常言道：「活到老，學到老」，居日5年嘅小編亦每日抱著勤學不倦嘅學習態度，迎接在日生活嘅每一個明天。
最近有一則讓小編非常在意嘅新聞—2022年秋天，吉卜力公園會於愛・地球博記念公園（愛知縣）正式開幕，消息讓全世界吉卜力粉絲都感到既期待又興奮，而日本媒體喺報導時，就以「大約40個東京巨蛋咁大」嘅表達方式去形容公園嘅面積大細。
咦？「大約40個東京巨蛋咁大」究竟係有幾大？其實喺日本經常會出現「東京巨蛋」等等加入比喻嘅特有單位，聽完之後淨係知道面積「非常大」，但如果被問到實際面積究竟係有幾大，相信大部分人都會表示唔知道。
為咗查明呢個模糊不清嘅含意，小編決定將對於經常去日本嘅遊客嚟講難以理解嘅特有單位，逐一轉化為實際數字同大家分享！
【面積特有單位】「〇個東京巨蛋咁大」究竟係有幾大？
日本喺形容設施或建築物等等嘅面積時，經常會使用「〇個東京巨蛋咁大」嘅方式去表達。
成日都會喺各個媒體報導中，見到「1個東京巨蛋咁大」、「3個東京巨蛋咁大」等日本特有單位嘅表達方式。其實，除咗去日本玩嘅遊客對於日本特有單位嘅表達方式會感到費解，亦有唔少無去過東京巨蛋嘅日本人都表示一頭霧水…
以下落嚟，就等小編為大家揭開「東京巨蛋實際上究竟有幾大？」嘅神秘面紗吧。
東京巨蛋嘅建築面積為46,755m ²（約4.7ha）。因為實在太大，所以小編用比較顯淺易明，「1個東京巨蛋」作比喻去講解以下嘅例子吧。
| 例子 | 大小 | |
| 競技游泳池 （奧運規格大小・游泳池） | 長50m×闊25m | 約37.4個 |
| 足球場 （國際足球協會「FIFA」規定大小） | 長105m×闊68m | 約6.5個 |
小編再挑選出幾個遊客會比較熟悉嘅旅遊景點，去講解畀大家知其面積相當於幾多個東京巨蛋喔。
| 景點名稱 | 面積 | |
| 千葉縣 東京迪士尼海洋🄬 | 約49ha（*1） | 約10.5個東京巨蛋 |
| 千葉縣 東京迪士尼樂園🄬 | 約51ha（*1） | 約10. 9個東京巨蛋 |
| 東京都 新宿御苑 | 約58.3ha | 約13個東京巨蛋 |
| 長崎縣 豪斯登堡 | 約152ha | 約32.5個東京巨蛋 |
*1：主題公園區域
關於「〇個東京巨蛋咁大」嘅表達方式由來並無一個確切嘅講法，其中之一據聞係受到於1937年所完成嘅日本職業棒球中心地─後樂園球場（1988年已解體）所帶嚟嘅影響。
後樂園球場作為當時人氣球隊讀賣巨人隊嘅主場被長期使用，多場比賽透過電視於全國播出，成為幾乎日本全國嘅國民都能夠想像得到其廣闊程度嘅建築物。因此，「〇個後樂園球場咁大」嘅表達方式漸成慣例，於1988年東京巨蛋開幕後亦原封不動地繼承以上提及到嘅表達方式並沿用至今。另外，場地可以容納55,000位觀眾亦係成為大家對其持有「一次過可以容納非常多人」嘅既有印象原因之一喔。
根據唔同嘅都道府縣，亦有使用「〇個札幌巨蛋咁大」（北海道）或「〇個阪神甲子園球場咁大」（關西）去取代「〇個東京巨蛋咁大」嘅講法。
經過小編嘅講解之後，應該可以捕捉到些少箇中真諦吧！（仲係一頭霧水？總之記住「東京巨蛋=超級大」就OK！）
相關文章：
【高度特有單位】「〇座東京鐵塔咁高」究竟係有幾高？
講到與高度相關，加入比喻嘅特有單位，一般都會列舉東京鐵塔、東京晴空塔、富士山等等關東一帶嘅「3大巨頭」旅遊名勝為特有單位。
如果您曾經從展望臺欣賞過其美景，或曾登上過富士山嘅話，腦海中應該會對以上比喻留下相關印象吧？話雖如此，相信可以掌握以上各名勝實際高度嘅人，可謂寥寥可數。
| 景點名稱 | 高度 |
| 東京鐵塔 | 333m |
| 東京晴空塔 | 634m |
| 富士山 | 3,776m |
當中，想要強調龐大數量以及懸殊高度時，經常會使用「有〇座富士山」嘅講法喔。
例如「銀行存摺（香港又稱為紅簿仔）所發行嘅全年總數量，足足有成“2座富士山咁高”」、 「（商品）發售嘅首月出貨總數量，相當於約4座富士山咁高」等等嘅比喻方式，亦經常喺新聞稿或新聞報導中被使用。
另外，唔單止淨係東京鐵塔・東京晴空塔，其實每一個地區嘅象徵性建築物，都會被用作比喻。大阪嘅話係通天閣，京都嘅話係京都塔…咁比喻落去嘅話，真係會越講越令人「搲爆頭」。（汗）
【距離特有單位】「環繞山手線〇個圈咁長」究竟係有幾長？
如果面積代表係東京巨蛋嘅話，距離代表就係山手線。
去東京旅行嘅時候，相信一定有搭過JR山手線吧。因為JR山手線係全國著名嘅鐵路路線，所以其行駛距離（34.5 km）亦經常被作為比喻基準。舉個例子，據聞將喺東京行駛中，約1萬架巴士全部連接起來嘅話，就等同於環繞山手線約4個圈嘅距離喔（*3）！
順帶一提，乘搭電車環繞晒30個站大約需要1小時，但係徒步行走嘅話就同全程馬拉松（簡稱全馬）嘅距離差唔多，需要12個小時以上。（因為你唔會直接喺電車路軌上行嘛～）
*3：根據東京巴士協會「東京巴士指南WEB」資料所顯示
相關文章：
後記：日本國民零食「美味棒」都係其中一例！
喺日本，想要表達價格嘅時候（尤其係想要表示平價嘅時候）經常使用「可以買到〇條美味棒（*4）」嘅比喻模式，對日本人嚟講，與加入比喻嘅特有單位相關嘅典型例子其實仲有非常多喔。唔知喺大家嘅日常生活裡面有無類似情況出現呢？歡迎留言同小編開心Share吖ー
*4：日本國民駄菓子（日本傳統零食甜心）之一。直至2022年5月為止，每條售價為12日圓（不含稅），係「平價貨」嘅代表性例子。
Comments