縣內約8成面積屬於森林嘅長野縣，擁有日本阿爾卑斯山脈群山、人氣景點「上高地」、「白馬岳」等多個日本知名山峰。全日本23座達3,000米嘅山峰當中，就有15座位於長野縣！唔知喺呢個「山岳之國」入面，又會誕生出點樣嘅飲食文化和當地美食呢？
何謂「B級美食」
除咗眾所皆知、被譽為旅遊必食嘅美食之外，即使係同一個縣，亦會根據不同區域而誕生出不一樣嘅當地美食。呢種當地美食多數以當地食材烹煮，無任何華麗嘅技巧或裝飾，屬於當地居⺠熟悉嘅好味道，通通被日本人稱為「B級美食」。
長野美味優勢
長野縣係日本國內面積第四大嘅都道府縣。唔單止無海之外，仲係日本最大嘅內陸縣，可想而知，呢度嘅美食主要與山林、農作有關。縣內用作農作生產嘅農地遍佈海拔300至1,500米嘅高地，善加利用上天賜予嘅高海拔、多日照、日夜溫差大等天然條件，積極開發農業技術並迅速普及，令長野嘅農業水平大幅提升，除咗農家嘅總數目（*1）名列全國第一，連農產物生產量、品質亦名列前茅。如山葵、生菜、芹菜、鴻禧菇生產量都是係日本第一（*2）。
*1：參考自總務省統計局「令和2年國勢調查」
*2：參考自農林水產省「令和2年產野菜生產出荷統計」、林野廳「特用林產基礎資料」
長野B級美食
山賊燒
先用蒜醬油醃雞扒（可以係雞髀肉或雞胸肉），再裹上片栗粉後油炸，簡單嚟講即係「炸雞扒」。發源於長野縣松本市、鹽尻市嘅鄉土料理，現時喺縣內多處都可以品嚐得到。據鹽尻市「元祖山賊燒」居酒屋「山賊」店長所講，發明山賊燒嘅初代店長外型有如山賊般豪邁野性，又咁啱想改個其他人絕對唔會用且富趣味性嘅名，所以決定使用「山賊」二字，結果呢道菜色大受好評，其後甚至將店名「松本食堂」改為「山賊」。
明明係炸物，點解叫做「燒」呢？聽聞其中一個講法係由於當時日本嘅食油非常珍貴，所以只可以喺煎鍋上加少量食油輕輕燒煎；仲有另一個講法，係因為將雞肉油炸嘅日文叫做「鶏を揚げる」（tori-o-ageru），山賊奪取財物嘅日文係「（物を）取り上げる」（mono-o-toriageru），兩者發音相近，因而得名。
信州三文魚丼飯
長野縣無海，過去嘅水產品皆來自當地河川、湖泊。為培養當地特產魚類，於1950年開始大規模人工養殖虹鱒，1994年開始將虹鱒與褐鱒交配繁殖，花費10年時間，終於培育出新品種魚「信州三文魚」（信州サーモン）。
信州三文魚嘅魚身望落係一般三文魚嘅銀色、魚肉呈色澤迷人嘅橙紅色，相對大海養殖嘅鮭鱒魚類擁有較高蛋白質、含較低脂肪，而且品質安定，更重要嘅係唔會受寄生蟲感染，成為長野縣代表性嘅高級魚。由於無法自然生育，生產量受到限制，最好嘅食用方法就係親身去長野縣品嚐喔！
本山葵飯
日本常見嘅山葵主要分為西洋品種嘅「西洋山葵」（西洋わさび）與日本原產嘅「本山葵」（本わさび）兩種。長野縣出產嘅本山葵唔單止色澤佳、香氣足，磨成泥後品嚐，入口首先會感受到直衝上腦嘅刺激辛辣，之後卻轉變成甜味回甘，係一般山葵無法品嚐得到嘅好滋味。
既然身為日本山葵生產量（*3）最大地，就梗係有以山葵為主角嘅美食出現啦。當中不得不提，經過日本最大規模山葵農場「大王山葵農場」（大王わさび農場）多次改良推出嘅「本山葵飯」（本わさび飯）。熱騰騰嘅白飯搭配上紫菜絲、柴魚片、青蔥等食材，同埋主角新鮮山葵，令人一食難忘！通常被當做配角嘅山葵，喺度卻成為無可取代嘅大明星，想要一嚐新鮮山葵令人驚豔嘅美味，絕對要去嘆返碗本山葵飯喔！
*3：以水山葵與田山葵總生產量計算，資料參考自農林水產省2022年發佈之「特用林産物生産統計調査」
栗子甜品
長野縣亦係知名嘅「栗子」生產地，當中最有名嘅係「小布施栗」與「信州伊那栗」兩大品種。
兩種栗子都強調自己甜度高、風味濃厚，「小布施栗」以產地「小布施町」為名，據聞小布施從室町時代（1336年 ～1573年）便開始栽種，品質優良，仲曾經獻畀江戶幕府將軍；「信州伊那栗」雖然喺2003年先至開始栽培，但受惠於其栽培地長野縣南部盆地「伊那谷」得天獨厚嘅氣候與地理環境，專家學者、農家對栽培技術嘅改良與嚴格執行，加上食品加工業、甜品店開發出各種相關產品，令信州伊那栗嘅好滋味得以送往各地，加上各單位全員投入，亦令信州伊那栗能與小布施栗平分秋色。
究竟兩者嘅美味又有咩唔同？咁就要等你親身自嚟品嚐鑑定啦！除咗可以喺超市、農產品店購買之外，亦推薦喺盛產嘅秋季，直接前往產地喔。到時唔單止品嚐到最新鮮嘅栗子，仲可以大嘆多種以栗子製成嘅甜品！
蝗蟲佃煮
「伊那谷」周邊地區自古就有「食用昆蟲」嘅文化，如蝗蟲、蜜蜂幼蟲等。當中一大代表性昆蟲料理，就係將蝗蟲放置一晚，等排泄物全數排出後，再用熱水燙熟，然後用醬油、砂糖燉煮入味而成嘅「蝗蟲佃煮」（いなごの佃煮）。
要將眼前嘅蝗蟲佃煮放入口，或者需要好大勇氣，但係屬於「山岳大國」嘅長野縣，食用昆蟲係有助補充動物性蛋白質嘅主要途徑。再者，食蝗蟲等會影響農作收穫嘅害蟲，唔單止可以保護稻作，又可以補充營養，一舉兩得！
事實上，高蛋白質嘅「昆蟲食」近年喺日本變得備受矚目。除咗有無印良品推出嘅「蟋蟀煎餅」與「蟋蟀朱古力」，東京澀谷街頭出現低脂高蛋白飲食昆蟲餐廳之外，仲有內藏昆蟲料理嘅扭蛋畀您扭住嚟食，真係驚喜無限呢！
地方B級美食相關文章
Comments