如果您曾經喺日本租過屋或者入住過當地民宿嘅話，相信或多或少都有見識過日本當地嘅廚房，甚至曾經「落廚煮過幾味」。
日本廚房除咗常見嘅IH電磁爐之外，二合一式煤氣煮食爐亦好常見。以為好似香港嘅煮食爐咁操作非常簡單？其實日本組合式煤氣煮食爐嘅爐頭下面仲附帶一個迷你焗爐，要打開把手先會見到，好多設計位同香港常見嘅煮食爐都唔相同。今次就等編輯部簡單介紹一下日本組合式煤氣煮食爐上面有啲咩掣同用法，等大家有機會喺日本當地嘅廚房煮嘢食嘅話，可以用得更安心煮得更放心，避免因為撳錯掣而引起火災！
啟動媒氣爐
首先，請注意煤氣爐上面有一個好幾段式嘅「火力調較」設計。喺啟動煤氣爐之前，要將火力強度較去「強」，即係「大火」，因為燃點煤氣爐嘅時候，需要用到大量氣體先會點得著；火勢強度轉「強」之後，就按下位於「火力調較」位置下方嘅「爐頭開關按鈕」點火。當您按下「爐頭開關按鈕」嘅過程中會聽到「咔嚓」聲，要撳到底直至爐頭嘅火點著為止；當爐頭產生火花，就可以鬆開「爐頭開關按鈕」，然後調較所需火力嘅大小。
如果出現空鑊乾燒嘅情況，感知器就會自動調節火力為細火，並響起「咇咇」聲作提醒。若果溫度繼續持續上昇，就會自動熄火。見到以上情況嘅話唔洗擔心，並非煤氣爐故障，只係感知器智能感知正確溫度，有效預防煮食鍋過熱等情況出現，避免釀成家居意外。
焗魚用迷您焗爐
講到日本嘅組合式煤氣煮食爐嘅話，就不得不提煮食爐上所附設嘅迷您焗爐，其最主要用法就係直接用嚟焗魚！迷您焗爐上面寫著嘅日文「グリル」係指燒烤嘅意思，亦有部分型號會畫上魚仔圖案代表「開關按鈕」喔。
迷您焗爐嘅使用方法非常簡單，只要拉開焗爐把手，就可以將焗盤拉出用嚟整燒三文魚或鯖魚，安在家中輕輕鬆鬆嘆返個「偽」日本餐廳燒魚定食。焗魚前記得要鋪定鋁箔紙係底以防魚皮「黐底」，或食物油漬、醬汁等等滴到周圍都係，比較容易清理。
有機會嘅話，不妨喺一個悠閒嘅早上整返碗味噌湯再加碗白飯，嘆返個不一樣嘅日式早餐，諗起都零舍醒神！
煤氣爐上其他資訊
煤氣爐上有一個畫上三個火焰嘅掣，寫著「3秒押し高温炒め」，表示長撳3秒就可以保持高溫大火，感知器嘅高溫感應臨界點會比一般高，避免因為高溫而自動轉成細火。想要高溫大火炒菜或保持高油溫炸天婦羅嘅話，記得要用呢個掣喇。
火力調較等級與電池盒
「火力調較」嘅所在位置會寫上弱（細火）至強（大火）。另外，煤氣爐上會見到上面寫著日文「おしらせサイン」嘅一個電池盒，即係更換電池指示燈，如果盞燈著咗即表示要更換電池。打開下面個電池盒蓋，放入兩粒一號鹼性電池就完成更換電池步驟。
如果一直都用慣IH電磁爐嘅話，或者會對煤氣爐咁夠「鑊氣 」嘅火力表示驚訝，但最令香港人驚喜應該係日本嘅組合式煤氣煮食爐可以又焗又煮，一爐多用非常方便！
Comments