熟悉日本雜誌、漫畫、輕小說、電影嘅話，就一定有聽過KADOKAWA（角川）呢個大名！近年，日本影視業、出版業嘅龍頭KADOKAWA集團更致力推廣日本文化振興事業，位於埼玉縣所澤市嘅「所澤SAKURA TOWN」就係其代表之一。「所澤SAKURA TOWN」於2020年11月盛大開幕，呢度除咗有博物館、體驗型動漫主題酒店、特色商店，仲有動漫聖地巡禮第一站嘅諮詢所兼神社等，堪稱日本最大規模次文化流行中心，即刻跟著FUN! JAPAN編輯部嘅腳步，一探「所澤SAKURA TOWN」與周邊嘅魅力所在吧！
超魔幻新地標：角川武藏野Museum
由著名建築大師隈研吾操刀設計嘅角川武藏野Museum，外觀有如屹立於大地上嘅巨岩一樣，可以話係「所澤SAKURA TOWN」嘅象徵性地標建築，唔單止外觀氣勢磅礡，館內各項設施亦同樣大有睇頭。
5層建築嘅角川武藏野Museum，1樓係漫畫・輕小說圖書館與不定期舉行各式主題嘅展覽空間；2樓係正門大廳與Café及商店；3樓係EJ動漫博物館；4、5樓係最具話題性嘅「書架劇場」所在地。
高約8m嘅「書架劇場」，收藏約3萬冊書籍，仲會舉行定期主題投影活動，踏入書架劇場嘅瞬間，就好似走入電影場景般，令人驚嘆不已！
前往書架劇場途中會經過「Edit Town - Book Street (編輯小鎮-書街道)」，與一般書店及圖書館最大分別係書籍擺放方式。就咁睇可能會覺得呢度嘅書籍擺放方式相當不可思議，但其實內有乾坤，係根據館長松岡正剛精心安排嘅9大領域，分門別類咁擺放！
去到Book Street (書街道)，您可以隨手拎起心儀嘅書籍，再搵個喜歡嘅街角坐低慢慢睇。
景點資訊
- 景點名稱：角川武藏野Museum
- 營業時間：週日～週四為10:00-18:00、週五、週六為10:00-21:00
- 定休日：每月第1個、第3個以及第5個週二（適逢假日則順延至隔天）
- 門票：KCM Standard ticket當日券 成人1,400日圓(1,200日圓)、中學與高中生1,200(1,000日圓)、小學生1,000日圓(800日圓)
- ※括號內為從網上購買價格。另有更多企畫展與優惠1日券套票，詳情請上官網確認。
- 官方網站：https://kadcul.com/tw
動漫迷有機會一定要住一晚：EJ動漫酒店
「所澤SAKURA TOWN」亦有提供體驗型動漫主題酒店「EJ 動漫酒店」。EJ係「Entertainment Japan」嘅簡寫，設計理念為「入住自己鍾意嘅故事嘅世界裡面」，以人氣動漫作品為主題打造房間，等粉絲們可以住喺自己心儀嘅作品入面，享受「非日常」嘅住宿體驗。
設施情報
- 設施名稱：EJ動漫酒店
- 客房數目：33間
- 入住時間：16:00
- 退房時間：10:00
非員工都可以享用 完全開放嘅「角川食堂」
角川食堂其實係角川集團嘅員工餐廳，亦開放予一般民眾入內用餐。食堂唔單止提供使用當地新鮮食材製作嘅定食套餐，就連咖啡、小食等輕食類餐單都非常講究。當中，不得不提呢度嘅招牌菜式——咖喱！使用由十幾種香料調配而成嘅獨有配方所烹煮而成嘅咖喱，據聞係角川食堂嘅自信之作喔。
餐廳情報
- 餐廳名稱：角川食堂
- 座位：170席
- 營業時間：
- 平日：午餐 11:00-16:30(最後點餐時間為16:00) / 晚餐 16:15-20:00 (最後點餐時間為19:00)
- 六日與公眾假日：11:00-20:00 (最後點餐時間為19:00)
外觀新潮且現代感十足 「武蔵野坐令和神社」
「武蔵野坐令和神社」係由建築設計大師隈研吾，以及《最終幻想(FINAL FANTASY) 》系列嘅美術大師天野喜孝聯手打造嘅空間，神社內部嘅鳳凰壁畫，正正係出自於天野喜孝之手。有吉祥之意嘅鳳凰，亦係角川集團嘅標誌喔。
除此之外，武藏野坐令和神社亦係日本動漫旅遊協會，所公布嘅「最想去嘅88個動漫聖地」第1站嘅諮詢中心。因此，喺神社嘅社務所入面，亦有擺放著由協會所贈送嘅「公認御朱印（紀念章）」印章，吸引粉絲們到此蓋章留念。
講到神社就不得不提御守與御朱印！而武藏野坐令和神社推出咗一款非常特別嘅御守，就係保佑創作者日益精進嘅「藝道上達守」，以及圖案為「〆」嘅「截稿御守（締切守）」。
景點資訊
- 景點名稱：武蔵野坐令和神社
- 社務所營業時間：
- 4月～9月：10:00-17:00（假日到18:00）
- 10月～3月：10:00-16:30（假日到17:00）
- 社務所定休日：第一、三、五週嘅週二
同場加映：teamLab新常設展示 就在「武蔵野樹林公園」
善用光影表現嘅藝術團隊teamLab，其新常設展《teamLab: 橡子森林裡呼應的生命》，就設置於「所澤SAKURA TOWN」隔離嘅「武蔵野樹林公園」，與大自然完美地融為一體，隨著四季變遷更可欣賞得到不同景致。而teamLab作品中，經常出現「鵝蛋形體」嘅裝置，都可以喺度欣賞得到。只要觸碰或有微風輕輕吹過，「鵝蛋形體」裝置就會發出特有音色。於當夜幕低垂時，一盞盞微光點亮每個角落，有別於白天嘅夜間景致，因點燈而增添不少神秘色彩。
景點資訊
- 景點名稱：teamLab橡子森林裡呼應的生命
- 地址：埼玉縣所澤市東所澤和田3-9 （武藏野森林公園內）
- 營業時間：16:00-20:00
- 定休日：不定期(請上官網查詢)
- 門票：成人1,000日圓（1,200日圓）、中學與高中生700日圓（800日圓）、小學生500日圓（600日圓）
- ※括號內為週五六日及公眾假日嘅門票價格
- 官方網站：https://www.teamlab.art/zh-hant/e/acornforest/
「所澤SAKURA TOWN」除咗以上所介紹嘅景點之外，仲有達文西商店、卡拉OK、以及網羅日本各地著名拉麵店做期間快閃販售嘅「拉麵Walker廚房」。
另外，一出車站行去「所澤SAKURA TOWN」途中亦有唔少必睇位，例如東所澤站為配合「所澤SAKURA TOWN」開幕，以此為概念重新改裝，喺人行道上設置猶如藝術品一樣嘅「LED動漫坑渠蓋」。只要去一轉「所澤SAKURA TOWN」，從人文、藝術、娛樂到餐飲各方面，通通都可以滿足得到喔！
設施情報
- 設施名稱：所澤SAKURA TOWN
- 地址：埼玉縣所澤市東所澤和田3-31-3
- 交通：JR武蔵野線「東所澤」站徒步約10分鐘
- 官方網站：https://tokorozawa-sakuratown.com/tc/
Comments