無印良品宣佈推出「蟋蟀煎餅」，將於2020年5月20日開始於網上發售。由於日本食昆蟲並唔係咁普遍，所以好多人都表示好驚訝。但其實無印良品今次呢個「革新」商品背後有好深遠嘅原因架！等我地一齊睇深層啲～
面對糧食危機 率先研究以昆蟲為食糧？
以「為顧客提供品質優良生活」為概念嘅無印良品，其實推出呢個「蟋蟀煎餅」係有深層原因。由於世界人口急速增長，為咗面對今後將會出現嘅糧食危機同環境問題，無印良品特地去咗訪問有豐富食昆蟲經驗嘅芬蘭等地收集情報，最後決定同研究昆蟲食品嘅德島大學合作，研究將蟋蟀作為食材。
有咁多嘢唔食，點解要食蟋蟀？
根據有關方面嘅研究，食昆蟲比食家畜更好嘅原因有幾個：
- 昆蟲體內含有好多種主要營養，而一般家畜最主要營養就只係動物性蛋白
- 食昆蟲吸收營養更有效率
- 昆蟲繁殖時所產生嘅二氧化碳排出量較少，對環境影響較少
- 養殖昆蟲時所需嘅水同飼料亦壓倒性地比養殖家畜少好多
就連聯合國糧食及農業組織 (FAO)都因為昆蟲食品營養高而且對環境負荷少為理由，推薦以食昆蟲代替食家畜。
而喺昆蟲入面，容易飼養而且可以有效率咁養殖嘅蟋蟀，又適合食用，所以世界各地都有關注食用蟋蟀。今次無印良品以德島大學研究生產嘅食用蟋蟀為原料，由原料到製品全部都日本製，係令人安心嘅made in Japan，既可以確保安全性，亦確保有一個穩定嘅供應體制。
無印良品嘅「蟋蟀煎餅」 味道似蝦餅？
無印良品嘅蟋蟀煎餅，使用咗德島大學研究使用嘅熱帶蟋蟀「黃斑黑蟋蟀」。全部都喺衛生安全嘅環境下飼養，保持一定嘅溫度同濕度，就可以全年都產卵繁殖，所以可以生產到足夠食用嘅原料。而且為咗可以食得滋味，今次仲將蟋蟀製作粉末，用嚟整煎餅，既可以充分利用蟋蟀嘅味道，亦唔需要使用過多原料，非常簡單合配。大家可以品嘗到近似蝦嘅味道。
商品資訊
- 商品名稱：蟋蟀煎餅
- 售價：190日圓（已包稅）
- 容量：1包55克
- 發售日：2020年５月20日（三）
※食用蟋蟀嘅粉末含有類似蝦蟹等甲殼類成分，如對蝦蟹有過敏者，不建議食用。
Comments