相信有唔少遊客去關東地區旅遊嘅時候，都會以東京作為中心點，再將旅程延伸去玩埋東京以外嘅縣。當中，埼玉縣就係其中一個鄰近東京嘅熱門地區！
埼玉縣雖然鄰近東京，卻擁有與東京完全唔同嘅氛圍，加上交通非常方便，唔少人去關東地區旅行嘅時候，都會出發一個東京埼玉一日來回之旅，咁就可以一個旅程，感受兩種不同日本風情。今次，編輯部就整理出行駛於東京與埼玉之間嘅鐵道路線，等大家下次周遊關東地區嘅時候，可以搭得更輕鬆，玩得更自在～
從東京出發，乘搭JR東日本電車輕鬆暢遊埼玉
「JR東日本」呢個詞聽落可能會覺得有啲陌生，但其實無論係方便又快速嘅「新幹線」，抑或係東京首都圈主要交通網「山手線」等路線，都係由JR東日本所營運。除咗以上大家耳熟能詳嘅路線，JR東日本所提供嘅東京、埼玉多條來回路線亦相當方便，即刻去睇睇JR東日本有邊幾條路線令您旅程更加FUN啦！
埼京線
照片提供：JR東日本大宮分社
埼京線係連接埼玉縣東京副都心區域（新宿、澀谷、池袋）嘅路線。從東京都品川區大崎站出發，沿途會停澀谷、新宿、池袋、赤羽、埼玉縣埼玉市武藏浦和等車站，最後會抵達埼玉市終點大宮站。
大宮站大家可能唔多熟悉，但其實大宮站係埼玉嘅主要大站，無論係新幹線、京濱東北線、宇都宮線、高崎線、湘南新宿線、川越線等等多條線路都會停大宮站。對於想玩盡東京、埼玉兩地嘅您嚟講，埼京線絕對係最佳路線之一。
宇都宮線（東北本線）
宇都宮線（東北本線）途經車站包括新幹線都會停靠嘅東京、上野站，以及埼玉縣埼玉市浦和站、埼玉新都心站、大宮站、栃木縣宇都宮市宇都宮站等站，最後再抵達那須鹽原黑磯站。無論係東京站、阿美橫丁與上野動物園嘅所在地上野站、抑或係日本餃子勝地宇都宮站，統統都係旅遊熱點！宇都宮線（東北本線）仲會駛經那須鹽原地區，可以順便嘆返個日本著名溫泉「鹽原溫泉」喔。
京濱東北線
京濱東北線行駛路線涵蓋埼玉縣埼玉市大宮站，經由東京都千代田區東京站再駛至神奈川縣橫濱站。大宮站至東京站之間係屬於東北本線嘅一部分，而東京站至橫濱站之間係則屬於東海道本線嘅一部分。
京濱東北線沿途會駛經多個方便轉車嘅車站，例如東京站、上野站、秋葉原站、濱松町站、品川站等等，就算要喺旅途上要轉搭其他路線都非常方便。除此之外，仲會停靠神奈川縣川崎站、橫濱站等熱門地方，想輕鬆玩盡人氣景點？京濱東北線會係您嘅另一必搭選擇！
湘南新宿線
湘南新宿線貫穿山手線池袋站、新宿站、澀谷站、大崎站，與東北本線、橫須賀線、高崎線、東海道線互相直通運行。湘南新宿線亦會駛經神奈川縣橫濱、大船等站，無需轉車就可以直達鎌倉站或小田原站，非常方便。身處東京首都圈嘅您，無論係想去繡球花名所鎌倉一睹繡球花嘅風采，抑或係去小田原、箱根等地嘆溫泉賞富士山，只要搭湘南新宿線即可以輕鬆達成心願！
川越線
川越線嘅起點站為大宮站，終點站為埼玉縣日高市高麗川站。由於大宮站與川越站之間亦有埼京線班次直通運行，如果可以將時間計得啱啱好嘅話，從東京上車之後無需轉車，即可直達充滿歷史氣息兼有小江戶之稱嘅川越。
西武鐵道電車帶你周遊埼玉
西武鐵道總公司設置於埼玉縣所澤市，鐵道連接著東京都副都心地區與埼玉縣之間，無論係出發去自然風光明媚嘅秩父，抑或係想悠悠閒感受一下埼玉縣嘅新鮮氣息，西武鐵道絕對係必搭電車之一。以下即刻分享幾個乘搭西武鐵道出遊嘅精彩景點與路線畀大家！
西武鐵道池袋線
西武鐵道池袋線係一條連接東京都豐島區池袋站與埼玉縣飯能市吾野站嘅鐵道路線。其中，都營大江戶線練馬站等車站亦會停站。
西武秩父線
西武秩父線從埼玉縣吾野站行駛至西武秩父站，如果大家想出發去一個有得睇靚景，仲可以嘆個靚溫泉嘅好地方，編輯部會推薦您搭到去西武秩父站，事關車站附近就係溫泉設施「西武秩父站前溫泉 祭之湯」，仲有賣手信嘅店舖，等您可以順便揀返幾件手信為旅程留記念。西武秩父站附近嘅羊山公園亦相當出名，可以趁機去埋芝櫻之丘感受一下與東京大都會截然不同嘅大自然好風光。
西武鐵道新宿線
西武鐵道新宿線係一條將新宿區歌舞伎町西武新宿站與埼玉縣本川越站連接嘅路線。乘搭西武鐵道新宿線，即可以輕鬆從繁華熱鬧嘅新宿區，抵達充滿江戶風情嘅人氣旅遊景點川越。
極盡優雅奢華鐵道旅程！西武旅行餐廳「52席的至福」
想要一次過暢遊東京、埼玉近郊嘅經典景點，又想出發一趟不一樣嘅旅行？「52席的至福」餐廳列車絕對係您嘅理想選擇。置身於限定52席座位嘅「52席的至福」餐廳列車，可以一邊享用頂級料理，一邊欣賞沿途美麗景致，既優雅奢華又可以放鬆姿態享受旅遊嘅樂趣。
「52席的至福」唔單單係交通工具咁簡單，裡面有餐廳車廂、用餐車廂、多用途車廂等等，簡直就好似一間「行走中的餐廳」。「52席的至福」每個部分都經過精心設計，除咗車內裝修選用秩父銘仙等鐵路沿線地區所出產嘅傳統工藝品，菜式更係由人氣餐廳兼名主廚親自監修設計，而且會依季節推出當季時令菜式，無時無刻都帶畀大家頂級嘅享受。
「52席的至福」從池袋站行駛至西武秩父站，或由西武新宿站至西武秩父站，推薦大家可以趁機規劃一趟「東京、秩父一日遊」。
- 西武旅行餐廳「52席的至福」觀光列車
- 預約訂票 請至官方網站網路預約訂票
- 官網：https://www.seiburailway.jp/railways/seibu52-shifuku/tw/
- 詳細行程與時間，請上官網查詢
- 行程：
【早午餐行程】池袋 10點53分出發 - 13點58分抵達西武秩父；西武新宿 10點47分出發 - 13點58分抵達西武秩父
【晚餐行程】西武秩父 17點42分出發 - 20點04分抵達池袋；西武秩父 17點42分出發 - 20點02分抵達西武新宿
※2022年3月12日（六）隨著班次調整，行駛時間將會有所變動，詳細資訊請上官網確認。
※西武巨蛋MetLife Dome（2022年3月改名為Belluna Dome）若舉行職業棒球比賽、演唱會等活動時，行駛池袋站⇔西武秩父站區間路線有可能更改為西武新宿站⇔西武秩父站。若調整行駛區間嘅話，相關資訊會公布於「52席的至福」官網頁面裡面。
Comments