每次見到扭蛋（日本通稱為「GACHAGACHA」*1）機，都會忍唔住走埋去入錢，然後轉啊轉再轉啊轉，究竟因乜解究會令人無法抗拒去轉扭蛋呢？
皆因無法預測自己會扭出咩驚喜，心情既期待又興奮、
而且扭蛋內藏物品甚至幾可亂真，還原度極高、
再加上儲齊晒成套扭蛋時嘅快感，一發不可收拾。
只需花費幾百yen去扭蛋，就可以得到以上咁多樣滿足感，唔怪之得不分國籍、男女老幼都願意喺扭蛋上面消費！
不過，最新款嘅扭蛋種類範圍相當廣泛，認為「扭蛋＝玩具」就大錯特錯！如果大家都係同小編一樣咁鍾意扭蛋嘅話，就一定唔可以錯過本篇文章！以下落嚟將會介紹好幾款2022年最新扭蛋，絕對會令鍾情扭蛋人士好想據為己有，甚至決心扭齊一套喔！
*1：「TAKARATOMY-ARTS.」商標註冊為「GACHA」、「BANDAI」商標註冊為「GACHAGACHA」、「GACHAPON」、「GASHAPON」等等多種不同稱謂。
※此文章所記載之情報為2022年6月嘅情報。
※所顯示金額嘅均為轉1次扭蛋嘅價格。
出發！尋找最新扭蛋嘅散財之旅…
目前日本扭蛋市場規模估計每年突破450億日圓，喺主要機場、鐵路總站、購物中心等等，全國各地都設有多間扭蛋專門店。相信唔少人都試過喺日本旅行去到尾聲位，準備返香港之前仲剩低一堆硬幣嘅話，會將啲銀仔全部奉獻晒畀扭蛋機吧？
為咗向大家報導有關經常推陳出新嘅扭蛋之最新情報，小編親身嚟到呢間於2022年2月，喺東京原宿開幕嘅扭蛋專門店「ガチャガチャの森」（GACHAGACHANOMORI）。
「森林（店鋪）」裡面，有成1,200部以上嘅「樹木（扭蛋機）」，無論係動漫相關、卡通角色、特攝英雄、動物、抑或係微縮模型、小物雜貨等等……從經典到新奇系列款式都應有盡有，扭蛋愛好者走入「森林（店鋪）」，簡直就好似被捲入一股興奮漩渦之中不能自拔喔。
除咗有「樂天熊仔餅」、仲有連鎖家庭餐廳「Denny's」嘅菜式等等，像真度極高嘅微縮模型都可以喺度搵得到。小編有預感，呢度有種強如Dyson嘅吸力，將會吸走一個又一個嘅100yen硬幣…
為免過度出血，小編將今日嘅散財金額上限設定為2,000yen。好喇，小編出發去轉扭蛋喇！轉啊轉轉啊轉…
上圖就係今日嘅戰利品（每個100yen至300yen不等）。事不宜遲，立即進行開封儀式！
扭蛋進化到出神入化！去探索顛覆您想像嘅扭蛋世界～
首先介紹嘅係今次嘅扭蛋戰利品當中，最令小編驚訝嘅扭蛋。
CP值超高！1粒扭蛋帶畀您2次驚喜～
「迷你液晶遊戲機 FIT」 / 300日圓
講到最令小編驚訝嘅係，呢款扭蛋只係「轉扭蛋→擰開扭蛋→收藏」咁簡單－皆因裡面藏有一部迷你液晶遊戲機，係真係真係真係可以玩得㗎！係咪名乎其實1粒扭蛋，帶畀您2個（3個甚至4個）驚喜呢。
唔好睇「迷你液晶遊戲機FIT」細細部，內附有成23款遊戲！除咗有聲音功能，仲有得揀遊戲嘅Stage、Level同埋速度，令人不禁回想起80年代時，手拎住初代GAMEBOY狂玩俄羅斯方塊嘅童年時光。（好懷念吖）
「麵包與環保袋」 / 300日圓
仲有唔少「1粒扭蛋帶畀您唔止1次驚喜」嘅物品。就好似上圖呢個圓形物體，望落好似只係一款普通嘅「麵包」…
打開拉鍊，原來有個環保袋收埋喺個麵包拉鍊袋裡面吖♪
而且仲係大容量Size，有成約26cm × 35 cm咁大，就算放5件紙盒裝牛奶落去都仲綽綽有餘喔。
「THE・PAPER10」 / 200日圓
將廁紙變成扭蛋，真係一個顛覆想像又非常搞鬼嘅設計喔。裡面仲有埋廁紙筒、廁紙架等等，喺唔少細節位都落足功夫，打造得相當細緻。
拉出嚟嘅「廁紙」仲可以當做MEMO紙用喔！不妨效仿屋企會買定好幾卷廁紙嘅做法，喺辦公室張檯度放多幾卷扮「廁紙」嘅MEMO紙啦。
發現令人不禁「！」驚嘆連連嘅創意扭蛋
「萬物皆可！紫菜紙膠紙」 / 200日圓
任何物件只要用呢款膠紙捲一捲，都會瞬間化身成為紫菜卷。記得要多加留神，唔好因為過於逼真而唔小心擺入口喔。
總之就係一卷超逼真嘅紫菜膠紙，望落簡直就好似真嘅紫菜一樣喔。
「飯糰擦膠」 / 300日圓
望落呈方形飯糰形狀，其實係一款有「餡料」嘅飯糰擦膠喔。當您使用呢款擦膠嘅同時，就可以慢慢擦出飯糰嘅「餡料」，不禁令人期待到底會出現咩「餡料」, 增添不少樂趣。
順帶一提，小編扭中嘅係吞拿魚蛋黃醬。
最後等小編出返條謎題畀大家挑戰一下－
大家齊齊估一估上圖擁有相當吸睛，以飯糰作外形設計嘅外盒，打開之後裡面會出現咩驚喜呢？ 謎底會喺文章尾聲揭曉↓
（小貼士：時下嘅年輕人，會將佢當作時尚搭配嘅一部分。）
店舖資訊
- 名稱：ガチャガチャの森（GACHAGACHANOMORI）原宿ALTA店
- 地址：東京都澀谷區神宮前1-16-4原宿ALTA2F
- 營業時間：10:30～20:00
- 官方網站：https://www.gachagachanomori.com/
謎底：係戒指吖！
「飯糰餡料 3」 / 300日圓
小編試戴完呢隻香葱吞拿魚之後，深深感受到要戴住佢出街係需要鼓起唔少勇氣喔…？
Comments