正如上回「2,000yen扭蛋企劃」提到，潮流最前端嘅扭蛋玩具並非一定係「玩具」！新出嘅扭蛋機嘅內藏商品種類範圍非常廣泛，當您擰開扭蛋，裡面可能係酒店住宿券、機票、餐飲券等等，時下嘅扭蛋「玩具」內容物千奇百怪，可謂令人扭出無限驚奇。
唔知大家仲記唔記得FUN! JAPAN曾經介紹過一間名為「米和馬戲團」嘅餐廳呢？就喺嗰間會提供稀有野生獸肉，甚至用昆蟲製作菜式嘅餐廳吖！因乜解究要提起呢間餐廳？因為今日嘅扭蛋企劃主角，正正就係「米和馬戲團」裡面所提供嘅昆蟲食物，統統化身成為扭蛋玩具畀大家大扭特扭。扭蛋裡面會有蟬、大麥蟲（超級麵包蟲）、編織蟻后……相信唔少人聽到以上幾種蟲蟲嘅名都會即刻起晒雞皮吧。勇者小編為咗令大家認識更多未知領域，決定身先士卒，潛入蟲蟲世界奮勇扭蟲，親身為大家報導實地情況！
澀谷發現內藏昆蟲嘅扭蛋機！？
昆蟲扭蛋機位於開設喺澀谷PARCO嘅「米和馬戲團 澀谷PARCO店」。小編其實私底下都去過好幾次，呢度除咗有提供奇珍異獸嘅漢堡扒、或以「唐揚」油炸方式所烹煮嘅菜式，仲會有昆蟲糰子（！）、芭菲（！！）、梳打（！！！）提供，更被多間媒體報導，稱得上係時下熱門嘅話題店舖之一喔。
圖中就係今次嘅主角－「食べる！昆虫ガチャ」昆蟲扭蛋機。扭蛋機從2022年5月開始新設置，販賣有別於一般料理嘅昆蟲食物。
相信唔少人都好想知道，究竟昆蟲扭蛋機每扭一次係幾多錢？答案係500日圓，而且扭蛋內容陣容強勁，有蟬幼蟲、編織蟻、竹蟲、蝗蟲、超級麵包蟲、雙斑蟋蟀、大蟋蟀等等12種昆蟲食物。
扭出嚟嘅扭蛋就好似一粒謎一樣嘅黑色膠囊，未到開封一刻都都唔會得知會遇上咩蟲蟲。小編抱住又「驚」又「喜」嘅心情，一共扭咗6粒扭蛋。
終於要同營養豐富嘅昆蟲們見面了！
比起擰開普通扭蛋，而家嘅感覺比平時緊張萬分（因為扭蛋裡面嘅係真昆蟲吖）。小編要深呼吸，然後鼓起勇氣擰開佢哋啦！
內容就如上圖般，包裝上都會有記載昆蟲各自嘅名稱以及其營養成分，每項列明得相當清楚。
雖然根據不同種類會各有差異，但實際上亦有比肉類或魚肉含有更多蛋白質、維他命、礦物質嘅昆蟲。例如，蟋蟀嘅蛋白質含量比例高達50~75%，而且仲含有豐富嘅礦物質、維他命B群、食物纖維、Omega-3等等多種營養成分。簡直係「蟲不可貌相」喔。
當小編一望個包裝袋背面，就見到今次嘅昆蟲們主角出場兼同小編Say Hello（上圖係令人充滿視覺衝擊嘅大蝗蟲）！
為舌尖帶來困惑，挑戰尚未開發嘅味蕾地帶
相信大家都好想知道，蟲蟲們究竟係咩味道吧！小編先同大家講一下食後感，就係至今為止都無食過嘅味道，所以只能用味道相似嘅食物去做比喻喔。（打個譬如，小編話「雞肉味」，大家可以想像得到大概係咩味，但係如果話「蟬味」，大家應該無法想像吧？）
以下落嚟就係蟲蟲食不停嘅勇者小編，為大家分享嘅蟲蟲們食評ー
↓
↓
↓
【蟲出沒注意！怕蟲人士慎入】
↓
↓
↓
首先登場嘅係蟬幼蟲。
望落夠晒大隻，食落口感豐富之餘咬落亦相當酥脆，味道仲有啲似經烘焙烤過嘅堅果。
跟住出場嘅係超級麵包蟲。
如果喺超級麵包蟲仲在生嘅時候與小編相遇嘅話，小編應該會毫不猶豫，進行歇斯底里式尖叫，但係萬萬都估唔到當超級麵包蟲化身成昆蟲食物之後，唔單止食落鹹香味剛好，口感仲相當酥脆，令小編瞬間就食晒成包。如果呢個時候有酒或者可樂相伴嘅話，小編個胃會表示更加滿足喔。
第3道出場嘅係編織蟻后。
食落稍微有少少澀味，以個人感覺作比喻嘅話，好似介乎喺乾咗嘅茶葉與粟米之間嘅口感。為咗令大家可以享用得到食材嘅真味道，店家將食材加工至呈乾燥狀態之後，只用鹽作調味，因此比起就咁食，小編會比較想用嚟餸飯或者直接當伴飯素咁享用喔。
除此之外，如果扭中金色扭蛋，就代表中獎囉！幸運兒可以拎住粒金色扭蛋，去換取一枝昆蟲飲品「田鱉梳打水」，即係使用田鱉精華製作成呈水果茶香味嘅飲品。不妨拋開先入為主嘅觀念，嚟挑戰一下啦！
喺澀谷就可以遇上，至今為止從未品嘗過嘅不思議味道。希望「蟬味」、「螞蟻味」喺不久將來，都可以喺社會上紮根啦～
店舗資訊
- 名稱：米和馬戲團 澀谷PARCO店
- 地址：東京都澀谷區宇田川町15-1 澀谷PARCO地下1F
- 營業時間：11:30〜23:00
※星期二為17:00〜 - 官方網站：https://asia-tokyo-world.com/
Comments