有報導指出，隨著世界人口不斷成長，喺不久嘅將來會出現糧食不足嘅危機。雖然唔係人人都可以接受到食昆蟲，但因為昆蟲可以作為未來營養來源、對環境負荷又低，所以「昆蟲食物」逐漸受到大家關注。
近年呢股昆蟲潮流亦喺日本興起，唔少日本人餐廳開始積極推廣昆蟲食物，提升大眾對昆蟲食物嘅認知度。例如：與昆蟲食物有關嘅書籍、研發添加蟋蟀粉末嘅蟋蟀煎餅，提供昆蟲餐單可持續理念嘅餐廳等。FUN! JAPAN編輯部亦跟上時代尖端，走訪東京澀谷一間專門提供昆蟲食物可持續餐廳「EAT for E」，為大家介紹昆蟲食物！
暗黑拳擊健身品牌「b-monster」旗下可持續餐廳「EAT for E」
喺一片漆黑環境底下打拳擊，係日本最近相當流行嘅運動之一。當中值得一提嘅就係暗黑拳擊健身品牌「b-monster」。喺黑暗中身體隨著大音量嘅音樂擺動，無需在意他人目光盡情活動全身，就好似喺夜店跳舞一樣，徹底放鬆身心。唔單止有趣好玩，參加一堂課仲可以消耗唔少熱量，達到高效率健身效果，有別於以往嘅拳擊，屬於嶄新型態嘅拳擊健身。
「b-monster」秉承著「想要創造一個世界，人人都要不斷追求提升身心，持續勇於面對各種挑戰」理念，希望透過健身，協助大家打造健康體態，而與健身最密不可分嘅關鍵就係－飲食！
「b-monster」唔單止注重減重健身時所需嘅營養，更希望透過健康美食，令健身效果加倍。喺思考菜式內容當中有咩新鮮、有趣嘅事物嘅時候，當時諗到嘅就係「昆蟲食物」。昆蟲擁有豐富蛋白質、低脂肪，而且營養價值高，最適合用嚟塑造體態或減重。為咗實現可持續社會與環境友善嘅考量之下，品牌因此就希望推出以「昆蟲」為主嘅菜單，可持續餐廳「EAT for E」因此誕生。
關於「EAT for E」
「Eat for E」店名靈感嚟自「EAT for Earth(為地球而食)」，喺呢度可以品嚐到現今因糧食問題及有益健康而備受矚目嘅昆蟲美食。主角係日本尚未普遍被接受嘅「昆蟲餐」！為令到大家食得更輕鬆自在，「Eat for E」所有菜單都係由米芝蓮一星級餐廳「sio」嘅鳥羽主廚監修設計，而為咗唔會畀人一眼睇穿菜式裡面加入昆蟲，喺食物外型方面落咗唔少工夫，更提供口感多元豐富嘅菜色同飲品，等您想食又得飲又得任君選擇，部分菜式可以依照個人喜好去自選昆蟲做裝飾配料。順便提一提大家，如果無辦法接受成隻昆蟲放上面嘅話，亦可以選擇配料唔加昆蟲，單純享用美食喔。
「EAT for E」嘅點餐與付款埋單等流程完全可以網上操作，無需企喺收銀機面前大排長龍。拎出手機掃一掃餐檯上嘅立牌QR Code，就會顯示菜單！店裡面採用自助式服務，點好餐之後，自己去櫃台拎餐就ok。小編溫馨提示，「EAT for E」係唔可以用現金埋單，大家記得要注意啊！
美味程度毫不輸蝕！蟲蟲美食講究營養又豐富多元化
今次小編叫咗「可持續蛋白質泰式肉碎飯」同埋「可持續大豆肉咖哩」，飲品方面則有「蜜蜂Lemon Sour」。
「可持續蛋白質泰式肉碎飯」嘅白飯裡面加咗蟋蟀粉去煮，令白飯食落更健康。肉碎飯上面放有好幾種蔬菜以及泰式肉碎、羅勒與荷包蛋，加上蛋黃醬調味。以醬油、味醂煮到甜一甜嘅蠶蛾係呢個菜式中嘅昆蟲主角。由於「可持續蛋白質泰式肉碎飯」本身就有多種食材，大大降低昆蟲嘅存在感，即使唔多Like蟲蟲嘅小編都可以克服心理障礙，毫無抵抗地大啖咬大啖食得好滋味。
跟住要介紹嘅係用大豆肉製作嘅「可持續大豆肉咖哩」。菜式一上檯，小編就開始左搵右搵，但始終都搵唔到蟲蟲嘅蹤影。心諗蟲蟲究竟身藏何處，後來先至知「可持續大豆肉咖哩」裡面完全無放任何昆蟲或昆蟲製成嘅粉末。使用大豆製成嘅肉，咬落同真嘅肉無咩分別，唔講真係以為食緊真嘅肉啊！非常推薦畀對昆蟲無從入口，但又想食得健康嘅您。
最後登場嘅就係飲品喇！「EAT for E」提供嘅飲品，無論係茶、Lemon Sour、Highball威士忌梳打調酒等等都會擺上昆蟲裝飾。FUN! 編當日點咗杯「蜜蜂Lemon Sour」，去櫃檯拎餐嘅時候，見到杯嘢飲上面嘅檸檬切片放有虎頭蜂呢個畫面衝擊力非常大，咁震撼嘅擺法，對於唔多歡喜昆蟲嘅人或者會有少少抗拒，記得喺點飲品嘅時候，要揀「唔要裝飾配料」呢個選項！
除了以上介紹嘅菜單內容之外，「EAT for E」仲有提供油炸大麥蟲、加入蟋蟀粉製作嘅蛋白質沙律、乾燥蟋蟀、添加蟋蟀油嘅蛋白質湯等等選擇豐富。日後隨著昆蟲食物嘅飲食文化推廣與普及，話唔定有一日就算湯裡面出現蟲蟲亦不足為奇呢。下次有機會去東京，不妨親身體驗一下呢股嶄新嘅飲食潮流啦！
店舖資訊
- 店名：EAT for E
- 地址：東京都澀谷區宇田川町20-11 澀谷三葉大樓B1F
- 營業時間：11：00〜20：00（最後點餐時間為19：30）
- 定休日：不定期定休(新年假期正常營業)
- 從JR各線「澀谷」站徒步約6分鐘
- 從半藏門線、副都心線、東急東橫線、東急田園都市線「澀谷」站6號出口，徒步約3分鐘；8號出口徒步約5分鐘
- 京王井之頭線「澀谷」站中央口驗票閘門，徒步約8分鐘
Comments