愛媛縣係四國四縣中人口數最多嘅縣，除咗有日本三古湯之一「道後溫泉」、現存12天守當中嘅「松山城」與「宇和島城」之外，仲有世界聞名嘅「今治毛巾」，至於關於「食」嘅部分又有咩出名美食？今次我哋會為大家介紹愛媛當地方美食嘅魅力！
何謂「B級美食」
除咗眾所皆知、被譽為旅遊必食嘅美食之外，即使係同一個縣，亦會根據不同區域而誕生出不一樣嘅當地美食。呢種當地美食多數以當地食材烹煮，無任何華麗嘅技巧或裝飾，屬於當地居⺠熟悉嘅好味道，通通被日本人稱為「B級美食」。
愛媛美味優勢
愛媛縣地理位置優越，天氣多為晴天兼氣候溫暖。當中，尤其係面向瀨戶內海一側，唔單止氣候溫暖少雨，仲擁有富含礦物質嘅土壤等栽培蜜柑嘅完美條件。愛媛蜜柑喺日本嘅生產量名列前茅，2019年生產嘅柑橘類品種數量多達41種，而2020年嘅柑橘出產額更高居全國第一，係名符其實嘅「柑橘王國」，相關產品多不勝數。
另一個受自然恩惠嘅係「宇和海」，擁有太平洋嘅黑潮暖流注入，帶嚟豐富嘅營養素與礦物質，令呢一帶嘅漁獲飽含脂肪，更成為鯛魚養殖嘅絕佳助力，愛媛嘅品牌鯛魚「愛鯛」係日本國內最高級嘅品牌魚。
愛媛B級美食
愛媛縣嘅B級美食與蜜柑同海鮮有著密不可分嘅關係，蜜柑多數用嚟整甜品，以下落嚟會為大家介紹鹹食正餐嘅當地美食。
鯛魚飯
愛媛嘅天然鯛魚捕獲量排名為日本數一數二，而養殖鯛魚嘅產量自1990年起更居高全日本第一！鯛魚滿戴嘅愛媛縣，全縣都可以品嚐得到鯛魚美食，當中最出名嘅「鯛魚飯」，更會因應唔同地區，其烹調手法亦分門別類。
具代表性嘅鯛魚飯係奢侈地使用整尾鯛魚，與生米炊煮而成嘅東部松山市「北條鯛魚飯」；將鯛魚刺身放喺白飯上，再加上生雞蛋、日式高湯、芝麻、醬油等調味料嘅南部宇和島市「宇和島鯛魚飯」，以及放上炙燒天然鯛魚刺身、被稱為「第3種鯛魚飯」嘅「松山炙燒鯛魚飯」。
太刀魚巻
除咗鯛魚，望落零舍吸睛嘅「太刀魚卷」亦絕不容錯過。日文中「太刀魚」即係白帶魚，將富含油脂、DHA與多種維他命嘅白帶魚切成長條狀，細細卷上天然竹串，再淋上特製醬汁燒烤成令人胃口大開嘅焦糖色系，並散發陣陣香氣，係一款有別於鯛魚飯嘅豪邁風格嘅美食。當中，「太刀魚卷」發源自愛媛縣宇和島市嘅老舖魚店。
雜魚魚板
將被稱為「雜魚」（ざこ、zako）、低經濟價值嘅魚仔磨碎後，加入雞蛋、小麥粉混合成形，再油炸而成嘅魚漿製品。雖然就咁聽個名，畀人印象可能唔多好，但味道完全唔會比其他魚漿製品輸蝕喔。無論係用嚟做下酒菜、抑或係麵類配料等搭配都相當合適，與各種美食嘅搭配度極高，係愛媛縣唔少家庭每日嘅必備美食。
今治豬肉叉燒半熟蛋飯
今治豬肉叉燒半熟蛋飯係誕生於今治市嘅B級美食，起源自當地一間中華餐廳嘅廚師，作為自己伙食所設計嘅快速餐。喺米飯上放上切碎嘅豬肉叉燒、半熟蛋，最後淋上叉燒醬汁與胡椒，簡單快速，又可以補充體力兼份量十足嘅美食。喺廚房內大受好評後正式商品化，既簡單又豪邁嘅美味，係當時男子高中生嘅人氣美食，現時則成為今治市嘅知名美食。
三津濱燒
直截了當地講，其實就係於松山市三津濱販賣嘅御好燒，但係除咗椰菜、雞蛋、炒麵或烏冬之外，仲特別加入當地生產嘅魚漿製品竹輪（又稱為獅子狗），增添多份魚貝類嘅美味與口感，並對摺成半月形再上餐檯，深受當地人喜愛，被譽為三津濱地區嘅靈魂料理。
相關文章
Comments