透過嘅紅葉模樣。
除咗有提供販售之外，全國各地都有出租紅葉和傘嘅店舖與設施，所以想影出有如京都舞妓、藝妓嘅和風美人（或美男）相，一定要喺旅途中尋找一把擁有日本古風之美嘅和傘喔！
辻倉
- 地址：京都市中京區河原町四條上東側 TSUJIKURA大樓7樓
- 營業時間：12:00～18:00
- 交通方式：從阪急「河原町」站徒步約3分鐘
- 官方網站：https://www.kyoto-tsujikura.com/
京都勝林寺「秋天之拜觀」太吸睛！
京都勝林寺於「秋之拜觀」期間，亦有加入和傘嘅特別展示。置身於紅葉×和傘×寺共同所交織出嘅夢幻景色，一定能治癒都市生活嘅疲勞喔。
京都勝林寺 秋之特別拜觀2022
- 地址：京都府京都市東山區本町15-795
- 舉辦期間：2022年11月12日~12月4日
- 舉辦時間：10:00~16:00
- 交通方式：從JR奈良線「東福寺」站徒步約8分鐘
- 官方網站：https://shourin-ji.org/
睇完以上有關紅葉嘅介紹與吸睛靚相，應該好想馬上出發去日本吧？
FUN! JAPAN會全力支持你嘅日本紅葉之旅！即刻睇埋以下幾篇有關日本旅行實用資訊嘅文章啦↓
Comments