「三大夜景」、「三大夜櫻」等日本眾多「三大〇〇」大家就聽得多，「三大夜城」您又聽過未？
「夜城」—或者各位平時比較少機會聽過呢個名詞，其實「夜城」即係指月光或燈光照耀之下，於晚上散發與白晝截然不同姿態嘅城堡。2014年經日本全國約4300位「夜景鑑賞師」投票後再實際走訪當地調查，於嚴密6項評定項目審查之下，大阪城、高知城、高田城被評為「日本三大夜城」，而今次FUN! JAPAN編輯部就要為大家全面解構介紹「日本三大夜城」，一齊踏上一趟「越夜越有機」嘅「夜城」世界！
大阪・大阪城
大阪經典觀光景點之一嘅「大阪城」總面積達105.6公頃，位於大阪城公園正中央，係眾所周知嘅大阪地標。現時嘅天守於1931年由大阪市市民捐贈之下重建，並從1931年重建後陸續實施夜晚點燈措施。1952年後，天守原則上會全晚點燈，直至從1997年再開始使用目前照明設計，讓金鯱、金黃裝飾等更加耀眼華麗。
天守會喺日落後開始點上部分照明，進而全面點燈；夜深深，則僅會保留天守窗戶燈光，再階段性地慢慢熄燈。隨著時間變化所展現出嘅不同天守風貌，可謂大阪城另一大特色！
大阪城公園內除咗天守閣之外，亦會舉辦其他古老建築點燈活動，櫻花季更會舉辦夜櫻點燈，以多種表現方式讓夜晚大阪城更顯璀璨迷人。
- 更多大阪城介紹→【日本大阪】關西必去名城之一！賞櫻、賞梅知名景點「大阪城」
高知・高知城
高知城座落於坂本龍馬等眾多知名人士輩出嘅高知縣，不過數到遊客最關心嘅，就必定係城內嘅絕佳影相打卡景點，能夠不費吹灰之力就令天守與追手門同框入鏡，影出超呃like靚相！入夜後，高知城亦會點燈，並隨一年四季變遷積極舉辦各項夜晚活動。
例如春天嘅「高知城花迴廊」，就會從追手門至天守閣嘅主要通道上設置燈籠並點燈，點綴裝飾路上兩旁花卉，再加上櫻花點燈等，令整個區域充滿春天活力。夏天「高知城夏夜城祭」換上風鈴與彩色蠟燭共同演出，而秋天則有「高知城秋夜城祭」，由亮燈高知城與燭光瑩瑩蠟燭打造出萬種風情。冬天時舉辦嘅「高知城冬城祭」，就以點亮蠟燭打造出極夢幻會場，照映本丸、二之丸並輔以各式各樣燈飾點綴。致力於發展夜景觀光嘅款待精神，亦係高知城被選定「日本三大夜城」嘅重要因素！
新潟・高田城
同樣獲評定為「日本三大夜城」嘅高田城，其最大特色就係由高田城與夜櫻於點燈之下共同譜寫出嘅「IGable」靚景。高田市保勝會於1926年舉辦第一屆賞櫻會，沿著護城河設置數百個紙燈籠，歷經數十年歲月後，活動至今已發展成名聲遠播嘅「高田城百萬人賞櫻會」，每年於高田城三重櫓與櫻花為背景舉行夜間點燈活動，喺大約3000個紙燈籠照映之下，護城河水面反射出優雅景色，往往吸引唔少遊客從日本各地甚至海外專程前來欣賞！
同場照亮整條櫻花行道樹隧道嘅「櫻花大道」亦係熱門景點之一。獲選為「日本三大夜櫻」、「日本三夜景」一事對高田城可以話係重大意義，不單可以令更多人知道日本獨有夜景鑑賞文化之外，仲能夠藉此深入了解高田城獲選為三大夜城嘅背後理由。
以上介紹嘅3座城堡，各位又征服咗幾多座呢？
Comments