從東京出發，就可以輕鬆去到嘅「東京德國村」，係千葉縣最大規模嘅主題樂園。坐擁四季美麗花景，仲可以暢玩種類豐富嘅遊樂設施，亦會配合季節推出各式各樣嘅限定活動。當中最出名就係冬天臨近聖誕時期，有日本關東三大燈飾之一美譽嘅聖誕燈飾。今次FUN! JAPAN編輯部要帶大家去「東京德國村」，介紹園內各種魅力，仲有您絕不能錯過嘅精彩好地方。下次同親朋好友去日本旅遊嘅時候，可以將「東京德國村」放入旅遊景點心水名單，出發去一趟千葉一日遊！
東京德國村係一個咩地方？
位於千葉縣嘅「東京德國村」係以田園風景為主題嘅自然體驗主題樂園，園區佔地廣闊，佔地面積居然有19個東京巨蛋咁大！綠意悠然，多彩繽紛嘅花卉環抱之下，可以享受豐富多元嘅遊樂設施、動物園、各種收成體驗，另外仲有因應各個季節所推出嘅限定活動等。從東京都市中心出發去「東京德國村」嘅話，車程只需1小時左右，交通方便亦係吸引大家去踏足呢個地方嘅一大魅力。
情侶約會好去處，遊樂設施應有盡有！適合各年齡層去玩嘅娛樂景點
園內遊樂設施豐富，多達20種，無論係情侶約會、一家大細去玩都非常適合！可以搭摩天輪眺望富士山、東京港灣，或者踩著天鵝船游湖，偶遇野生鳥類，仲有連3歲小朋友都可以放心去玩嘅可愛迷你過山車等，非常多令人未玩先興奮嘅遊樂設施！喺「東京德國村」肯定可以玩到忘我，感受咩係快樂時光一眨眼就過。（笑）
除此之外，亦可以去踩「可愛有趣家庭單車」，大人小朋友齊齊踩向終點，享受一段滿載歡樂與笑容嘅親子時間，單車造型亦相當多變化，有動物造型三輪車，亦有各式各樣形狀嘅變形單車等等可供選擇。
人氣打卡景點！四季醉人花景非常吸睛
「東京德國村」春天開著金黃色嘅油菜花，秋天時分，掃帚草、玫瑰、金盞花等等相繼盛開，展現迷人風情！園裡面一整年都有動人花卉作點綴，因應季節舉辦期間限定活動，更加充滿魅力。一邊散步，一邊賞花，企喺一大片花田前面，肯定可以影出無數張令人羨慕嘅打卡靚相，呃like指數極高！
當中最推薦就係圓碌碌又得意嘅掃帚草。夏天綠油油，令人清神爽利，一到秋天就染上一片秋分紅色，呈現截然不同嘅風貌。
絕不可錯過嘅璀璨浪漫景色，關東地區最大聖誕燈飾
「東京德國村」從年頭到年尾舉辦嘅眾多活動當中，最受歡迎並吸引最多人專程嚟一睹風采嘅就係冬天聖誕燈飾！夜晚園區七彩繽紛嘅燈光照映之下，就好似踏入一片夢幻世界。搭摩天輪從高處欣賞3D燈飾，令人興奮無比「光與音表演」、東京德國村傳統「彩虹隧道」等等精彩之處遍佈園區各地，營造出最璀璨浪漫時光！
呢艘海盜船係咪好可愛呢！真不愧係關東地區最大嘅聖誕燈飾。身處喺呢個夢幻璀燦嘅世界裡面，令人完全陶醉喺此時此刻，連返屋企嘅路都差啲唔記得！（笑）
名字叫「東京」德國村但位於千葉縣！？
「明明喺千葉縣，點解叫『東京』德國村？」應該係好多人心目中會浮現呢個問題。關於名字嘅由來，據聞係因為1997年東京灣跨海公路開通之後，從東京過去就變得非常方便，就係呢個原故。所以千祈唔好聽到東京，就以為係位於東京都，以下會提供交通方式畀大家參考，就可以順利去到位於千葉縣「東京德國村」一日遊！^^
景點資訊
- 景點名：東京德國村
- 地址：〒299-0204 千葉縣袖浦市永吉419
- 交通方式：從東京站搭JR總武線到「千葉」站，轉搭JR內房線到「木更津」站，再搭JR久留里線到「東橫田」站。從東橫田站搭路線公車，喺「農協平岡支店」落車，步行約11分鐘
- 門票：普通票 成人800日圓、兒童（4歲～國小）400日圓
- 營業時間：09：30～17：00（最後入園時間：16：00）
- 公休日：全年無休 ※根據季節或天候狀況，亦有可能調整營業時間或臨時休園
Comments