位於愛媛縣宇和島市嘅宇和島城，有幸於明治時代「廢城令」時免於被全部拆除嘅命運，天守閣因而至今依然得以保存。除此之外，古城同時亦保存著石牆、慶長時期（1596年至1615年）城門等400多年前嘅風貌。遊客如果登上天守閣，更可遠眺宇和島灣與宇和島街區美景呢！
宇和島城令進攻者產生錯覺嘅設計
宇和島城最初由精通城堡建築技術嘅武將・藤堂高虎建造。藤堂高虎喺開墾土地之前，活用所有面向大海嘅土地，令古城處處都展現出建築師嘅獨特設計。其一例子，就係側面不相等、呈五邊形嘅外牆。城堡雖然被五邊形外牆包圍，但實際上目的就係令敵人以為佢屬於方形設計；而整個城堡嘅設計，亦係由繼承藤堂高虎嘅大名繼續負責完成。雖然現時見到嘅天守閣係自藤堂高虎移居到另一個領土後由伊達家重建，但城堡整體依然以藤堂高虎嘅設計作為基礎。
日本十二個現存天守之一！宇和島城天守閣
宇和島城嘅天守有幸於於明治時代廢城令中免被拆除，係日本現存12座被指定為國家重要文化財產嘅天守之一。 現存嘅「3重3層」天守於1666年改建而成，由於城堡內並無任何戰鬥設備，例如可以射箭、開槍，或丟石頭嘅地方，而且外觀設計極具裝飾性，因此可以話佢係一座象徵著和平時代嘅天守。如果購買門票登上天守，您即可以欣賞到宇和島街景以及環山海景。
以下將為大家介紹城內推薦影相打卡景點！
宇和島城上立門
喺明治時代城櫓同城門被拆除前，南登山口到天守之間總共有七座城門。而唯一留存至今嘅，就係宇和島市指定文化財產「上立門」。作為武家正門，「上立門」屬於前後有兩根石柱支撐屋頂嘅藥醫門，係一眾藥醫門內規模最大嘅。
滿佈青苔嘅宇和島城石牆及石階
古城每一段石牆都融合著唔同建造時期以及各種用途 。透過仔細比較每段石牆，您或者都可以搵到唔少有趣發現！遊客可以通過兩條路線前往城堡：陡峭石階又或較為平坦嘅斜坡。前者可以令您喺短時間內爬上一條歷史懷舊小徑；而後者則係整修完善嘅平緩斜坡。如果對自己腳骨力有信心又想感受古城歷史的話，建議就選擇擇石階路線啦！
植物寶庫：宇和島城城山
包括部分稀有植物在內，城山內種有超過450種植物。而且由於多年來都無發生過火災、亦無砍伐樹木，因此喺呢到生長嘅植物，都可以話係紀錄著城堡嘅歷史呀！
關於宇和島城
- 築城：1601年
- 修復（天守閣下城郭）：1671年
景點資訊
名稱：宇和島城
- 地址：〒798-0060 愛媛縣宇和島市丸之内1番地
- 交通方式：羽田機場→[飛機]約85分鐘→松山機場→[松山機場利木津巴士]約15分鐘→松山站→[JR特急宇和海17號]約85分鐘→宇和島站…步行約15分鐘（※到達天守閣約35分鐘）。
- Wi-Fi：無
- 信用卡：不可使用
- 開放時間：【天守】9:00～16:00（※11月到2月）9:00～17:00（※3月到10月）。【宇和島城（城山）】6：00～17：00（※11月到2月）6：00～18：30（※3月到10月）。
- 門票：【天守】成人200日圓、中學生以下160日圓。【宇和島城（城山）】免費
Comments