位處埼玉縣南部嘅「埼玉市」鄰近東京，從東京站搭電車去大宮站、浦和站、埼玉新都心站等埼玉市鬧區，車程只需約30分鐘，交通非常方便！
埼玉市除咗有大型購物商場畀大家盡情Shopping大買特買之外，仲有唔少可以遠離都市煩囂、擁抱大自然嘅郊外景點。一提到埼玉縣，相信大家可能會即刻諗起充滿昔日江戶風情嘅「川越」，但其實埼玉縣又點止川越一個精彩景點？今次FUN JAPAN!編輯部就嚴選出埼玉市必去景點推介，等大家下個東京旅程可以順便去埋埼玉市，感受與東京不一樣嘅魅力！
點樣出發去埼玉市？
埼玉縣埼玉市鄰近東京，距離東京中心地帶約20～40km外，從東京出發交通非常方便。例如您可以從池袋或東京站出發，池袋站出發的話，可以乘搭JR埼京線、湘南新宿線；從東京站出發嘅話，則可以乘搭京濱東北線、高崎線直達，就算行程期間住喺東京內嘅酒店，都可以輕鬆出發去埼玉市一日遊喔。
埼玉市推薦旅遊景點3選
大宮公園：埼玉縣縣內數一數二賞櫻景點！保佑戀情順利嘅武藏一宮冰川神社亦喺徒步範圍之內！
大宮公園於明治18年（西元1885年）落成，係由埼玉縣政府建立嘅第一座縣營公園。園內四季景致優美，除咗擁有過百年樹齡嘅赤松林，仲種植咗1,000棵櫻花樹，因此亦係當地一大賞櫻景點。大宮公園唔單止坐擁日式庭園美景，設備亦相當完善，例如有硬式棒球場、單車賽車場（兼田徑場）、足球場、游泳池（競泳用）、體育館、弓道場、動物園、兒童遊樂園等等，係埼玉縣使用率最高嘅公園，稱得上係埼玉縣縣民人人熟悉嘅最佳休憩場所。
作為埼玉縣縣內賞櫻名勝景點之一，大宮公園每年3月底至4月春暖花開之際，都會有1,000棵盛開櫻花樹打造出櫻花隧道，吸引唔少人專程去朝聖。
睇完櫻花之後，仲可以去埋大宮公園隔離、保佑覓得良緣、戀愛心願成就嘅著名結緣聖地「武藏一宮冰川神社」。武藏一宮冰川神社擁有2,400年悠久歷史，神社內除咗有著名結緣景點「神橋」，仲有一條長約2km嘅參拜道路亦係必去朝聖景點之一，據聞呢條參拜道路更係日本第一長嘅參拜道路喔！武藏一宮冰川神社對祈求姻緣、保佑人際關係、工作運、家庭運等等都非常靈驗，如果喺櫻花季到訪仲可以賞埋櫻，療癒又吸睛！
鐵道博物館：無論係大朋友定小朋友都玩到唔捨得走嘅電車世界
「鐵道博物館」位於埼玉縣埼玉市大宮區大成町，係JR東日本為咗慶祝紀念創立20週年而喺2007年開館嘅設施。館內展出咗多架列車，當中包括實際上曾經投入服務嘅普通列車、特急列車、貨物列車等唔少罕見珍貴嘅列車車輛。同場仲有日本最大規模嘅鐵路模型、模擬駕駛以及迷你電車駕駛體驗等設施，鐵道迷朝聖不在話下，包保大朋友小朋友都可以喺鐵道世界裡面玩得盡興！
鐵道博物館內除咗日文，仲有提供英文、繁體中文、簡體中文、泰文等多國語言服務，就算唔識日文都可以深入了解日本鐵道、電車迷人特色。無論係家庭同樂出遊，親朋好友開心遊，抑或係一個人暢遊都好啱去鐵道博物館朝聖一番！
景點資訊
- 景點名：鐵道博物館
- 地址：埼玉縣埼玉市大宮區大成町3-47
- 交通方式：從JR池袋站乘搭埼京線，約30分鐘抵達大宮站落車，轉乘埼玉新都市交通線至「鐵道博物館（大成）站」落車，徒步約1分鐘
- 營業時間：10：00～17：00（最後入館時間為16：30）※因應新冠肺炎防疫措施，目前縮短營業時間
- 定休日：每週二、新年假期
- 門票：
- 【預售票】（成人）1,230日圓、（中、小學生）510日圓、（小童）210日圓
- 【即日票】（成人）1,330日圓、（中、小學生）620日圓、（小童）310日圓
- ※博物館窗口、售票機並未販售門票。如欲參觀，請事先於指定嘅便利商店購買指定入場時間門票（設有張數限制）。
岩槻人偶博物館：日本獨特和風人偶！歡迎到訪人偶嘅故鄉！
「岩槻人偶博物館」座落於埼玉縣埼玉市岩槻區，於2020年2月22日開館，係日本首座以人偶為主題嘅專門公立博物館，更加係埼玉市岩槻區全新吸睛旅遊景點。
其實，日本國內最大嘅日本人偶產地正正就係埼玉縣，岩槻地區更加係數一數二代表。嚟到岩槻人偶博物館，大家可以對人偶製作嘅歷史、所需嘅傳統技術等相關領域了解更多，並理解人偶點解會令人著迷之奧祕，從而學習更多有關日本人偶嘅知識。
岩槻人偶博物館內除咗展出多款日本人偶，仲會有販賣以館藏作品為主題設計嘅獨家商品嘅專門店，亦有設置Café，等大家可以享受一個不一樣嘅Tea time。
景點資訊
- 景點名：岩槻人偶博物館
- 地址：埼玉縣埼玉市岩槻區本町6丁目1-1
- 交通方式：乘搭東武野田線至岩槻站，從東口出站後沿著正面大馬路向前行，行到第2個紅綠燈（岩槻站入口）時轉左，再向前行約500m，博物館就喺右手邊。徒步約10分鐘
- 營業時間：09：00～17：00（最後入館時間為16：30）
- 定休日：每週一（※遇公眾假期照常營業）、新年假期
- 門票：普通票 成人300日圓、大學・高中生・65歲以上 150日圓、中小學生 100日圓
同場加映：埼玉縣仲係一拳超人嘅故鄉！
唔知大家有無聽過日本著名嘅超級英雄題材動作漫畫《一拳超人》呢？
《一拳超人》於2009年於網路上開始連載後大受歡迎，其後再喺2012年於大型漫畫網站刊登「重製版」，絕對係日本超人氣經典暢銷作品之一。《一拳超人》唔單止擄獲日本國內漫畫迷嘅心、亦成為海外漫畫迷熱烈討論嘅人氣熱話作品。如果有睇過《一拳超人》嘅話，就一定知道主角個名就係叫「埼玉」！
或者您會覺得驚訝「《一拳超人》同埼玉縣究竟有咩淵源關係？！」，雖然角色設定上並未有特別聲明同埼玉縣有何關聯，但其實原著作者「ONE」先生就係出身自埼玉縣（亦有聽聞主角埼玉(光頭披肩俠)個性同埼玉縣一樣令人難以留下深刻印象，因而被命名為「埼玉」等傳聞…）。可以肯定嘅係，《一拳超人》爆紅後相繼同埼玉縣以及多間大型鐵道公司推出聯名合作系列，下次計劃出遊埼玉時，不妨睇睇每次只要一拳就可以解決晒所有事情，仲有各種爆笑劇情嘅《一拳超人》，話唔定會感受得到另類嘅旅遊樂趣呢！
了解更多東京前往埼玉嘅交通方式→【日本關東】一文了解來往東京埼玉交通！東京自由行必知首都圈鐵道路線
Comments